Read Zokam Thupiakkikna 19 Bible Online

Thupiakkikna 19 - Zokam bible

Thupiakkikna 19

¹TOPA note Pasian in a gam uh note hong piak minamte a suksiat khit, amaute hawlkhia-in amau khuate le innte ah na ten uh ciangin

²note in na neih dingun TOPA note Pasian in hong piak ding gam laizang ah khuapi thum na sehkhia tuam ding uh hi.

³TOPA note Pasian in na luah dingun hong piak ding gam sehthum suah unla, mi thatte peuhmah khuapi ah a tai theih nadingin lampi sialin tua khuate ah tungsak un.

⁴Midang khat a that - sawmkhol lo le kilungnoplohna om ngei lopi-a a vengpa a that kha, tua khuapi-a a taite tawh kisai ngeina hih ahi hi:

⁵Gentehna-in, mi khat a vengpa tawh singphuk dingin tulakah kuan a, singphukin a hei a vik ciangin a heitang kikhongin a vengpa kha-in si hi. Tua mipa hih khuapite khat peuhpeuh ah tai-in a nuntakna hu thei hi.

⁶Tua hi kei leh amah in kilungsim neihna nei loin sawm khol lopi-a a vengpa a hihkhak hi-a, amah a sihsak huai lo hi napi, a sisan phu a la nuampa heh lua-in amah nungdelha, a kikal a gamlat-luatna hangin pha-in that kha thei ding hi.

⁷Hih thu hangin khuapi thum na sehtuam dingun thu kong pia hi.

⁸TOPA note Pasian in na pute uh tungah kiciamin a gambuppi amau tungah piak dingin a khap bangin na gam uh hong keksak leh

⁹tuni-a kong piak thukhamte khempeuh limtakin zui a, TOPA note Pasian itin ama lampi na zuih tawntungna uh hang ahi manin - tua khuapite banah a dang khuapi thum mah na sehkhia lai ding uh hi.

¹⁰TOPA note Pasian in na luah dingun hong piak gamah mawhpengte sisan a kiluansak khak loh nading le sisan suahsakna hanga na mawh khak loh nadingun hih banga na hih ding uh ahi hi.

¹¹Ahi hangin mi khat in a vengpa mudah a, amah pangsimin bawhin that-a, tua ciangin hih khuapi thumte ah a tai leh

¹²ama khua sung upate in khuapi panin amah puak kik ding uh a, a si dingin a sisanphu a la nuampa tungah a ap ding uh hi.

¹³Amah a kihehpih kei ding hi. Note aa in ahoih theih nadingin Israel panin mawhpeng sisan luansakna na beimangsak pelmawh ding uh hi.

¹⁴TOPA note Pasian in na neih dingun hong piak nading gamah, nang luah dinga na ngahna-ah no ma-a omsate phuhsa na vengte uh kigisuang khin kei un.

¹⁵Mi khatpeuh mawhsak nading ahikeh khialhsak nadingin teci khat bek kicing lo hi. Teci nih ahikeh thum genna tawh a thu, thukho in kisang pan ding hi.

¹⁶Mi khat in elna tawh mi khat gamtakhialin mawh hi, ci-a teci a pan leh

¹⁷a kitawng mi nihte siampite le tua huna zum ngak thukhente mai TOPA omna ah ding pelmawh ding uh hi.

¹⁸Thukhente in kiciantakin thu khen ding uh a, tecipa a zuau a hina a kitel-a, a sanggampa langah zuau teci pang ahileh

¹⁹a sanggampa tunga hih a sawm bangbangin amah mawh khusak un. Note lak panin gitlohna na beimangsak pelmawh ding uh hi.

²⁰Midangte khempeuh in hih thu za-in lau ding uh a, note lakah tua bang gitlohna a kihih ngei nawn kei ding hi.

²¹Hehpih loin: nuntakna tangin nuntakna, mit tangin mit, ha tangin ha, khut tangin khut, khe tangin khe hi ding hi.