Read Zokam Thupiakkikna 4 Bible Online

Thupiakkikna 4 - Zokam bible

Thupiakkikna 4

¹Israel aw, tu-in za in; thukipte le thukhamte no kong hilh ding hi. Na pate uh Pasian TOPA in note hong piaksa gam ah lutin la-a na ten theih nadingun zui un.

²Note kong thupiak banah behlap kei unla zong dokkhia loin note kong piak TOPA note Pasian thupiakte zui un.

³Baal Peor ah TOPA sepsa na mitun na mu zo uh hi. TOPA note Pasian in Peor a Baal nung a zui peuhmah susia a,

⁴ahi hangin TOPA note Pasian a lenkip khempeuh tuni dong na nungta uh hi.

⁵En un, note luta na lak ding uh gam ah na zuih theih nadingun TOPA ka Pasian in kei hong thupiak bangin thukipte le thukhamte kong hilh zo hi.

⁶Hih in minamte tungah pilna le theihtelna hong lak dinga, hih thukip a za khempeuh in, "Hih minam liante a pil le a theitel mi taktak ahi hi," hong cih nadingun limtakin zui un.

⁷TOPA eite Pasian tungah thu i nget peuhpeuh ciangin i kiangah a om bangin, amau pasiante a kianga om bang minam lian om ahi hiam?

⁸Tuateh tuni-a note mai-a kong khun thukham teng banga amaan thukip le thukham a nei ding zah-a lian bang minam dang om ahi hiam?

⁹Kidawm tapeuh un, na nuntak laitengun na mit ua na muhsate uh na mangngilh loh nading uh le na lungsim uh tawh a kipelh loh nadingin no le no kikem cinten un. Na tate uh hilh unla amau zong a tate uh hilhsawn uh hen.

¹⁰Horeb a TOPA note Pasian mai ah na din lai-un amah in kei tungah, "Mite in ka thugenna za-a, leitungah a nuntak laitengun kei hong zahtak theih nading uh le a tate uh a hilhsawn theih nadingun ka mai-ah mite kikhawmsak in," hong cih ni mangngilh kei un.

¹¹Mual kuang in vante dong mahmah bana meiivom le khuamial sahpi a om laitakin note in hong naihin mualbul ah na ding uh hi.

¹²Tua ciangin meikuang lak panin TOPA in note hong hopih hi. Kam pauna awte na zak uh hangin bangmah lim na mu kei uh hi; aw bek ahi hi.

¹³Note tungah hih thukhun, Thupiak Sawm hong genkhia-in na zuih nadingun thu hong pia-a, tua ciangin suangpek nih tungah a gelh hi.

¹⁴Jordan na kantan khit uh ciangin na neih ding uh gam ah na zuih ding uh thukipte le thukhamte note kong hilh dingin TOPA in kei lam hong lak hi.

¹⁵Horeb a meikuang lak pan TOPA in note hong hopih ni-in na khat peuhpeuh lim na mu kei uh hi. Tua ahi ciangin

¹⁶note hong siasak ding na khatpeuh tawh a kisun milim bawl loin lim na seek kei ding uh a - numei lim ahi a pasal lim ahi zongin,

¹⁷leitunga om ganhing khatpeuh lim ahi a, huih laka leng vasa khatpeuh lim ahi zongin

¹⁸leitham a bokvak ganhing khatpeuh lim ahi a, tui sunga om ngasa khatpeuh lim tawh ahi zongin a kisun lim na seek loh nadingun kidawm mahmah un.

¹⁹Tuateh vanlam entoin - vantunga na khempeuh - ni, kha, aksite na muh uh ciangin vankikhupsin nuai-a minamte khempeuh tungah TOPA note Pasian in a piak nate lamah kihei-in bia-in kun kha kei un.

²⁰No na hi uh leh TOPA in hong la in, sik haltuina pummei, Egypt panin hong paikhiatpih a, ama gouluah dingin tu-a na om bangun hong omsak hi.

²¹Note hangin kei tungah TOPA heh-a, kiciam takpi khin ahi manin Jordan gun kan loin TOPA note Pasian in na luah dingun hong piak gam hoih ah ka lut kei ding hi.

²²Hih gam ah kei ka si ding hi; Jordan ka kantan kei ding hi; ahi hangin note in na kantan ding uh a, tua gam hoih na la ding uh hi.

²³TOPA note Pasian in no tawh a bawl thukhun na mangngilh khak ding uh kidawm un; TOPA note Pasian in a kham na khatpeuh tawh a kisun lim bawl kei un.

²⁴Ahang in, TOPA note Pasian in a haltum mei, a aam Pasian ahi hi.

²⁵Tu le ta nei in tua gamah na ten khit nungun - kiheisanin, lim khatpeuh bawlin TOPA note Pasian mit ah gitlohna na sep uh a, amah na hehsak uh leh

²⁶Jordan kantan a na lak ding uh gamah na mangthang pah ding uh hi, cih note langah ka teci dingin van le lei tuni-in ka sam hi. Tua lai-ah sawtvei teng loin hong kisusia taktak ding uh hi.

²⁷TOPA in minamte lakah hong thehthang ding a, TOPA hong hawlkhiatte, minamte lakah tawmtawm bek na om ding uh hi.

²⁸Note in tua laiah mihing in a bawl, khua mu thei lo, khua za thei lo, a ne thei lo, a gimnam za thei lo sing le suang pasiante na bia ding uh hi.

²⁹Tua lai panin na lungsim khempeuh uh le na hinna khempeuh uh tawh TOPA note Pasian na zon ciang bekun na mu ding uh hi.

³⁰Note tungah hih na khempeuh hong tungin na lungdon khit uh a ni nunung ciangin TOPA note Pasian kiangah na kileh kik ding uh a, ama thu na mang ding uh hi.

³¹Bang hang hiam cih leh TOPA note Pasian in mi a lainat Pasian ahi manin amah in note hong nusia lo dinga hong susia loin kiciamna tawh a kipsak uh, na pute uh tawh a thukhun a mangngilh kei ding hi.

³²Pasian in mihing a bawl ni-a kipan, note hun mapek tuma hunte kan un; vante mong khat panin mong khat dongah dong un. Hih zah a lian na khatpeuh piang ngei in, hih bang na khatpeuh a kiza ngei peuhmah hiam?

³³Note zaksa bangin mei kuang lakah Pasian a[11] a pauna aw za-a nungta kua om peuhmah hiam?

³⁴TOPA note Pasian in zia-etnate, lim piandangte le a lamdangte, gal, a thahat khut le khut zankhiatna tawh ahikeh a lipkhaphuai sepna tawh na muh mahmah un no ading Egypt ah na khempeuh a sep bangin, pasian khatpeuh in na semin minam khat pan minam dang khat lakkhiat sawm ngei ahi hiam?

³⁵Note in, Pasian ahi TOPA, amah longal adang a om loh lam na theih nadingun hih na khempeuh no hong kilak ahi hi.

³⁶Amah in note hong sek nadingin van panin ama aw hong zasak hi. Leitung ah a mei lianpi hong laka, meikuang lakah ama kammal na za uh hi.

³⁷Amah in na pute uh a it manin amau nunga a suante uh teelin ama Ompihna le a lian mahmah thahatna tawh Egypt panin hong paikhiatpih a,

³⁸na mai panun no sanga a lianzaw, a hatzaw minamte hawlkhia-in amau gamah hong puak-a, na luah dingun hong pia ahi manin, tuni-in hici bangin na om uh hi.

³⁹Tuni-in tunga van le nuai-a lei ah TOPA in Pasian ahina note lungsim ah theicianin ciamteh un. Adang khat beek a om kei hi.

⁴⁰Note le no nunga na tate uh tungah thu hoih in, TOPA note Pasian in na neih den dingun hong piak leitangah sawtpi na ten theih nadingun, tuni-a kong piak ama thukipte le a thupiakte zui un.

⁴¹Tua ciangin Moses in Jordan nisuahna lamah khuapi thum a sehkhia hi.

⁴²Mi khat in a ma-in sawmkhol lo napi a vengpa a thah khak leh tua lai-ah tai thei ding hi. Hih khuapite khatpeuh ah tai-in a nuntakna a hon ding hi.

⁴³Tua khuapite hihte ahi hi: Reuben-te adingin sehnel-gam mualtung zanga om Bezer; Gad-te adingin Gilead a om Ramoth; le Manasseh-te adingin Bashan a Golan ahi hi.

⁴⁴Moses in Israel-te mai-a a lui thukham hih ahi hi.

⁴⁵Hih ngeina, thukipte le thukhamte, Egypt panin a paikhiat uh ciangin Moses in amaute a piak hi-a,

⁴⁶Egypt pana a paikhiat nungun Moses le Israel-te in a zawh uh Heshbon a kumpi a sem Amor-te kumpipa Sihon gam sung ahi, Jordan nisuahna lama om Beth Peor kianga kuam sunga a om laitakun a gen ahi hi.

⁴⁷Amaute in Bashan kumpi Og gam Jordan nisuahna lama Amor-te kumpi nihte gam a laksak uh hi.

⁴⁸Hih gam Arnon Guam kil-a om Aroer panin Siyon b[12] vum (tuapen Hermon) dong kikhungsuk a,

⁴⁹Jordan nisuahna lam Arabah gam khempeuh huamkha-in Pisgah mualdung nuai-a Arabah c[13] Tuipi dong ahi hi.