Read Zokam Thupiakkikna 32 Bible Online

Thupiakkikna 32 - Zokam bible

Thupiakkikna 32

¹Vante aw, na ngai un kong gen ding hi; Leitung aw, ka kammalte na za in.

²Ka hilhna guahmal bangin kia henla, ka kammalte daitui bangin taak hen; lopa sel tungah guahphin bang henla, singno dawngte tunga guahzu bang hen.

³TOPA min ka tangko ding hi. Oh, eite Pasian liatna phat un!

⁴Amah Suangpi hi a, a nasepte kicingin a lampi khempeuh thutang ahi hi. A muanhuai, a khial lo Pasian, thudikin thutang hi.

⁵Ama tungah amaute a siattat uh hangin a maizum nading uh hi a, ama tate hi nawn loin lungsim kawi le lungsim khel khang mite a[43] ahi uh hi.

⁶A hai, a pil lo mite aw, TOPA na thuk kik nading uh hih bang lam mah hiam? Amah note hong bawl hong siam, hong Piangsakpa b[44] na Pa uh hi lo ahi hiam?

⁷Tanglai hunte phawk unla; sawtpek lai-a khangte ngaihsun un. Na pa dong lecin hong gen dinga, na upate uh dong lecin hong ciangen ding uh hi.

⁸Sangpen Pa in minamte amau luah ding pia a, mihing khempeuh a hawmsak lai-in Israel’ tapate c[45] a phazah tawh kizui-in mite ading gamgi a phuhsak hi.

⁹TOPA’ tanh ama mite hi a, ama luahdinga a tanh Jacob ahiman ahi hi.

¹⁰Sehnel leitang gam kolh lakpi a thum duldul leikeu munah amah mu hi. Amah dalin kema; amit nauta bangin cinga,

¹¹a bu tokin, a note tungah kha a zap, a note man dingin a kha a zak, a khaveng tungah a note a pua zel muvanlai tawh kibang hi.

¹²TOPA bek in amah pi-a; pasian dang in a ompih kei hi.

¹³Leitang asannate ah amah tuangsak a, lo pana gahte in a vak hi. Suangpi pana khuaizu le meisuang heng pana sathau,

¹⁴bawnghon le tuuhon panin tuuno le keelno vakthaute le nawitui le nawithau-khal, Bashan tuutal limcipente le mangbuh vui tualpenin amah a vak hi. Nang in a phuan seuhseuh lenggah sisan na dawn hi.

¹⁵Jeshurun d[46] hong thau ta in hong lehpeek ta a, an hau in, gik lihliahin a mam pingpeng hi. Amah a bawlpa Pasian nusia-in, ama Honpa Suangpi a nial hi.

¹⁶Amaute in a gamdang pasiante uh a hazasak uh a, amau milim kihhuaite in a hehsak uh hi.

¹⁷Amaute in Pasian ahi lo dawite- a theih ngei loh uh pasiante, a piangtawm pasiante na pate uh kiktak loh pasiante tungah biakna a pia uh hi.

¹⁸Note ta-a hong nei Suangpi na taisan uh a, no hong senkhia Pasian na mangngilh uh hi.

¹⁹TOPA in hih mu a, a tanute a tapate in hehsak ahi manin amaute a nolh hi.

²⁰Amah in, "Amaute pan ka maitang ka sel ding hi; amaute lungsim kawi khangmite hi uh a, a muanhuai lo tate ahi manun a tawpna ah bang a suak uh hiam, ka en ding hi.

²¹Amaute in pasian ahi lo tawh hong hazasak uh a, kimanna nei lo a milim un hong hehsak uh hi. Kei zong tuate mahin mihing a hi lote ka engsak dinga; bangmah a thei lo minamte-in amaute ka hehsak ding hi.

²²Ka thangpaihna in mei tawhkuang khin ahi manin sihna e[47] leinuai gam dong a kang hi. Tua in leitung le a ante hultum dinga, mualte bulpite a kuangsak ding hi.

²³"Amaute tungah tuahsiatna ka sungvum dinga, amaute langkhatah ka thaltang ka kap ding hi.

²⁴Kialpi-in amaute ka zuukmang dinga, a haltum natna le sihtheihna pulpi ka tungsak ding hi; amaute lang khatah a hahiam gamsate le leivui laka awmtal a gupha ngante ka sawl ding hi.

²⁵Namsau in kongzing lakah amaute ta nei loin omsak dinga, a inn uh launa in a uk ding hi. Nungakte le tangvalte naungekte le samkangte a simang ding uh hi.

²⁶Amaute ka thehthang dinga, mihing kiphawk khakna panin ka phiatmang ding hi, ka ci hi.

²⁷Ahi hangin lah a galte un a galte uh phinin, ‘Ko khut mah a gualzo hi; hih khempeuh TOPA sepsa hi kei,’ ci-a a theihkhialh ding ka lau zel hi," a ci hi.

²⁸Amaute ngaihsutna nei lo minam hi uh a, amaute sungah thu theihkakna a teng kei hi.

²⁹Amaute pil tapeuh in hih thu theitel uh henla, a tawpna ah bang suak ding cih thei le uh maw!

³⁰Suangpi in amaute tungah zuak kei henla, TOPA in amaute piakhia lo hileh bangci in mi khat in tul khat nungdelhin, mi nih in tulsawm lausak ding ahi hiam?

³¹Ahang in, i galte nangawn in a theih mah bangun amau’ suangpi le ei Suangpi a kibang kei hi.

³²Amau lenggui Sodom pan le Gomorrah a lote pana pai ahi hi. A lenggahte uh gu tawh kidima, a lenggah bawkte uh khaatna tawh kidim hi.

³³A zu uh gulpite gu hi a, sihtheihna sokval gu ahi hi.

³⁴"Hihte koihkhol gige-in ka vankholna ah sincip lo ka hi hiam?

³⁵Phulakna kei aa hi a;ka thukkik ding hi. Mailam hunah amaute khe tal dinga; amau tuahsiat ni ding nai-in amau tungah siatna a tungpah ding hi,"

³⁶TOPA in a mite thahatna bei-in sila le sila lo khat beek a om nawn loh a muh ciangin, a mite tungah thu khen dinga, a nasemte a khuatuah ding hi.

³⁷Amah in amaute’ pasiante, amau bukna suangpi,

³⁸a kithoihna uh sathau ne-a, dawntheih-a biakna uh a dawn pasiante tu-in koi-ah om ta hiam? Hong huh dingin hong tho uh hen! Note hong liah dih uh hen!

³⁹"Tu-in en un, keimah in Amah ka hi hi! kei longal Pasian dang a om kei hi. Ka that-a, ka nungtasak hi, ka liamsaka, ka damsak ding hi; ka khut panin kuamah in a hukhia thei kei hi.

⁴⁰Vantung lamah ka khut lamto in: ka nuntak tawntung laisiah

⁴¹ka namsau taatin ka teesak a, thukhen dingin tua ka mat ciangin ka galte tungah phu ka la dinga, kei hong mudahte ka thuk kik ding hi.

⁴²Ka thaltangte sisan ka khamsak dinga, ka namsau in satak a nawmvalh ding hi; tuate pen a kithatte le salte sisan, gal makaite lutangte hi ding hi," a ci hi.

⁴³Minamte aw, amah in a nasemte sisan phu la-in a galte tungah phu la dinga, a gam le a mite adingin thoihdamna bawl ding ahi manin, ama mite tawh a[48] b[49] lungdam un.

⁴⁴Moses in Nun’ tapa Joshua c[50] tonpih in hih la kammal khempeuh mipite zakin a suut hi.

⁴⁵Moses in Israel khempeuh tungah hih lamalte khempeuh a suut a man ciangin

⁴⁶amaute tungah, "Note in na tate uh tungah hih thukham kammalte khempeuh limtaka a man nading uh thu na piak theih nadingun tuni-a no tungah cihtakpi-a kong suutkhiat kammal khempeuh na lungsim uhah vom cinten un.

⁴⁷Note adingin tuate thu mawkmawk lel hi lo hi - na nuntakna uh ahi hi. Jordan gal kah a na neih ding uh gamah tuate hangin sawtpi na nungta ding uh hi," a ci hi.

⁴⁸Tua ni mah in TOPAin Moses kiangah,

⁴⁹"Jericho gal Moab gam sunga om Abarim Mualdungpi a Nebo Vum ah pai to inla Israel-ten tanga a neih ding uh ka piak nading Canaan gam gal-et in.

⁵⁰Tua na kahtohna mualdawn ah nang na si dinga, na sanggampa Aaron, Hor Vum ah si-in a mipihte kiangah a kigawm bangin, nang zong na mipihte kiangah hong kigawmkhawm ding hi.

⁵¹Hih in Zin Sehnel-gam sunga om Meribah Kadesh tuite ah na nih un Israel-te muh in kei tungah na muanhuai kei uh a, nang in Israel-te lakah ka sianthona na letkip loh hang ahi hi.

⁵²Tua ahi ciangin tua gam na galmuh bek dinga; Israel mite ka piak ding gamah na lut kei ding hi," ci-in a gen hi.