Read Zokam Thupiakkikna 26 Bible Online

Thupiakkikna 26 - Zokam bible

Thupiakkikna 26

¹TOPA note Pasian in na luah dingun hong piak nading gamah lutin la-a na ten uh ciangin,

²TOPA note Pasian in hong piak ding gam leihoih pana piang gahmasa pawlkhat la-in lawh sungah koih un. Tua ciangin TOPA note Pasian in a Min ten nadingin a teel nading munah paipih unla,

³tua huna zumngak siampipa kiangah, "TOPA in i pute tungah eite piak dingin a ciamsa gam ka tunna tuni-in TOPA na Pasian tungah ka pulakkhia hi," na ci ding uh hi.

⁴Siampipa in na khut panun a lawh hong sang dinga TOPA note Pasian biakna-tau mai-ah a ngasuk ding hi.

⁵Tua ciangin TOPA note Pasian mai-ah, "Ka pa a vak kawikawi Aram-te hi-a, mi tawmkha tawh Egypt ah paisukin tua lai-ah teng uh a, tua pan tampi pha-in a vanglian minam lianpi khat a suak uh hi.

⁶Ahi hangin Egypt-te in kote hong bawlsia uh a, na haksa hong semsakin hong thuaksiasak uh hi.

⁷Tua ciangin TOPA ka pate uh Pasian tungah ka kiko uh a, TOPA in ka aw uh hong za-in ka gentheihna uh, hong kinengniam a ka nasepte uh hong mu hi.

⁸Tua ciangin TOPA in a thahat khut le a kizankhia ban tawh a lauhuai mahmah le a piandang limte le a lamdangte tawh Egypt panin hong paikhiatpih hi.

⁹Hih mun ciang hong puakin hih gam - bawngnawi le khuaizu luanna gam hong pia hi,

¹⁰tu-in TOPA aw, keimah nong piaksa leihoih-a piang gahmasa nang kong puak hi," na cikhia ding uh hi. TOPA note Pasian mai-ah na lawh koihin ama mai-ah na kunsuk ding hi.

¹¹Tuateh TOPA note Pasian in nang le na innkuanpihte hong piaksa na hoih khempeuh, Levi-te le no laka om pemtate tawh nuam na sa khawm ding uh hi.

¹²A kumthumna sawm ah khat piak kumin na khawhsa khempeuh panun sawma khat na tuam koih khit uh ciangin Levi-te, pemtate, pa nei lote le meigongte in no khua sungah ne in a kham theih nadingun amaute na pia ding uh hi.

¹³Tua ciangin TOPA note Pasian kiangah, "Nong thupiak khempeuh tawh kituakin ka inn panin tanh siangtho ka khenkhia khina Levi-te, pemtate, pa neilote le meigongte ka pia khin hi. Na thupiakte panin pial loin tuate khatpeuh zong ka mangngilh kha kei hi.

¹⁴Ka khakhun sungin tua tanh siangtho ka ne kei-a, ka nit sungin zong tuate khatpeuh khenkhia loin misi an piakin zong ka zang kei hi. TOPA ka Pasian thu kong mang hi. Kei nong thupiak peuhmah ka sem khin hi.

¹⁵Na tenna mun siangtho van panin hong ensuk inla, na mi Israel le ka pute uh tungah kiciam-a na khapsa, bawngnawi le khuaizu luanna gam thupha hong pia in," na ci ding uh hi.

¹⁶Tuni-in TOPA note Pasian in hih thukipte le thukhamte na lungsim khempeuh uh le na hinna khempeuh uh tawh limtaka na zuih dingun thu hong pia hi.

¹⁷Tuni-in TOPA note Pasian ahina, ama lampi tawnin a thukipte, a thupiakte le a thukhamte zui-in ama thu na man ding uh na pulak khin uh hi.

¹⁸Tua banah tuni-in TOPA in hong ciamsa bangin note ama mi, ama gou na hi uh a, a thupiak khempeuh na zuih dingun hong gen khin hi.

¹⁹Amah in a bawlsa minamte khempeuh tung pekah a kiphatzaw, a minthangzaw, a kipahtawizaw in hong koih dinga, ama hong ciamsa bangin TOPA note Pasian mi siangtho na suak ding uh hi.