Read Zokam Thupiakkikna 27 Bible Online

Thupiakkikna 27 - Zokam bible

Thupiakkikna 27

¹Moses le Israel upate in mipite thupia uh a: "Tuni-a no tungah kong piak, thupiakte khempeuh zui un.

²Note in Jordan kantan khinin TOPA note Pasian hong piak ding gam na tun uh ciangin suangtum lianpi phutin a tung na zutmai ding uh hi.

³TOPA na pate uh Pasian, in note hong ciamsa bang tektekin TOPA note Pasian in note hong piak ding bawngnawi le khuaizu luanna gamah lut dingin na kantan khit uh ciangin tuate tungah hih thukham kammalte gelh un.

⁴Tuateh tuni-a kong thupiak bangin Jordan na galkah khit uh ciangin Ebal Vum tungah hih suangte phut unla, zutmai un.

⁵Tua munah TOPA note Pasian biakna-tau ding, suang biakna-tau khat dawh un. Tuate bawlna ah sik vanzat khat beek zang kei un.

⁶TOPA note Pasian adingin lopaanga suangte in biakna-tau na dawh ding uh a, tua tungah TOPA note Pasian meihal biakna na pia ding uh hi.

⁷Tua munah kilawmtakna biaknate a[39] bawl unla, tuate ne in TOPA note Pasian omna ah nuamsa un.

⁸Tuateh na phuhsa uh hih suangte tungah hih thukham malte khempeuh siang sinsenin na gelh ding uh hi," a ci uh hi.

⁹Tua ciangin Moses le Levi siampite in Israel khempeuh tungah, "Israel aw, dai dide in na ngai un! Tu-in note TOPA note Pasian mi na suak khin uh hi.

¹⁰TOPA note Pasian thu mang unla, tuni-a note kong piak thupiakte le thukipte zui un," a ci uh hi.

¹¹Tua ni mah in Moses in mite thu pia a:

¹²Jordan na galkah khit uh ciangin: Simeon, Levi, Judah, Issachar, Joseph le Benjamin behte in, Gerizim Vum tungah dingin mipite thupha a pia ding uh hi.

¹³Tuateh Reuben, Gad, Asher, Zebulun, Dan le Naphtali behte in Ebal Vum tungah dingin a hamsiat ding uh hi.

¹⁴Levi-te in Israel mipi khempeuh tungah aw ngaihtak tawh:

¹⁵"A kikhuak kuak ahi a, a kisung ahi zongin lim khatpeuh a bawlte -khutsiamte bawl TOPA in a kih milim a koih simte in hamsiatna thuak ta uh hen," ci ding uh hi. Tua ciangin Israel mipi khempeuh in, "Amen!" ci ding uh hi.

¹⁶"A nu le a pa a pahtawi lote in hamsiatna thuak ta hen," ci ding uh hi. Tua ciangin mipi khempeuh in, "Amen!" ci ding uh hi.

¹⁷"A vengte kigisuang khinte in hamsiatna thuak ta hen," ci ding uh hi. Tua ciangin mipi khempeuh in, "Amen!" ci ding uh hi.

¹⁸"Mittawpa lam a pialsakpa in hamsiatna thuak ta hen," ci ding uh hi. Tua ciangin mipi khempeuh in, "Amen!" ci ding uh hi.

¹⁹"Pemtate, pa nei lote le meigong numeite’ thutang a lehheisakte in hamsiatna thuak ta uh hen," ci ding uh hi. Tua ciangin mipi khempeuh in, "Amen!" ci ding uh hi.

²⁰"A pa’ zi a luppihte in a pa lupna daisak ahi manin hamsiatna thuak ta hen," ci ding uh hi. Tua ciangin mipi khempeuh in, "Amen!" ci ding uh hi.

²¹"Ganhing khatpeuh a luppihte in hamsiatna thuak ta hen," ci ding uh hi. Tua ciangin mipi khempeuh in, "Amen!" ci ding uh hi.

²²"A sanggamnu, a pa tanu, a nu’ tanu a luppih peuhmah in hamsiatna thuak ta hen," ci ding uh hi. Tua ciangin mipi khempeuh in, "Amen!" ci ding uh hi.

²³"A sungnu a luppihte in hamsiatna thuak ta hen," ci ding uh hi. Tua ciangin mipi khempeuh in, "Amen!" ci ding uh hi.

²⁴"A vengpa a that simte in hamsiatna thuak ta hen," ci ding uh hi. Tua ciangin mipi khempeuh in, "Amen!" ci ding uh hi.

²⁵"Mawhpeng khat thah nadingin golhsum a sangte in hamsiatna thuak ta hen," ci ding uh hi. Tua ciangin mipi khempeuh in, "Amen!" ci ding uh hi.

²⁶"Hih thukham kammalte lenkip loin a phikhate in hamsiatna thuak ta hen," ci ding uh hi. Tua ciangin mipi khempeuh in, "Amen!" ci ding uh hi.