Read Zokam Thupiakkikna 14 Bible Online

Thupiakkikna 14 - Zokam bible

Thupiakkikna 14

¹Note in TOPA note Pasian tate na hi uh hi. Misi hangin no le no kikuikek kei unla, na talsam uh zong met kei un,

²ahang in, note in TOPA note Pasian misiangtho na hi uh hi. Lei maitang tunga om mi khempeuh lak paninTOPA in a gou neih manpha dingin note hong teel hi.

³A kihhuai na khatpeuh ne kei un.

⁴Na nek theih ding uh ganhing hihte ahi hi: bawng, tuu, keel,

⁵sazuk, sanang, zukzil, sathak, saza, zuksial le gamtuu c[25] ahi hi.

⁶Note in a khecin niha ka eknel hai ganhing peuhmah na ne thei ding uh hi.

⁷Ahi zongin a khecin ka in eknel hai taleh kala-oh, bilpi ahikeh gam bilpi d[26] na ne kei ding uh hi. Tuate in eknel a hai uh hangin a khecin uh ka lo a; no adingin thukham in a ninsak hi.

⁸Vok in zong khecin ka a neih hangin eknel hai lo ahi manin a nin ahi hi. A sa lah ne loin a sisa zong na lawng kei ding uh hi.

⁹Tui sunga nungta ganhing, lip le phe a nei khempeuh na ne thei ding uh hi.

¹⁰Ahi hangin lip le phe a nei lo peuhmah na ne kei ding uh hi; tuate anin ahi hi.

¹¹Vasa, a siang peuhmah na ne thei ding uh hi.

¹²Ahi hangin na nek loh dingte uh: muvanlai, musane, lui mu,

¹³mupi, mumeika, musi nam peuhmah,

¹⁴va-ak nam peuhmah,

¹⁵simbutal, chikchili, vakang, pengpelep nam peuhmah

¹⁶keising, simbupi, simbukang

¹⁷sehnel-gam simbu, tui mu, tui vatawt,

¹⁸gun vakang, vasa zo nei nam peuhmah huihtun le bak-te ahi hi.

¹⁹A lengthei a hon om insects khempeuh no adingin anin ahi hi; tuate ne kei un.

²⁰Ahi hangin kha nei ganhing a siang peuhmah na ne thei ding uh hi.

²¹A sisa a na muh peuhmah uh ne kei un. Na khua sungua teng pemtate na pia thei ding uh a, amaute in a ne thei ding uh hi; gamdang mite tungah zong na zuak thei ding uh hi. No na hi uh leh TOPA note Pasian misiangtho na hi uh hi. A pi nawizu-in keelno huan kei un.

²²Kum simin na lo panun a piang khempeuh panin sawm ah khat tuam koih tangtang un.

²³TOPA note Pasian na zahtak den nading uh na theih na’ngun, na an uh, na zuthak uh, na sathau uh sawma khat le na tuuhon na bawnghonte uh tacilte, ama Min a ten nadinga a teel nading mun a TOPA note Pasian mai-ah ne un.

²⁴Ahi zongin tua mun gamla lua a, TOPA note Pasian inlah thupha hong piak khita, na sawma khat na puak zawh kei leh (TOPA in a Min a koih nadingin a teelna mun a gamlat luatna hangin)

²⁵tua ciangin na sawma khat ngun tawh khek unla tua ngun tawi-in TOPA note Pasian in a teel nading munah va paipih un.

²⁶Tua nguntang: bawng, tuu, zu ahi a dawn dinga kibilh khatpeuh ahi zongin na ut peuhpeuh leina in zang un. Tua ciangin nang le na innkuanpihte in TOPA note Pasian omna ah ne-in nuam na sa ding uh hi.

²⁷Tuateh na khua sungua teng Levi-te in tanh ding le luah ding nei lo uh ahi manin phawk loin om kei un.

²⁸Kum thum a cin simin tua kuma piang sawma khat khempeuh puak unla na khua sunguah khol un;

²⁹tua in na khua sungua teng Levi-te (amau neihsa tanh le luah a nei lote) le pemtate pa nei lote, meigongte hong pai-in ne-a a kham theih nading uh leh na khut uh tawh na sepsa khempeuh uh TOPA note Pasian in thupha hong piak theih nading ahi hi.