Read Zokam Thupiakkikna 2 Bible Online

Thupiakkikna 2 - Zokam bible

Thupiakkikna 2

¹Tua ciangin TOPA in kei hong lah bangin Tuipi San b[2] zuatna lampi zui-in sehnel-gam lam manawhin i kileh kik hi. Sawtveipi tak Seir mualtung gam kimkotin i pai hi.

²Tua ciangin TOPA in kei kiangah,

³"Hih mualtung gam kimkot ah sawtvei khop na pai ta uh hi; tu-in leilu lamah kihei un.

⁴Mite hih bangin thu pia in: ‘Note in Seir a teng Esau suan na sanggamte uh gamgi na nawk ding uh hi. Amaute in note hong kihta ding uh hi; ahi hangin kidawm mahmah un.

⁵Kigalneih kha kei un, ahang in, amaute gam khat beek hong pia loin, na khepek tatkhopna nangawn uh kong pia kei ding hi. Esau in a neih dingin Seir mualtung gam teng ka piaksa ahi hi.

⁶Na nek ding uh an le na dawn ding uh tui ngunin na lei ding uh hi,’ ci in," hong ci hi.

⁷TOPA note Pasian in na khutua na septe uh thupha a pia hi. Hih sehnel-gam zapi a na zin sungun amah in hong cing hi. Hih kum sawmli sung TOPA note Pasian in hong ompih a, bangmah na kisam kei uh hi.

⁸Tuaci in Seir a teng i sanggampa Esau suante i nawksuak thei hi. Elath le Ezion Geber pana pai to Arabah lampi panin i kileh a, Moab zuatna sehnel gam lampi dung zui-in i pai hi.

⁹Tua ciangin TOPA in kei kiangah, "Moab-te gam khenkhat zong hong pia lo ding ka hi manin amaute va tawng loin hehsak kei un. Lot suante neih dingin Ar ka pia zo hi," hong ci hi.

¹⁰(Anak-te tana a tun sang, amaute zaha thahat le a tam - Em-te tua lai-ah teng ngei uh hi.

¹¹Anak-te bangin amaute zong Rephaim-te in kingaihsun-a, ahi hangin Moab-te in amaute Em-te a ci uh hi.

¹²Hor-te zong Seir ah teng ngei uh a, ahi hangin Esau suante in a suankhia uh hi. TOPA in a piaksa gama Israel-te -a hih bang tektekun, amau mai-a om Hor-te susia in amau munah a teng uh hi.)

¹³Tua ciangin TOPA in, "Tu-in kithawi unla Zered Kuam kantan un," hong ci hi. Tua ciangin ei zong tua kuam i kantan hi.

¹⁴Kadesh Barnea i nusiat huna kipan Zered Kuam i kantan dong kum sawmthum le giat pha ta hi. Tua hun ciangin amaute tungah TOPA a kiciamsa bangin galdo thei mite suan le khakte khempeuh giahphual ah a mangthang uh hi.

¹⁵Amaute giah-phual panin a siaksiang dongin amaute langah TOPA khut a pang hi.

¹⁶Mite lakah galdo thei teng a sih khit kiuhkeuh ciangin,

¹⁷"TOPA in kei kiangah,

¹⁸"Tuni-in Ar a Moab kual kantan un.

¹⁹Ammon-te omna na tun uh ciangin Ammon-te tawh kisai leitang khat beek no neih dingin hong pia lo ding ka hi manin amaute lausakin, galbawlin hehsak kei un. Lot suante neih dingin tua gam ka pia khin hi," hong ci hi.

²⁰(Tua zong, tua lai-a teng Rephaim-te gamin kingaihsun hi; ahi hangin Ammon-te in amaute Zamzum-te ci uh hi.

²¹Amaute thahatin tam mahmah uh a, Anak-te bangin a tun uh a sang hi. TOPA in Ammon-te mai panin maute susia a, amaute in suankhia-in amau munah a teng uh hi.

²²TOPA in Seir-te tungah Esau suante adingin a hih bangin hih a, amaute mai panin Hor-te a susia hi. Esau suante in amaute suankhia in amaute munah tuni dong a teng uh hi.

²³Gaza ciang dong khuaneute-a teng Avvi-te ahileh Caphtor a[3] pana paikhia Caphtor-te in susia uh a amaute munah a teng uh hi.

²⁴"Tu-in kuankhia unla Arnon Guam kantan un. En un, Heshbon kumpipa Amor-te Sihon le ama gam note khut sungah kong pia khin hi. Tua gam no neihsa dingin lak kipan unla amah va sim un.

²⁵Tuni mahmah in keimah in van kikhupsin nuai-a minam khempeuh linglawng-sakin note kong kihtasak ding hi. Amaute in note thu za ding uh a, ling in note hangin gimna a thuak ding uh hi," hong ci hi.

²⁶Kedemoth sehnel-gam panin Heshbon kumpipa Sihon kiangah, kilemna thu gen dingin kamtai ka paisak a,

²⁷"Kote na gam hong kantansak in, lam lianpi tung bekah ka om ding uh hi; veilam le taklam ah ka pial kei ding uh hi.

²⁸Kote an le tui hong zuak unla, a man zahzah nguntangin hong leisak un.

²⁹Seir a teng Esau suante le Ar a teng Moab-te in kote hong kantansak bangin - Jordan kantan a TOPA kote Pasian hong piakna gam ka tun matengun - kote hong kantansak tapeuh un," ka cisak hi.

³⁰Ahi hangin Heshbon kumpipa Sihon in hong kantansak nuam lo hi. Ahang in, TOPAnote Pasian in tua a sepsa bangin note khut sungah amah hong piak nadingin ama lungsim khauhsakin a lungtang a genhaksak hi.

³¹TOPA in kei tungah Sihon le ama gam note piak kong sawm ta hi. Tu-in suankhia unla ama gam la un," hong ci hi.

³²Sihon le a galkapte khempeuh eite sim dingin Jahaz ah a kuan ciangin

³³TOPA eite Pasian in amah hong pia-a, amah le a tapate le a galkap buppi i zo hi.

³⁴Tua hunin a khuapi khempeuh uh i la-a - numei naupang papi le na khempeuh i susia b[4] khin kiuhkeuh hi. Kuamah i hingkhawi kei hi.

³⁵Ahi hangin ganhingte le i zawhna khuapite a vanlakte ei adingin i puakhia hi.

³⁶Arnon Kuam kho-a kipan le tua guam sunga om khuapite pan Gilead ciang nangawn khuapi khat beek in eite hong nang zo lo hi. TOPA eite Pasian in amaute khempeuh ei hong pia hi.

³⁷Ahi hangin TOPA eite Pasian hong thupiakna mah bangin Ammon-te gam ahi a Jabbok gundung suksuk ahi zongin, mualtung kimkot a khuapite ahi zongin na va tuh kei uh hi.