Read Zokam Thupiakkikna 20 Bible Online

Thupiakkikna 20 - Zokam bible

Thupiakkikna 20

¹Na galte uh sim dingin kuana, note sangin a lianzaw galte, sakolte le lengte na muh uh ciangin lau kei un, bang hang hiam cih leh Egypt pana hong paikhiatpih to TOPA note Pasian in hong ompih ding hi.

²Gal sim dinga na kuan uh ciangin siampipa a mai-ah pai-in galkapte tungah thu a gen ding hi.

³Amah in, "Israel aw, za in, tuni-in na galte uh do dingin a kuan ding na hi ta uh hi. Lungsi kei unla lau kei un; amaute mai-ah linglawngin patau kei un.

⁴Ahang in, TOPA note Pasian in na galte uh hong zosak dingin amaute langkhatah pangin note hong dopih dingin hong tonpih hi," a ci ding hi.

⁵Uliante in galkapte tungah; "Inn thak lama a ap nai lo a om hiam? Ciahsak un, amah gal sungah si-in midang khatpeuh in a inn na ap kha ding hi.

⁶Lenggui suana a nekha nai lo a om hiam? Ciahsak un, amah gal sungah si-in midang khatpeuh in ne kha ding hi.

⁷Lawm dong khina zipi nai lo a om hiam? Ciahsak un, amah gal sungah si-in midang khat in a pi kha ding hi," ci-in a gen ding hi.

⁸Tua ciangin uliante in, "A lau a, a lungsi dedu na om uh hiam? A sanggamte lungkiasak kha ding ahi manin amah ciahsak un," a cih beh lai ding hi.

⁹Uliante in galkapte tungah thugen a man khit uh ciangin amaute a uk ding a seh ding uh hi.

¹⁰Khuapi khat sim dinga na kuan khiat uh ciangin a mite tungah kilem ding gen masa un.

¹¹Amaute in hong san theih uh a, a kongpite uh hong hon uh leh a sunga om mi khempeuh na nasem uh suak ding uh hi.

¹²Amaute kilem ding ut loin kido a kul leh a khuapi umcih un.

¹³TOPA note Pasian in note khut sungah hong piak ciangin a sunga om mi khempeuh namsau-in that un.

¹⁴Numei, naupang, ganhingte le khuapi sunga na peuhmah gal-vanlak in no adingin na la thei ding uh hi. Na galte uh tung pana TOPA note Pasian in hong piak vante na zang thei ding uh hi.

¹⁵Hih in na kimnai-ua om minamte tawh kisai hi loin no tawh a kigamla khuapi khempeuh na bawl nading uh ahi hi.

¹⁶Bangbang ahi zongin TOPA na Pasian un na luah dingun hong piak ding minamte’ khuapite sungah a nungta bangmah hingkhawi kei un.

¹⁷TOPA note Pasian in hong thupiaksa bangin Hit-te, Amor-te, Canaan-te Periz-te, Hiv-te le Jebus-te susia a[30] kiuhkeuh un.

¹⁸Na tua cih kei uh leh amau pasiante biakna-a a hih uh a kihhuai na khempeuh na zuih dingun hong hilh ding uh a, TOPA note Pasian langah na mawh ding uh hi.

¹⁹Khuapi khat a la dingin sawtveipi na umcih uh ciangin khuapi-a singkungte hei-in phukin nusia kei un, bang hang hiam cih leh a gah na ne thei ding uh hi. Tuate phukpai kei un. Na umcih tua lopaanga singte mihing ahi hiam? b[31]

²⁰Ahi ta zongin, nek theih kung hi lo hi, ci-a na theihte uh na um uh khuapi na zawh matengun umcihna-a na zat dingun na phuk thei ding uh hi.