Read Zokam Thupiakkikna 10 Bible Online

Thupiakkikna 10 - Zokam bible

Thupiakkikna 10

¹Tua hun laitakin TOPA in kei kiangah, "A masa pen tawh a kibang suangpek nih khuakkhia inla mualtung ka kiangah hong pai to in. Singkuang to b[19] khat zong lem in.

²Keimah in suangpekte tungah, na suktapsa a masa pen suangpekte tunga thute mah ka gelh ding hi. Tua ciangin singkuang sungah koih in," hong ci hi.

³Tua ciangin singkha singkuang khat ka bawla, a masa pen tawh a kibang suangpek nih khuakkhia in suangpek nihte tawisa in mual tungah ka paito hi.

⁴TOPA in ama-a, a gelhsa mualtunga mipite na kikhop ni-ua meikuang lakah no tunga a tangkosa Thupiak Sawmte mah hih suangpekte tungah a gelh hi. TOPA in tuate kei hong pia hi.

⁵Tua ciangin mualtung pan kong ciahsuk-a, TOPA hong thupiaksa bangin ka bawlsa singkuang sungah suangpekte ka koih hi; tu-in tuate tuaci om lai hi.

⁶(Jaakan-te tuikhukte panin Moserah ah Israel-te a zin uh hi. Tua lai-ah Aaron si-a kivui-in a tapa Eleazar in a siampi za a luah hi.

⁷Tua lai panin Gudgodah ah zin uh a, luitui omna gam Jotbathah dong a zinsuak uh hi.

⁸Tua hun laitakin TOPA in, Levi behte in tuni donga a sep uh bangin TOPA thukhun singkuang pua ding, TOPA mai-ah dingin biakna nasem ding le ama mina thupha a pia dingin amaute a sehtuam hi.

⁹Tua hangin Levi-te in amau sanggamte lakah tanh ahi-a luah ahi zongin nei lo uh a; TOPA note Pasian hong gensa bangin amaute’ luah in TOPA ahi hi.)

¹⁰Tu-in a masa a ka hih bangin, mualtungah sun sawmli le zan sawmli ka om khin a, hih hunin zong TOPA in ka thu hong ngai hi. Note suksiat ding ama deihna hi lo hi.

¹¹TOPA in kei kiangah, "Pai inla a maute piak dinga a pate uh tunga ka khapsa gamah luta a lak nadingun lampi ah amaute makaih in," hong ci hi.

¹²Israel aw, tu-in ahileh TOPA note Pasian in note tungah bangdang hong ngen loin: TOPA note Pasian kihta a, ama lampite zui-in amah it a, na lungsim khempeuh uh le na hinna khempeuh uh tawh TOPA note Pasian na sem-a,

¹³note hoih nadingin tuni-a note kong piak TOPA thupiakte le thukipte na zuih ding bek uh hi lo ahi hiam?

¹⁴Vante le a sang pen vante nangawn, leitung le a sunga omte khempeuh TOPA note Pasian aa ahi hi.

¹⁵Tua hi napi TOPA in na pute uh aituam bawlin amaute it a, tuni-a na om bangun minamte khempeuh tung pekah amau suan note hong teel hi.

¹⁶Tua ahi ciangin na lungsim uh vun-at unla na ngawng uh khauhsak nawn kei un.

¹⁷Ahang in, TOPA note Pasian ahileh pasiante’ Pasian, topate’ Topa, thahatin a kihtakhuai, kuamah deidan a nei lo, golhsum a sang lo a lian mahmah Pasian ahi hi.

¹⁸Amah in pa neilote le meigongte panpihin, pemtate it a, an pia in puansilh a guan hi.

¹⁹Tua hi a note zong Egypt a pemta hi ngei na hi manun pemtate na it ding uh hi.

²⁰TOPA note Pasian kihta unla a na sem un. Amah kiplet unla ama minin kiciam un.

²¹Amah pen note’ phat, na mit uh tawh na muh uh a lian a kihtakhuai a lamdang nate a bawl, note Pasian ahi hi.

²²Egypt a, paisuk na pute uh a vekin sawm sagih pha hi, tua hi-a tu-in TOPA note Pasian in vana aksi zahin hong tamsak khin hi.