Read Zokam Thupiakkikna 15 Bible Online

Thupiakkikna 15 - Zokam bible

Thupiakkikna 15

¹Kum sagih a cin simin leiba na maisak pelmawh ding uh hi.

²A hih zia ding hih bang ahi hi: Mi a leitawisakte peuhmah in a mipih Israel-te leitawisa teng a maisak ding hi. TOPA in leiba maisak nadinga a seh hun kitangko khin ahi manin a mipih Israel-te ahi-a, a sanggampa ahi zongin a piak dingin a sik nawn kei ding hi.

³Gamdang mite tungah na sik thei ding uh a ahi hangin na sangampa in nang tunga hong bat leiba peuhmah na maisak pelmawh ding hi.

⁴Ahi ta zongin TOPA note Pasian in luaha na neih nadingun hong piaksa gamah thupha tampitak hong pia ding ahi manin, note lakah a zawng a om kei ding hi.

⁵Tua pen TOPA note Pasian ama thu hoih takin mang-a, tuni-a kong piak thupiakte khempeuh limtaka na zuih uh leh cihna ahi hi.

⁶Ahang in TOPA note Pasian in hong ciamsa bangin thupha hong pia dinga, minam tampite sum leitawisakin note in kuama tungpan sum na leitawi kei ding uh hi. Minam tampi na uk ding uh a, kuamah in no hong uk kei ding hi.

⁷TOPA note Pasian hong piak ding gama khuapite a, na sang gamte uh lakah mizawng khatpeuh a om leh na sanggampa uh tungah na lungsim uh khauhsakin hum tentan kei un.

⁸Tua sangsikin ama kisap bangbang leitawi lel un.

⁹Hih gitloh ngaihsutna ngaihsun in, "A kum sagihna leiba maisak ding kum nai ta," ci-in a tasam na sanggampa midang bawlin bangmah na piak loh khak ding kidawm un. Na tua cihleh TOPA tungah nang hong khia thei dinga mawhna bawl na suak ding hi.

¹⁰Ama tungah cingh in pia ziahziah inla lungsit pi-in pia kei in; tua hangin TOPA note Pasian in na sepna khempeuh le na khut suak peuhmah ah nang thupha hong pia ding hi.

¹¹Tua gamah mizawng a om den ding hi. Tua ahi ciangin na gamua na sanggamte uh le mizawng le a tasamte tungah na cingh un, ci-in thu kong pia hi.

¹²Na Hebrew mipihte numei ahi a pasal ahi zongin hong kizuak-a, kum guk sung na a sep khit leh a kum sagihna kumin khahkhia-in na suaktasak ding hi.

¹³Tuateh amah na khah ciangin khuthawm guakin paikhiasak kei in.

¹⁴Na tuuhon pan, na ancilna le na lengtui-sukna panin tampitak tawh huh in. TOPA note Pasian hong piak thupha tawh kizui-in amah pia in.

¹⁵Note zong Egypt ah sila hi-in TOPA note Pasian in hong tatkhiat ahilam phawk un. Tua hangin hih thupiak no kong pia hi.

¹⁶Ahi hangin na nasempa un nang le na innkuanpihte a it man le ama adingin hoih sazaw a, "Hong nusia nuam ke’ng," a cih leh

¹⁷tua ciangin siktul khat la-in, kongkhak sunglam ah a bil vuhsak in, tuateh amah a khantawnin na nasem a suak ding hi. Na nasemnu zong tua tawh a kibangin hih in.

¹⁸Na nasempa khah ding haksa ngaihsut kei in, bang hang hiam cih leh a kicialte thaman zah nihin kum guk sung na a sem khin zo hi. Tua hileh TOPA note Pasian in na sepna peuhpeuh ah thupha hong pia ding hi.

¹⁹Na bawnghonte le na tuuhonte ah apa a piang masa peuhmah TOPA note Pasian adingin khenkhia un. Bawng pa a piang masa pen nasem dingin koih kei unla na tuu tacilte uh a mul met kei un.

²⁰Nang le na innkuanpihte in kum simin TOPA note Pasian in a teel nading munah na nek ding uh ahi hi.

²¹Ganhing in poina nei-a, a mittaw, a khebai ahikeh nasia a liamsa ahileh TOPA note Pasian tungah biakpiakna-in na nei peuhmah kei ding hi.

²²Na khua sunguah na ne ding uh hi. Thukham hanga ninte le a siangte in sazuk le sanang sa nek bangin a ne thei tuak ding uh hi.

²³Ahi hangin a sisan na ne peuhmah kei ding uh hi; leilakah tui bangin buakhia un.