Read Zokam Thupiakkikna 23 Bible Online

Thupiakkikna 23 - Zokam bible

Thupiakkikna 23

¹Mi khat a cil kisuzan ahikeh ki-atkhia-a, a kigetsa mi khatpeuh TOPA mipi kikhopna ah a lut thei kei ding hi.

²A kikham kitenna d[35] pana piang ta peuhmah le ama suan khangsawm ciang dong nangawn TOPA mipi kikhopna ah a lut thei kei ding hi.

³Amon-te ahi-a, Moab-te ahi zongin amau suante kuamah khang sawmna dong nangawn TOPA mipi kikhopna ah a lut thei kei ding hi.

⁴Ahang in, note Egypt pan na paikhiat lai-un lampi ah anlum le tui in hong dawn lo uh a, Aram Naharaim e[36] a Pether panin Beor’ tapa Balaam cialin note hong hamsiatsak uh hi.

⁵Ahi zongin TOPA note Pasian in Balaam thu ngai lo-a, hong hamsiatna uh no tungah thupha in hong heisak hi; bang hang hiam cih leh TOPA note Pasian in note hong it hi.

⁶Na nuntak sungun amaute tawh kilem nading le kipawlkhawm nading zong kei un.

⁷Edom-te mudah kei un, bang hang hiam cih leh na sanggam uh ahi hi. Egypt-te hua kei un, ahang in amau gamah pemta in na tung ngei uh hi.

⁸Amaute sung pana suak a tate uh khang thumna panin TOPA mipite lakah a lut thei ding uh hi.

⁹Na galte uh langkhatah giahphual na sat uh ciangin a siang lo na peuhmah hemkhia un.

¹⁰Zan ciangin a baw teh a om leh a siang lo ahi manin giahphual pua-ah paikhia-in tua lai ah a om ding hi.

¹¹Ahi hangin nitaklam ciangin amah kisil dinga, nitum ciangin giahphualah ciah thei ding hi.

¹²Giahphual pualam mun khatah awnghawh nading mun khat na sehtuam ding uh hi.

¹³Na vanzatte uh lakah lei tawhna khat na nei ding uh a, awng na hawh uh ciangin a khuk to-in na thak khiat pen na vuk kik ding uh hi.

¹⁴Ahang in, TOPA note Pasian note hong dal dingin na giahphualuah hong vakin na galte uh no tungah hong pia ding hi. No lakah a kilawm lo khatpeuh mu-in hong kiheimang san loh nadingin na giahphual sung uh a siangtho pelmawh ding hi.

¹⁵Sila khat no kiangah hong buk leh a pu kiangah puak kik kei un.

¹⁶Note laka a utna mun peuhpeuh le ama teelna khuapi peuhpeuh ah tengsak un. Amah nuainet kei un.

¹⁷Israel-te kuamah numei pasal kizuakin biakbukno ah a om kei ding hi.

¹⁸Numei kizuak man ahi-a, pasal kizuak man a[37] ahi zongin kiciamna khatpeuhpeuh mante TOPA note Pasian innah na tun peuhmah kei ding uh hi; a nihin TOPA note Pasian in a kihkhawm hi.

¹⁹Na sanggampa tungah sum tung ahi-a, an tung ahi-a, a met thei khatpeuh tung ahi zongin a met la kei in.

²⁰Gamdang mite tungah a met na la thei dinga, ahi hangin TOPA note Pasian in, luta na neih nading uh gamah na khutua na sep peuhpeuh uh thupha hong piaksak nadingin na sanggampa Israel-te tungah a met la kei in.

²¹TOPA note Pasian tungah na kiciam leh ziakai loin pia in, ahang in, TOPA note Pasian in hong kalin a mawh a khialin hong sim teitei ding hi.

²²Kiciamna khatpeuh na bawl loh nadingin kikem in, nang hong kimawhsak kei ding hi.

²³Na kama na genkhiat peuhmah pel loin sem in, bang hang hiam cih leh nangma utthu-in TOPA note Pasian tungah na kama na ciam ahi hi.

²⁴Na vengpa lenggui huanah na lut leh lenggah na duh zahzah ne in, ahi hangin na bawmta sungah bangmah guang kei in.

²⁵Na vengpa an-lei ah na lut leh na khutin anvuite na khiak thei dinga ahi hangin ankung dinglaite phiaukawi-in na atsak peuhmah kei ding hi.