Read Zokam Thupiakkikna 25 Bible Online

Thupiakkikna 25 - Zokam bible

Thupiakkikna 25

¹Mite a kitot uh ciangin thukhen zumah kitun ding uh a, thukhente in a thu uh khensakin a mawhpengte zosakin a mawhte mawhpaih ding uh hi.

²A mawhpa sat thuaksak tuak ahileh thukhenpa in boksakin ama mawhna tawh kizui-a a sat zah vei ding a langpa muhin a sat ding hi;

³ahi hangin sawmli vei val a sat kei ding hi. Tua zah sangin tamvei a kisat zawk leh no muhin na sanggampa uh a zahlaak lua kha ding hi.

⁴Bawngtal in an a cil laitakin a muk tuamsak kei un.

⁵Sanggam pasalte a tenkhawm sungin khat tapa nei loin a sih leh a meigongnu midang in a tenpih peuhmah kei ding hi. A pasal sanggampa in la-in tenpih dinga a nuphalpa maban khempeuh a cingsak ding hi.

⁶Israel pan a sanggam sipa min a man loh nadingin tuanu tapa upa pen in a sanggam sipa min a pua ding hi.

⁷Ahi zongin a sanggampa zi tuapa in a tenpih nop kei leh khua kongpi-a upate kiangah pai-in, "Ka pasal sanggampa in Israel sunga a sanggampa min a puak ding zom nuam lo hi. Amah in kei tungah a sanggampa nasep ding teng a tangtun kei hi," a ci ding hi.

⁸Tua ciangin khuapi upate in amah samin a hopih ding uh hi. Amah in, "Tuanu ka tenpih nuam kei hi," a cih leh

⁹a sanggampa zi meigongnu upate mai-ah pai to dinga, a khedap kaih a langkhat kaihkhiatsakin a maitang cilphih dinga," a sanggampa innkuanpih gui a zomto nuam lote a kihici bawl ahi hi," a ci ding hi.

¹⁰Israel sungah tua mipa gui Khedap Kisuahsakte Innkuan, ci-in kithei ding hi.

¹¹Mi nih a kilai-a khatpa a zi in huhin a lawmpa a hutna-in a lawmpa kilaipihpa a zahmawhte ah a matsak leh

¹²tuanu khut na sattansak ding uh hi. Amah na hehpih peuhmah kei ding uh hi.

¹³Na ip sunguah tawisuang nih - a kikim lo azaang le agik nei kei un.

¹⁴Na inn sunguah tehna nam nih - aneu le alian nei kei un.

¹⁵TOPA note Pasian hong piak nading gamah na khansau theih nadingun a man le a kician khaina le tehna na nei pelmawh ding uh hi.

¹⁶Ahang in, TOPA note Pasian in hih banga gamta peuhmah le a man lo-a sem peuhmah a kih hi.

¹⁷Egypt pan na paikhiat lai-un lampi-a, Amalekte hong bawlna phawk un.

¹⁸Note gimin na cihmawh laitakun, na khualzinna-uah hong dawntuah uh a, a nunga vai nunung khempeuh hong ngawngtan uh hi; amaute in Pasian a kihta kei uh hi.

¹⁹TOPA note Pasian in la-a na luah dingun hong piakna gamah na kim na pamua galte khempeuh panin note hong tawlngaksak ciangin van kikupsin nuai panin Amalekte a kiciamtehna na phiatkhia ding uh hi. Mangngilh kei un!