Read Zokam Thupiakkikna 3 Bible Online

Thupiakkikna 3 - Zokam bible

Thupiakkikna 3

¹Tua zomin eite kihei-in Bashan zuatna lampi dung zuanin i pai to a, Edrei ah eite do dingin Bashan kumpipa Og, a galkap buppi tawh hong kuankhia hi.

²TOPA in kei tungah, "Amah le a galkap buppi le a gam, nang tungah hong pia khin ka hi manin amah kihta kei in. Heshbon ah kumpi-a om Amor mi kumpipa Sihon na hih bangin ama tungah hih in," hong ci hi.

³Tua bangin TOPA eite Pasian in eite khut sungah Bashan kumpipa Og le a galkapte khempeuh hong pia hi. Amaute hingkhawi nei loin i satlum khin hi.

⁴Tua hunin ama khuapi khempeuh i la khin hi. Argob kual bup, Bashan a Og kumpi gam buppi a - khuapi sawm gukte i lak loh om lo hi.

⁵Hih khuapite khempeuh kulh sangpi in ki-um a, kongpite le a kalhna zawlpite nei in, kulha ki-um lo khuata lian tampi zong a om hi.

⁶Heshbon kumpipa Sihon i bawl bangin amaute i susia c[5] kiuhkeuh a - nupi, papi, naupang le khuapi peuhmah i susia d[6] hi.

⁷Ahi hangin a ganhing khempeuh uh le a khuapite uh pana i laksak vante ei adingin i puakhia hi.

⁸Tuateh tua hunin Jordan nisuahna lama om Amor-te kumpipa tung panin Arnon Guam a kipan Hermon Vum ciang dong i la hi.

⁹(Sidon-te in Hermon pen Sirion ci uh a, Amor-te in Senir ci uh hi.)

¹⁰Mualtung zanglei-a om khuapi khempeuh i la-a, Gilead gam khempeuh, Bashan gam khempeuh Salecah le Edrei ciang dong Bashan a om Og kumpi gama khuapite khempeuh i la hi.

¹¹(Rephraim mite panin a baanglai Bashan kumpipa Og bek ahi hi. A lupna e[7] sik-a kibawl hi-a, pi sawm le thum val sau a, pi guk a zai f[8] hi. Ammon-te khua Rabbah tua ah om lai hi.)

¹²Tua huna i lak gam sung panin Aroer leilu-lam Arnon Guam ciang Gilead mualtung gam alang a khuapite tawh Reuben-te le Gad-te tungah ka pia hi.

¹³Gilead gam a om lai teng le Og kumpi gam ahi Bashan gam khempeuh Manasseh beh a langte tungah ka pia hi. (Bashan gam sunga Argob kual buppi, Rephaim-te leitang hi, kici hi.

¹⁴Manasseh suan Jair in, Argob kual buppi Geshur-te le Maacath-te gamgi dong la-a, ama min tamsakin tu hun ciang dong Bashan pen Havvoth Jair a[9] kici hi.

¹⁵Tuateh Makir tungah Gilead ka pia hi.

¹⁶Ahi hangin Reuben-te le Gad-te tungah Gilead panin a kikhungsuk Arnon Guam ciang (guam laizangah gamgi pai-in) Ammon-te gamgi ahi Jabbok Gunpi dong ka pia hi.

¹⁷A nitumna lam gamgi in Arabah a Jordan hi-a, Kinnereth panin Pisgah mualdung nuai-a om Arabah Tuipi (Ci Tuipi) b[10] dong amaute ka pia hi.

¹⁸Tua hunin note thu kong pia-a, "TOPA note Pasian in na neih dingun hih gam hong pia hi. Ahi hangin pasal thahat khempeuh galsim dingin kithawi unla, na sanggam uh Israel-te mai ah masa in na kantan uh kul ding hi.

¹⁹Bangbang ahi zongin na zite uh, na tate uh le na ganhingte uh (ganhing tampitak na neih lam uh ka thei hi) kong piaksa khuapite ah om phot uh henla

²⁰TOPA in note hong khawlsak bangin na sanggamte un zong TOPA note Pasian in Jordan galkhat a amaute a piaksa gam luah in a khawl mateng uh tuaci om phot uh hen. Tua khit ciangin note kong piaksa gam ciat ah na ciah kik thei ding uh hi," kong ci hi.

²¹Tua hunin Joshua thu ka pia a: "TOPA note Pasian in hih kumpi nihte tunga a hihsa na mit mahmah a na muhsa ahi hi. Na pai lai nading kumpi gam khempeuh ah TOPA in a kibangin hih ding hi.

²²Amaute kihta kei in; TOPA na Pasian mahmah in hong dosak ding hi," ka ci hi.

²³Tua hunin TOPA tungah ka thum a:

²⁴Thuneipen TOPA aw, na nasempa tungah na liatna le na khut thahatna na laklak khin hi. Vantung ah ahi a leitungah ahi zongin nang hih bangin vangliatna a hih thei bang pasian om ahi hiam?

²⁵Kei hong paisak-in Jordan gala gam hoih - tua mualtung gam hoih le Lebanon hong musak in," ka ci hi.

²⁶Ahi zongin note hangin kei tungah TOPA heh a, ka thu hong ngai lo hi. TOPA in, "Pha zo, hih thu ah hong hopih nawn kei in.

²⁷Pisgah dawn ah kah to inla nitumna-lam, leilu-lam leitaw-lam le nisuahna-lam en in. Hih Jordan kantan lo ding na hih nungsangin na mit beekin tua gam en in.

²⁸Ahi zongin Joshua thu pia in, amah in gun kantanin hih mite makaih dinga na muhna gam luahsak ding ka hi manin hanthawn inla thakhauhsak in," hong ci hi.

²⁹Tuaci-in Beth Peor kiang kuam sungah i om hi.