Read Zokam Thupiakkikna 12 Bible Online

Thupiakkikna 12 - Zokam bible

Thupiakkikna 12

¹Hihte in TOPA na pate uh Pasian in na neih dingun hong piakna gamah - na nuntak sung tengun kidawmtaka na zuih pelmawh dingun hong piak thukipte le thukhamte ahi hi.

²Na suankhiat ding uh minamte in a biak uh pasiante omna mun, mualdawn sangte, mualneute le singhiangpha nuaite khempeuh na susiamang ding uh hi.

³A biakna-taute uh phelkhia in, a suang siangthote uh dengzan in, Asherah khuamte mei-in haltum un; amau pasian limte phukpai unla tua muna a minte uh phiatkhia un.

⁴Amau biak bangin TOPA note Pasian na bia kei ding uh hi.

⁵Ahi hangin TOPA note Pasian in na beh khempeuh uh lakah ama Min koihin a ten nadingin a teelna mun na zong ding uh hi. Tua munah pel loin na pai ding uh a;

⁶tua lai-ah meihal biakna le biakpiaknate, sawma khatte le citpiakte, piak dinga na kam ciamsate uh le utthu-a biaknate , bawnghonte le tuuhonte tacilte na puak ding uh hi.

⁷TOPA note Pasian in note thupha hong piakhin ahi manin no khut tunga piang peuhmah TOPA note Pasian omna mun tua lai-ah na innkuanun na ne ding uh a, nuam na sa ding uh hi.

⁸TOPA note Pasian in note luah dinga hong piakna mun le khawlmun tung nai lo na hi manun

⁹tuni-in hih lai-ah i gamtat bangin ama hoihsak bangin kuamah a gamta kei ding hi.

¹⁰Ahi hangin Jordan na kantan ding uh a, TOPA note Pasian in na luah dingun hong piakna gamah na teng ding uh hi; tua ciangin amah in lungmuangtaka na ten theih nadingun na kim na pam-ua galte panin note hong tawlngasak ding hi.

¹¹Tua ciangin TOPA note Pasian in ama Min a ten nading mun teel dinga - tua lai-ah note kong thupiakte: na meihal biaknate uh biakpiaknate, na sawma khatte uh le citpiakte, le TOPA tunga na kamciamsa uh na neihsa uh a hoih pente khempeuh na puak ding uh hi.

¹²Tuateh nang le na tanute na tapate un, na nasemnute na nasempate le amau adingin tanh le luah a nei lo note khua sunga Levi-te tawh TOPA note Pasian mai tua lai munah nuam na sa khawm ding uh hi.

¹³Note lungkimna mun peuhpeuh ah na meihal biakna uh na piak khak ding uh kidawm un.

¹⁴Na beh sung panun TOPA in a teel nading mun bekah tuate pia unla, kong thupiak na khempeuh tua lai-ah hih un.

¹⁵Bangbang ahi zongin khuapi sung mun khat peuhpeuh ah na ganhingte uh goin, sazuk le sanang sa nek bangin TOPA note Pasian in thupha hong piakna tawh kizui-in na duh zahzah uh na ne thei ding uh hi. Thukham hanga ninte le a siangte in a ne thei tuak ding hi.

¹⁶Ahi hangin a sisan na ne peuhmah kei ding uh a; lei lakah tui bangin bua un.

¹⁷Note in na an uh sawma khat ahi a, na zuthak uh le na sathau uh ahi zongin na bawnghon na tuuhonte uh tacilte ahi a, piak dinga na kamciamsate uh ahi zongin utthu-a biakna na piakte uh le na citpiakte uh, no khuapi sungah na ne peuhmah kei ding uh hi.

¹⁸Tua sangsikin TOPA note Pasian in a teel nading mun, TOPA note Pasian mai-ah - note, na tanute na tapate, na nasemnute na nasempate le no khua sunga Levi-te tawh ne-in - no khuta piang na peuhmah TOPA note Pasian mai-ah nuam na sa ding uh hi.

¹⁹Na gam-uah na ten laisiah uh Levi-te na thusimloh khak ding uh kidawm un.

²⁰TOPA note Pasian in note hong ciamsa bangin na gam uh hong keksakin sa na duh luat uh leh, "Sa ka duh uh hi," ci le uh cin na duh zahzah uh na ne ding uh hi.

²¹Note omna panin TOPA note Pasian in a Min koih nadinga a teelna mun a gamlat luat leh TOPA hong piaksa bawnghon le tuuhon panin na go thei ding uh a, na omna khuapi sungah tuate laka na duh zahzah na ne thei ding uh hi.

²²Sanang le sazuk sa nekin ne lel un. Thukham in a nitsakte le a siangte in ne thei tuak ding uh hi.

²³Ahi hangin sisan pen nuntakna ahi manin a sisan na nek loh ding uh tel un, tuateh a nuntakna a sa tawh na ne peuhmah kei ding uh hi.

²⁴A sisan ne peuhmah kei un; tui bangin lei lakah buakhia un.

²⁵No le no khita na tate uh aa in a hoih theih nadingin tuate ne kei un; bang hang hiam cih leh TOPA muhna ah a maan a gamta na suak ding uh hi.

²⁶Ahi hangin na apsa uh nate le piak dinga na kamciamsa peuhmah uh la unla TOPA in a teel nading munah paipih un.

²⁷TOPA note Pasian biakna-tau ah na meihal biaknate uh a sisan le a sa piakhawm un. Na biakpiakna uh sisante TOPA note Pasian biakna-tau pangah kisung pelmawh dinga, a sa na ne thei ding uh hi.

²⁸No le no khita na tate uh aa in a hoih tawntung dingin hih no kong piak ngeinate khempeuh limtakin mang un, bang hang hiam cih leh TOPA note Pasian muhna ah a hoih a maana gamta na suak ding uh hi.

²⁹Note in sima na suankhiat ding uh minamte note mai-ah TOPA note Pasian in hong sukmangsak ding hi. Ahi hangin amaute nawhkhia-a, amau gamah na ten uh ciang

³⁰le note mai-ah amaute a kisuksiat khit ciangin a pasiante uh thu kana nomau kithangsiah in, "Hih minamte in a pasiante uh na bangci sep uh hiam? Ei zong hih sam dih ni," na cih khak ding uh kidawm un.

³¹Amaute biak bangin TOPA note Pasian na bia peuhmah kei ding uh hi; bang hang hiam cih leh amau pasiante biakna ah TOPA deih loh a kihhuai na namkim a hih uh hi. Amau pasiante tungah biakpiakna-in a tanute a tapate nangawn uh mei-in a hal uh hi.

³²Kong thupiak khempeuh sem un; behlap kei unla lah khiam kei un.