Read Zokam Thupiakkikna 13 Bible Online

Thupiakkikna 13 - Zokam bible

Thupiakkikna 13

¹Note lakah kamsang ahi a, mang mana thu magen khat ahi zongin hong kilanga, a piandang lim le a lamdang hong lakin

²tuateh a gensa lim le a lamdangte hong tuna, "Adang pasiante zui-in (na theih ngei loh pasiante) tuate bia ni," a cih leh

³tua kamsangpa ahikeh mang-manpa thu na ngai peuhmah kei ding uh hi. TOPA note Pasian in na lungsim khempeuh uh le na hinna khempeuh un amah na it uh hiam, cih a muhkhiat nadingin hong zia-et ahi hi.

⁴Na zuih pelmawh ding uh le na zahtak pelmawh ding uh TOPA note Pasian ahi hi. Ama thupiakte zui-in mang unla; ama na semin amah lenkip un.

⁵Tua kamsangpa ahikeh mangmanpa kithat pelmawh ding hi, bang hang hiam cih leh amah in Egypt gama hong pai khiatpih na sal suahna uh gam pana hong tankhia TOPA note Pasian langdo in thu a hilh hi; amah in zuih dinga TOPA note Pasian in hong thupiak lampi pan note heikhiat ding a hanciam ahi hi. No laka gitlohna na siaksiang pelmawh ding uh hi.

⁶Na sanggampa tektek, na tanu na tapa tektek, na it na zi tektek le na kithuahpih na lawmpa tektek in hong zolsimin, "Va pai-in pasian dangte va bia ni," (nang na hi-a, na pate ahi zongin a theih ngei loh pasiante,

⁷na kim na pam uh a nai a gamla, lei mong khat pan mong khata om pasiante)

⁸hong cih leh mang loin a thugen zong ngai kei un. Hehpih kei un. Amah hawi loin zong dal kei un.

⁹Amah pel loin thah ding ahi hi. Nang in amah na that masa dinga, tua khit ciangin mi khempeuh hi pan ding hi.

¹⁰Amah suangin denglum un, bang hang hiam cih leh amah in note salsuahna Egypt gam pana hong paikhiatpih TOPA note Pasian panin pialsak ding a hanciam ahi hi.

¹¹Tua ciangin Israel khempeuh in za in lau ding uh a, no lakah kuamah in tua bang gitlohna a bawl nawn kei ding hi.

¹²TOPA note Pasian in na ten nadingun hong piak khuapite khatpeuh ah

¹³note lakah tua bang migilo khangin amau khuapi sungah mite lam khialh nadingin, "Eite pai-in pasian dangte va bia ni," (na theih ngei loh uh pasiante) ci-a a makaih khialh lam na zak uh leh

¹⁴pel loin a thu kan unla sittelin siangtakin a thu kantel un. Tua thu a maan hi a, note lakah hih a kihhuai na a kisem khin takpi ahileh

¹⁵tua khua-a teng mi khempeuh namsau in na that taktak ding uh hi. A mite le a ganhingte susia khawm kiuhkeuh a[23] un.

¹⁶Note in a vante uh lawkin khua laizang tual-awng ah na khawm ding uh a, a khuapi le a sunga van khempeuh TOPA note Pasian tungah meihal biakna bangin a bupin haltum kiuhkeuh un. Tua mun a siasa in om den dinga a kilam kik ngei nawn kei ding hi.

¹⁷TOPA hehluatna a dam kik nadingin tua a kikoihdak nate b[24] note khut sungah khat beek a kimu kei ding hi; tua hileh amah in na pute uh tungah kiciamin a khap bangin note hong lainatin hong khuatuah dinga, hong pungsak ding hi,

¹⁸bang hang hiam cih leh note in TOPA note Pasian thu na mang uh a, tuni-a kong piak ama thupiakte khempeuh zui-in ama mitmuh ah thumaanin na gamta uh hi.