Read Zokam Thupiakkikna 18 Bible Online

Thupiakkikna 18 - Zokam bible

Thupiakkikna 18

¹Levi-te ahi siampite - Levi beh’ buppi in - Israel tawh tanh ahi a luah ahi zongin a nei peuhmah kei hi. TOPA tungah mei-a hal biakna dingin a kipiate in a kivak ding uh hi; amau luah tua ahi hi.

²Amau sanggamte lakah luah nei lo uh a; amau tungah a ciamsa bangin amau luah in TOPA ahi hi.

³Bawngtal ahikeh tuu in mite in biakna a piak ciangin siampite kaih: aliang, apangte gel le a sungkua ahi hi.

⁴Note in amaute tungah na an uh gahmasate, na zuthakte uh na sathau uh le na met masak uh tuumul na pia ding uh hi;

⁵ahang in, na behte khempeuh panun TOPA mina dingin nasem niloh dinga TOPA note Pasian in amaute le amaute suante a teelsa ahi hi.

⁶Levi-te khat Israel gam mun khata khuapi khatpeuh-a a tenna panin lal a, TOPA in a teel nading munah thumaantaka a va tun leh

⁷TOPA omna tua lai-a a mipih Levi-te khempeuh tawh a kibangin TOPA ama Pasian minin na sem thei ding hi.

⁸Amah in a innkuan van neihte zuakin sum a ngah khin zongin amaute kaih bangbang a ngah ding hi.

⁹TOPA note Pasian in hong piak ding gamah na lut uh ciangin tua lai-a minamte hih a kihhuai nate cing kei un.

¹⁰No lakah biakna-in a tanu ahi-a a tapa ahi zongin mei sungah b[29] a khul, aisan, khongkhai, mangsan, aitawi,

¹¹mibum a zang, sikha hopih, vankah le misi thu dong khat beek omsak kei un.

¹²Hihte a hih peuhmah TOPA in kih a, hih a kihhuaite a sep manun TOPA note Pasian in tua minamte na mai panun a nawhkhiat ding ahi hi.

¹³Note na hi uh leh TOPA note Pasian mai-ah na paubaang kei ding uh hi.

¹⁴Na suankhiat ding uh minamte in aisanin khongkhai uh hi. Ahi hangin TOPA note Pasian in tua banga na sep ding uh hong phal lo hi.

¹⁵TOPA note Pasian in nomau sanggamte lak panin no ading kei bang khat kamsang hong khangsak ding hi. Ama thu na ngai pelmawh un.

¹⁶Horeb ah mipi na kikhop ni-un, "TOPA eite Pasian aw hong zasak loin a meikuang lianpi zong hong musak nawn kei un, ka si kha ding uh hi," na cih ni-un TOPA note Pasian tunga na nget uh hih mah ahi hi.

¹⁷TOPA in, "Amaute gen a hoih hi.

¹⁸Amau sanggamte sung panin amau ading nang tawh a kibang kamsang khat ka khangsak dinga; a kam ah ka thute guanin amah ka thupiak peuhmah amaute tungah a gen ding hi.

¹⁹Kamsangpa in ka thu gente kei mina a gen, a sang lo peuhmah kei mahmah in amah samin ka mawhsak ding hi.

²⁰Ahi hangin kamsang khat in kei thupiak lohpi-in kei minin thu khatpeuh a gena, ahikeh kam sangin adang pasiante minin thu a gen leh kithat pelmawh ding hi," a ci hi.

²¹Nang le nang in, "TOPA gen loh thupuak bangci theih ding i hi hiam?" na ci thei hi.

²²Kamsang khat in TOPA thu genin a tun kei-a, a maan kei leh TOPA gen hi lo hi. Tua kamsangpa thu sansat ahi hi. Amah kihta kei un.