Read Zokam Luke 9 Bible Online

Luke 9 - Zokam bible

Luke 9

¹Jesu in Sawm-le-nihte a sapkhawm khit ciangin, dawite khempeuh a hawlkhiat nading uh le natnate a damsak nading uh vang le thuneihna a pia hi.

²Tua ciangin amah in Pasian gam thu hilh ding le cinate damsak dingin amaute a sawl khia hi.

³Amah in amaute kiangah, "Na khualzinna-ua na zat dingun ciangkhut, thung-ip, anlum le sum keng loin puantungsilh keng thuah kei un.

⁴Inn khatpeuh ah na lut uh ciangin tua khua na nusiat mateng uh tua inn ah taam suak un.

⁵Mite in note hong ngaih kei uh leh amau langa teci ahi dingin tua khua na nusiat uh ciangin na khepek-ua leivuite singkhia un," a ci hi.

⁶Tua ahi ciangin amaute kuankhia uh a, khuaneute ah pai kawikawi-in mun khempeuh ah lungdamna-thu hilhin, mite a damsak uh hi.

⁷Tua laitakin gam-ukpa Herod in thupiang teng na za-a a amkham mahmah hi. Bang hang hiam cih leh mi pawlkhat in misi pan John thokik zo hi, ci uh a,

⁸adang pawlkhat in Elijah hong kilang hi, ci-in pawlkhat leuleu in tanglai-a kamsangte khat hong hing kik hi ci uh hi.

⁹Ahi hangin Herod in, "John ngawng ka tansa ahi hi. Tua ahileh a thu ka zak pa kua ahi hiam?" ci-in donga, amah a muh nadingin a hanciam hi.

¹⁰Sawltakpite kileh kik uh a, a nasepsate uh Jesu a zasak uh hi. Tua ciangin amah in amaute paipih a Bethsaida kici khuapi khat lamah a kihemkhia uh hi.

¹¹Ahi hangin mihonpite in thei veve uh a, amah a zui uh hi. Amah in amaute na muak a, Pasian-gam thu genpihin damsak ding a kisamte a damsak hi.

¹²Nitak lam ni niam ciangin Sawm-le-nihte ama kiangah va pai uh a, "Hih lai gamsungpi ahi manin hih kima khuaneu khuatate ah pai-in a nek ding uh le a zintun nading uh a zon theih nadingun mipite sawlkhia in," a ci uh hi.

¹³Amah in, "A nek ding uh bang khatpeuh pia un," ci-in a dawng hi. Amaute in, "Hih mihonpite khempeuh ading an lei dinga pai ding ka hi kei ngal uh leh, anlum nga le ngasa nih bek ka nei uh hi," ci-in a dawng uh hi.

¹⁴(Tua lai-ah pasal tul nga bang a om hi.) Ahi hangin amah in a nungzuite kiangah, "Sawmnga ta khawngin a pawlpawlin khen unla tusak dih un," a ci hi.

¹⁵Nungzuite in tua banga a khen khit uh ciangin mi khempeuh a tu uh hi.

¹⁶Amah in, tua anlum nga le ngasa gel la-a, vantung lam ento in, lungdam a koh khit ciangin tuate a balkham hi. Tua khit ciangin mipite a lui dingun nungzuite a pia hi.

¹⁷Amaute khempeuh in ne uh a, a kham pikpek khit uh ciangin a khamvalte uh a nungzuite in a top uh leh bawmta sawm le nih tak a pha hi.

¹⁸Khatvei Jesu in amah kia-a thu a nget laitakin a nungzuite zong om a, amah in amaute kiangah, "Mihonpite in kei kua hi, hong ci uh hiam?" ci-in a dong hi.

¹⁹Amaute in, "Mi pawlkhat in Baptize-pa John hi; pawlkhatte in Elijah hi; pawlkhat leuleu in tanglai kamsangte khat hong hing kik hi; hong ci uh hi," ci-in a dawng uh hi.

²⁰Amah in, "Tua ahileh no, kei kua hi nong ci uh hiam?" ci-in a dong hi. Peter in, "Pasian’ Christ a[36] na hi hi," ci-in a dawng hi.

²¹Jesu in hih thu kuamah a hilh loh nadingun khauhtakin a vauhilh hi.

²²Tua ciangin amah in, "Mihing Tapa in tampi thuak pelmawh dinga, upate, siampi makaite le thukham siate in amah nolhin, pel loin amah kithat dinga a ni thumna ni-in kihingkiksak ding hi," a ci hi.

²³Tua ciangin amah in amaute khempeuh kiangah, "Mi khatpeuh in ka nung hong zuih nop leh amah leh amah kinial pelmawh dinga nisimin ama singlamteh kisuanin hong zuih kul hi.

²⁴Ahang in, ama nuntakna a honkhia nuamte in taan ding uh a, ahi hangin kei hanga a nuntakna a mangsakte in a honkhia ding hi.

²⁵Mi khatin leitung buppi a neih hangin amahmah kimansuah ahikeh kitaan leh bang phatuam ding ahi hiam?

²⁶Mi khatpeuh in keimah le ka thute a zumpih leh vantung misiangthote le Pasian minthanna le ama minthanna tawh Mihing Tapa hong pai ciangin ama hangin a maizum ding hi.

²⁷Thutak kong geninah hih lai-a ding mi kimkhat in Pasian gam a muh ma-un sihna a ciam kei ding uh hi," a ci hi.

²⁸Jesu in hih thu a gen zawh ni giat bang a phak ciangin Peter, John le James-te zawnin mualtung ah thungen dingin a kahto uh hi.

²⁹Thu a nget laitakin, a mel kikhela, a puante khuaphia bangin a tang hi.

³⁰Mi nih - Moses leh Elijah,

³¹minthanna thupi tawh kilang uh a, Jesu tawh a kiho uh hi. Amaute in Jerusalem a, a tangtunsak ding, ama paikhiat nading thu a gen uh hi.

³²Peter le a pawlte a ihmut uh suak mahmah a, ahi hangin a tei sinsen uh ciangin ama minthanna le amah tawh a dingkhawm mi nih a mu uh hi.

³³Tua mite Jesu kiang pan a paikhiat laitakun Peter in, "Topa, hih lai-a i om nuam mahmah hi. Nang ading khat, Moses ading khat, Elijah ading khat, buk thum hong lamsak nung," a ci hi. (Ama gen bang hiam cih a thei kei hi.)

³⁴Tua banga a pau laitakin meii khat kai-in amaute tuama, meii lakah a tum uh ciangin a lau uh hi.

³⁵Meii lak panin aw khat in, "Hih in ka teelsa ka Tapa ahi hi; ama thu na ngai un," a ci hi.

³⁶Tua aw in a gen khit ciangin amaute in, Jesu amah kia-a om a mu uh hi. Nungzuite in hih thu amaute lungsimah kem gige uh a, amau muhsa thute tua hunin kuama kiangah a gen kei uh hi.

³⁷A zing ciang, mualtung pan a kumsuk uh ciangin mihon tampi in amah a na dawntuah uh hi.

³⁸Mihonpite lakah khat in, "Sia aw, ka tapa hong etsak dih in; amah bek ta-a ka neih ahi hi.

³⁹Amah kha khat in mana, thakhat khatin a kiko zakzak hi. Tua kha in amah kisatsak gawp a, a kam panin cilphuan a bua hi. Tua kha in amah nusiat hun nei lo phiala, a susia gawp ding hi ta hi.

⁴⁰Na nungzuite kiangah tua kha a hawlkhiat nadingun ka nget hangin a hawlkhia thei kei uh hi," a ci hi.

⁴¹Jesu in, "Thu um lo-a a lehtat khang mite aw, note tawh bang tan vei om khawma, bang tan vei hong dawhdawh zo ding ka hi hiam? Na tapa hong paipih in," a ci hi.

⁴²Tua naupang a paipih laitak nangawnin dawi in leitualah tuksak-a a kisatsak gawp hi. Ahi hangin Jesu in tua kha gilo a[37] tai-a tua naupang a damsak khit ciangin a pa a pia kik hi.

⁴³Tua ciangin amaute in Pasian liatna lamdang a sa mahmah uh hi. Mi khempeuh in Jesu hihna piandang a sak laitakun amah in a nungzuite kiangah,

⁴⁴"Thu khat kong gen ding hi. Limtakin na ngai un: Mihing Tapa mite khutah a kilehhek ding hi," a ci hi.

⁴⁵Ahi hangin amaute in bang a cih nopna hiam, cih a thei kei uh hi. Amaute theih loh dingin hih thu ki-im lai ahi manin amaute in a khiatna tel thei lo uh a, amah lah a dong ngam kei uh hi.

⁴⁶Nungzuite in amau lakah kua lianpen ding cih a kisel ngeingai uh hi.

⁴⁷Jesu in amaute ngaihsutna thei a, naupangno khat kai-in, a kiangah a dingsak hi.

⁴⁸Tua ciangin amah in amaute kiangah, "Keima min hangin hih naupnangno a sang peuhpeuh, kei hong sang ahi hi; kei hong sang peuhpeuh kei hong sawlpa a sang ahi hi. Ahang in, note khempeuh laka a neupen in a lianpen ahi hi," a ci hi.

⁴⁹John in, "Sia aw, mi khatin nang minin dawite a hawlkhiat ka mu uh a, ei mi hi lo ahi manin a hih nawn loh nadingin ka kho uh hi," a ci hi.

⁵⁰Jesu in, "No hong langpang lo peuhmah no pawl ahi hi, tuapa kho kei un," a ci hi.

⁵¹Jesu vantungah a kilak toh ding hun a tun kuan ciangin Jerusalem lam manawhin kuankhia ngiatngiat a,

⁵²ama mai-ah thupuate a sawl hi. Ama ading nate a baihsa-a koihkhol dingin Samaria khua neu khatah amaute a lut uh hi.

⁵³Ahi hangin amah Jerusalem manawh ahi manin tua khuate in amah a na muak kei uh hi.

⁵⁴Nungzui James le John-te in hih thu a muh uh ciangin, "Topa aw, amaute suksiat nadingin b[38] vantung panin meikuang sam le ung nong awi hiam?" ci-in a dong uh hi.

⁵⁵Ahi hangin Jesu kihei-in amaute tai-a,

⁵⁶tua ciangin amaute khua dang khatah a pai uh hi. c[39]

⁵⁷Amaute lampi-a a pai laitakun mi khat in ama kiangah, "Na paina peuhpeuh ah kong zui ding hi," a ci hi.

⁵⁸Jesu in, "Ngiate in kua nei uh a, van-a vasate in bu a nei uh hi; ahi hangin Mihing Tapa in a lutang ngak nading mun a nei kei hi," ci-in a dawng hi.

⁵⁹Amah in adang khat pa kiangah, "Kei hong zui in," a ci hi. Ahi hangin tuapa in, "Topa aw, va ciah photin, ka pa va vui masa ning," a ci hi.

⁶⁰Jesu in ama kiangah, "Misite in amau misite na vui uh hen. Ahi hangin nang pai inla Pasian-gam thu na tangko in," a ci hi.

⁶¹Adang khat leuleu in, "Topa nang hong zui ning, ahi hangin va ciah kik masa photin ka innkuanpihte mangpha va khak phot ning," a ci hi.

⁶²Jesu in, "Lokaihna tu lenkawma a nunglam en peuhmah Pasian-gam sunga nasem dingin cing zo lo hi," ci-in a dawng hi.