Read Zokam Thupiakkikna 1 Bible Online

Thupiakkikna 1 - Zokam bible

Thupiakkikna 1

¹Hihte in, Jordan nisuahna lam sehnel-gam - tua pen Arabah gam sung - Suph tawh kigalsai, Paran le Tophel, Laban Hazeroth le Dizahab kikal a Israel khempeuh tungah Moses in a gen kammalte ahi hi.

²(Seir Vum lam tawna pai-in Horeb pan Kadesh dong ni sawm le ni khat lam ahi hi).

³A kum sawmlina, kha sawm le khatna a ni masa pen ni-in Moses in Israel-te tungah amau tawh kisai-a TOPA in a thupiak khempeuh a tangko hi.

⁴Hih in Heshbon a mang Amor-te kumpipa Sihon le Ashtaroth a mang Bashan kumpipa Og Edrei a zawh khit ciang ahi hi.

⁵Jordan nisuahna-lam Moab gamgi ah Moses in hih thukham gensiang a kipan hi.

⁶Horeb ah TOPA eite Pasian in eite tungah, "Hih mual ah sawtvei na om khin ta uh hi.

⁷Giahphual panin dingkhia unla Amor-te gam mualtung lam manawh un; a gamveng mite ahi Arabah gam sung, mualtung gam, nitumna-lam mualbul, Negev le tuipi dung teng, Canaan mite gam le Lebanon dong, gun lianpi Euphrates ciang dong pai un.

⁸En un hih gam note kong pia khin hi. Lut unla TOPA in na pate uh - Abraham, Isaac le Jacob le amaute nunga a suante uh tungah piak dinga a khapsa gam va la un," hong ci hi.

⁹Tua hunin note tungah, "Kei guak puak dingin note na vangik lua uh hi.

¹⁰Tuni-in van-a aksi zah a tam dingin TOPA note Pasian in tampi hong phasak khin hi.

¹¹TOPA na pate uh Pasian in a zah tulkhatin hong khangsak henla, hong ciamsa bangin thupha hong pia hen!

¹²Ahi hangin na buainate uh, na vangikte uh le na kitotnate khempeuh uh kei guak in bangci puak zawh ding ka hi hiam?

¹³Na beh ciat panun a pil, thu theitel le a kizahtak mi pawlkhat teel un, note hong uk dingin amaute ka koih ding hi," kong ci hi.

¹⁴Note in, "Hih dinga nong gen hoih hi," ci-in nong dawng uh hi.

¹⁵Tua ciangin note beh makai, a pil a kizahtak mite ka la-a, note tungah thu neisak in - a tulte uk, a zate uk, a sawmngate uk le a sawmte uk le minam neute tunga ulian in ka koih hi.

¹⁶Tuateh tua huna na thukhente uh thu ka pia a: Na sanggamte uh kitotnate za unla Israel unau kikal thu ahi a, amau khatpeuh le mikhualte thu ahi zongin siangtakin thu khen un.

¹⁷Thukhenna ah guptuam paihtuam nei loin aneu alian a kibangin a thu uh ngaihsak un, Thukhenna Pasian aa ahi manin mi khatpeuh kihta kei un. Thu khatpeuh haksa lua na sak uh a om leh kei kiang hong tun un; ken ka khen ding hi.

¹⁸Tua hunin note hih ding peuhmah kong gen khin hi.

¹⁹Tua ciangin TOPA eite Pasian in hong thupiak bangin Horeb panin i paikhia-a, Amor-te mualtung gam lam manawhin na muhsa uh a zai le a lauhuai mahmah sehnel-gam i nawka, tua ciangin Kadesh Barnea i tung hi.

²⁰Tua ciangin note kiangah, "TOPA eite Pasian in ei hong piak ding Amor-te mualtung gam na tung khin uh hi.

²¹TOPA note Pasian in tua gam note hong pia khin hi. Pai to unla TOPA na pate uh Pasian hong gensa bangin la un. Lau kei unla lungkia kei un," kong ci hi.

²²Tua ciangin note khempeuh ka kiangah hong pai-in, "A gamsung thu omzia kankhia ding le i tot ding lampi le i tun nading khuate thu hong zasak kik dingin i mai-ah thukante sawl ni," nong ci uh hi.

²³Hih ngaihsutna hoih sa ka hi manin; beh khat pan in mi khat, mi sawm le nih ka teel hi.

²⁴Amaute kuanin mualtung gamah pai to uh a, Eshcol Kuam ah tungin va entel uh hi.

²⁵Amaute in tua gam singgah pawlkhat hong vom uh a, hong puasuakin, "TOPA eite Pasian in hong piakna gam, gam hoih khat ahi hi," ci-in hong zasak uh hi.

²⁶Tua hi napi note na pai to nuam kei uh a; TOPA note Pasian thupiak na lehdo uh hi.

²⁷Na puanbuk sunguah phunin, "TOPA in ei hong mudah hi; eite hong susia ding Amor-te khuta piak dingin Egypt panin hong paikhiatpih hi.

²⁸Koi ah pai thei ding i hi hiam? I sanggamte in hong lungmangsak uh hi. Amaute in, ‘Tua lai-a mite eite sangin sangzaw in hatzaw uh hi; a khuapi uh zai mahmah a, a khulhte un van ban hi. Anak-te nangawn ka mu uh hi,’ ci uh hi," a ci uh hi.

²⁹Tua ciangin note kiangah, "Kilauthawngsak kei un; amaute kihta kei un.

³⁰Note mai-ah TOPA note Pasian pai-in Egypt ah note ading hong hihsak bangin na mitmuh un

³¹sehnel gamah hong dosak ding hi. Tua lai-ah, hih mun na tun matengun na lampi tawntung uah pa in a tapa a puak bangin TOPA note Pasian in note hong puak lam na mu zo uh hi," kong ci hi.

³²Tua hi napi note in TOPA note Pasian na muang kei uh hi;

³³Amah note khualzinna lampi tawntung ah na giahphual sat nading mun uh zong ding leh na pai nading uh lampi hong lak dingin zanin mei, sun in meii in note mai-ah a pai hi.

³⁴TOPA in na kampau uh a zak ciangin heh in a lipkhaphuai takin kiciam a;

³⁵"Na pute uh tungah piak dinga ka ciamsa hih gam hoih pen, Jephunneh’ tapa Caleb longal hih a gilo khang mite khat beek in a mu kei ding hi.

³⁶Amah in a lungsim taktak tawh TOPA zui ahi manin amah le ama suante tungah a khe-a a siksa leitang ka pia dinga, amah in a mu ding hi," a ci hi.

³⁷Note hangin kei tungah zong TOPA heh a, "Nang zong tua gam ah na lut tuan kei ding hi.

³⁸Ahi hangin nang hong huhpa Nun’ tapa Joshua a lut ding hi. Amah hanthawn in, bang hang hiam cih leh amah in tua gam luah dingin Israel-te a makaih ding hi.

³⁹Tuateh galte in man ding hi, na cih uh naupang neute, - a sia le a pha a thei nai lo na ta neute uh - tua gamah a lut ding uh hi. Amaute ka pia dinga, amaute in tua gam a luah ding uh hi.

⁴⁰Note na hi uh leh, kinung leh hei unla Tuipi San a[1] lam zuatna sehnel gam lam zuan un," hong ci hi.

⁴¹Tua ciangin note in, "TOPA tungah ka mawh zo uh hi. Pai toin TOPA eite Pasian hong thupiak bangin do ni," na ci uh hi. Tua bangin mualtung gama paitoh a baih ding sa in na galhiam uh tawh na kithawi ciat uh hi.

⁴²Ahi hangin TOPA in, "Amaute kho in, ‘Note hong ompih lo ding ka hi manin kuan toin do kei un. Na galte uh na lel ding uh hi,’ ci in," hong ci hi.

⁴³Tua bangin kong gen hangin na ngai kei uh hi. Note in TOPA thupiak na lehdo uh a, na kiphatsakna-un mualtung gamah na kuanto uh hi.

⁴⁴Tua mualte-a teng Amor-te, note langah hong kuankhia uh a; Seir panin Hormah lampi dung tawntung ah khuaipi hon bangin hong delh uh a, hong sattuk uh hi.

⁴⁵Note lehtai-in TOPA mai-ah na kah uh hangin amah in note kahna thusim lo-a, na kahna uh a za kei hi.

⁴⁶Tua bangin Kadesh ah ni tampi na om uh a, - tua lai-ah na hun khempeuh uh na zang uh hi.