Read Zokam Thupiakkikna 31 Bible Online

Thupiakkikna 31 - Zokam bible

Thupiakkikna 31

¹Tua ciangin Moses pusuakkhia in Israel khempeuh tungah:

²Tu-in kei kum za le sawmnih ka upa ta hi; note kong makaih thei nawn kei ding hi. TOPA in kei tungah, ‘Jordan na kantan kei ding hi,’ hong ci khin hi.

³TOPA note Pasian mahmah in note hong pi-in hong kantanpih ding hi. Amah in note mai-ah hih minamte susia in amaute gam laksakin na tang ding uh hi. TOPA gensa bangin Joshua in note hong kantanpih ding hi.

⁴TOPA in amaute gam tawh a suksiat khawm Amor-te kumpipa Sihon le Og-te tungah a hih bangin amaute tungah a hih ding hi.

⁵TOPA in amaute no tungah hong pia dinga, note in kong thupiaksate amaute tungah na sem pelmawh ding uh hi.

⁶Hat unla hang un. TOPA note Pasian in hong tonpih ahi manin amaute hangin lauin linglawng kei un; amah in hong nusia loin hong taisan ngei lo ding hi," ci-in hih thute a gen hi.

⁷Tua ciangin Moses in Joshua sam a, Israel khempeuh mai ah, "Hat inla hang in, TOPA in a pute uh tungah amaute piak dingin a ciamsa gamah hih mite na lutpih pelmawh dinga, amaute luah dingin tua gam na hawmsak pelmawh ding hi.

⁸TOPA mahmah na mai-ah pai-in hong ompih ding hi; amah in nang hong nusia ngei loin hong taisan ngei kei ding hi. Lau kei inla lungkia kei in," ci-in a gen hi.

⁹Tuaci in Moses in hih thukham gelh a, TOPA thukhun singkuang a pua Levi tapa siampite le Israel upate khempeuh tungah a pia hi.

¹⁰Tua ciangin Moses in amaute thu pia-a: "Leiba kimaisak kum ahi kum sagih a cin sim, Biakbuk Pawi hun a tun ciangin,

¹¹ama teel nading mun TOPA note Pasian mai-ah Israel khempeuh a kilah hun ciangin amaute mai-ah amaute zakin hih thukham na sim ding uh hi.

¹²Nupi, papi, naupang le na khua sungua teng pemtate in za-in TOPA note Pasian thu ngai-a, amah kihtakzia ding thei-in hih thukham kammalte limtaka a zuih theih nadingun - mipite kikhawmsak un.

¹³Hih thukham a thei nai lo a tate un za pelmawh ding uh a, Jordan kantana na neih ding uh gam ah na ten laiteng uh TOPA note Pasian kihtakzia ding a thei ding uh hi," a ci hi.

¹⁴TOPA in Moses kiangah, "Tu-in na sih ni ding nai ta hi. Joshua sam inla amah za ka piak nading mun Puanbuk ah nang zong hong om in," a ci hi. Tua ciangin Kikhopna Puanbuk ah Moses le Joshua a va om uh hi.

¹⁵Tua ciangin Puanbuk-a meii khuampi ah TOPA kilanga, Puanbuk kongvang tungah meii a kitung hi.

¹⁶Tuateh TOPA in Moses kiangah, "Na pate tawh na tawlnga ta dinga, hih mipite a lut nading uh gama gamdang pasiante tungah a kizuak pah ding uh hi. Amaute in kei hong taisanin amaute tawh ka bawl thukhun a palsat ding uh hi.

¹⁷Tua ni ciangin amaute tungah ka heh dinga amaute nusia-in amaute panin ka maitang ka sel dinga, a kisia ding uh hi. Amaute tungah vangsiatna le haksatna tampi tungin tua ni ciangin amaute in, ‘I Pasian in hong ompih nawn lo ahi manin hih vangsiatnate ei tungah hong tung hi lo ahi hiam?’ ci ding uh hi.

¹⁸Tua ni ciangin pasian dangte lamah amaute a kiheina uh gamtatsiate hangin ka maitang ka selsan taktak ding hi.

¹⁹"Tu-in nang mahmah in hih la gelh inla Israel-te hilh in; amau langah ka teci ahi thei dingin amaute sasak in.

²⁰A pute uh tungah kiciama ka khapsa bawngnawi le khuaizu a luanna gamah ka tunsak hun ciang, amaute in ne-in a tha hoih khit uh ciangin kei hong nialin ka thukhunte palsat ding uh a, pasian dangte lamah kihei-in a bia ding uh hi.

²¹Amaute tungah vangsiatnate le haksatnate tampi a tun ciangin amau suante in hih la mangngilh nai lo ding uh ahi manin amaute langkhatah teci hi ding hi. Keimah in amaute tungah kiciama ka piak nading gamah ka puak ma nangawnin a sep dingun a sawm kholhsa uh ka thei hi," a ci hi.

²²Tua ciangin Moses in tua ni-in hih la gelh a Israel-te a hilh hi.

²³TOPA in Nun’ tapa Joshua tungah hih thupiak pia a: "Keimah kiciama amaute ka khapsa gamah Israel-te tunpih ding na hi manin hat inla hang in, keimah in kong ompih ding hi," a ci hi.

²⁴Moses in laibu khat sungah hih thukham kammalte a kipatna pan a bei ding a gelh khit ciangin,

²⁵TOPA thukhun singkuang a pua Levi-te tungah:

²⁶"Hih Thukham laibu la unla, TOPA note Pasian thukhun singkuang pangah koih un. Note langkhatah teci ahi dingin tua lai-ah a om ding hi.

²⁷Note na ngawng khauh lam uh le na lehdo theih lam uh kong thei hi. Ka nuntak lai no tawh ka om khawm lai nangawnin TOPA langah lehdo na hi uh leh ka sih khit ciangin na lehdo zawsan ding uh hi!

²⁸Na beh upate uh le na ulian khempeuh uh mai-ah hih kammalte ka gen theih nading le amaute langkhatah teci a pang dingin van le lei ka sap theih nadingin ka mai-ah amaute hong kikhawmsak un.

²⁹Ka sih khit ciangin note kisiathang gawpin kong thupiaksa panin na pialkhiat ding uh lah teltakin ka thei hi. Mailam hun ciangin TOPA muhna ah a sia-in gamta ding uh a, na khut uh tawh na bawlsate uh hangin amah hehsak ding na hih manun note tungah vangsiatna hong tung ding hi," ci-in hih thupiakte a pia hi.

³⁰Tua ciangin Moses in hih lamalte a patna pan a tawpna dong kamngah a Israel mipi bup zakin: