Read Zokam Thupiakkikna 29 Bible Online

Thupiakkikna 29 - Zokam bible

Thupiakkikna 29

¹Hihte in TOPA in amaute tawh Horeb ah a bawlsa thukhun banah Moab ah Israel-te tawh a bawl nadinga Moses a thupiak thukhun kammalte ahi hi.

²Moses in Israel-te khempeuh samin amaute tungah: TOPA in Egypt ah Pharaoh tung, a uliante khempeuh tung le a gam khempeuh tungah a hihsate khempeuh na mit-un na mu khin uh hi.

³Na mit mahmah un tua bawlsiatna lianpite, a tuampian limte le a lamdang alian mahmahte na mu khin uh hi.

⁴Ahi hangin tuni mahmah dong TOPA in theihtelna lungsim ahi a, muhna mit ahi a, zakna bil ahi zongin hong pia nai kei hi.

⁵Sehnel gam sunga kong makaih kum sawmli sungin na puansilh uh patkhia lo-a, na khedap kaihte uh zong a sia kei hi.

⁶Note in anlum ne loin zu le a kibilh dang khatpeuh ahi zongin na dawn kei uh hi. TOPA note Pasian ka hilam na theih nadingun hih bangin ka hih hi.

⁷Hih mun na tun uh ciangin Heshbon kumpipa Sihon le Bashan kumpipa Og, eite do dingin hong kuankhia-a, ahi hangin amaute i zo hi.

⁸Amau gam i laksaka, Reuben-te, Gad-te le Manasseh beh - alangte luah dingin i pia hi.

⁹Note na hihna peuhpeuh uah na daupai nadingun hih thukhun kammalte limtakin zui un.

¹⁰Tuni-in na makaite uh leh na mapite uh, na upate uh le na uliante uh, Israel midangte khempeuh,

¹¹na zite uh le na tate uh tawh, na sing uh hong ehsak na tui uh hong tawisak na giahphual ua teng pemtate tawh - na vekpi un note Pasian TOPA mai ah na ding uh hi.

¹²TOPA note Pasian tawh thukhun a bawlkhawm dingin tuni-in hih munah na ding uh hi, tuni mahmah in TOPA in no tawh thukhunna bawlin kiciamna tawh kipsak ding hi;

¹³amah in na pate uh Abraham, Isaac, Jacob le note tunga hong ciamsa bangin amah note Pasian ahi theih nadingin tuni-in note ama mi dingin hong kipsak ding hi.

¹⁴Keimah kiciamin, kaw bawl hih thukhun hih TOPA note bek tawh abawl hi lo-in,

¹⁵tuni-in Topa mai hih muna ding note le tuni-a om lote tawh zong a bawl ka hi hi.

¹⁶Note mahmah in Egypt a i nuntakzia hih mun i tun nadinga, gamte i kantanzia na thei uh hi.

¹⁷Note in amaute lakah sing le suang ahi a, ngun le kham tawh ahi zongin a kibawl milimte le lim kihhuaite na mu khin uh hi.

¹⁸Tuni-in note lakah numei ahi-a pasal ahi zongin, bawng’ ahi-a beh ahi zongin kuamahpeuh TOPA eite Pasian panin kiheikhia-a, tua minamte pasiante a biak loh nadingun na lungsim uh kiciansak un; note lakah tua banga gukha zung na khak loh nadingun kiciantakin om un.

¹⁹Tua bang mite in hih kiciamna kammal a zak ciangin amah le amah kici in, "Keima thu-in ka tatsuak hangin ka suakta veve ding hi," ci-in kingaihsun kha ding hi. Hih in tui a ngah leitang tung le a keu a[41] leitang tungah siatna a tungsak ding hi.

²⁰Ama mawhna TOPA in maisak nuam lo dinga; ama thangpaihna le a hazatna in tua mipa langah a kang ding hi. Hih laibu sunga hamsiatna khempeuh ama tungah tu dinga, TOPA in a min van kikhupsin nuai panin a phiatkhia ding hi.

²¹Hih Thukham Laibu sunga hamsiatna thukhun khempeuh tawh kizui-in haksatna a tuak dingin Israel beh khempeuh panin TOPA in amah a tang koihkhia ding hi.

²²Mailam a khang ding na tate uh le gamlapi pana hong pai gamdang mite in tua gama tung siatna le TOPA in a tuahsak natnate a mu ding uh hi.

²³Gambuppi pen ci le kaat kangvam hi dinga - bangmah kisuan loin bangmah sel lo-a, a tungah anteh sawlbawk a po kei ding hi. Tua in TOPA in heh lua-a a lotthal Sodom le Gomorah, Admah le Zeboim-te siatna tawh kibang ding hi.

²⁴Minam khempeuh in, "Bang hangin TOPA in hih gam hici bawl ahi hiam? Bang hangin hici lawmlawma heh ahi hiam?" ci-in a dong ding uh hi.

²⁵A dawnna pen, "Hih mite in TOPA, a pate uh Pasian thukhun, amaute Egypt pan a paikhiatpih lai-a, amaute tawh a bawl thukhun a nusiat hang uh ahi hi.

²⁶Amaute paikhia uh a, a theih loh uh pasiante, amaute a piak loh pasiante bia in tuate mai-ah kun uh hi.

²⁷Tua ahi ciangin hih gam tungah TOPA hehna kuanga, amah in hih laibu sunga hamsiatna khempeuh a tungah a tunsak ahi hi.

²⁸A hehluatna le a thangpaihna lianpi tawh TOPA in amau gam panin amaute bulkalh a, tu-a a om bangun amaute gamdangah a nawhgawp ahi hi," kici ding hi.

²⁹Thusimte pen TOPA note Pasian aa hi a, ahi hangin hong kilak hih thute eite le i tate aa hi-in, hih thukham thute khempeuh i zuih theih nading ahi hi.