Read Zokam Thupiakkikna 6 Bible Online

Thupiakkikna 6 - Zokam bible

Thupiakkikna 6

¹Hih thupiakte, thukipte le thukhamte, note in Jordan kantanin na lak ding uh gamah na zuih dingun kong hilh dinga TOPA note Pasian hong piak ahi hi.

²Tua in note le na tate uh le amau khita suak a tate uh tawh hih kong piak thukipte le a thupiakte zui-a TOPA note Pasian kihta in na nuntak uh sawtpi nuam nasak nading uh ahi hi.

³Israel aw za un, na pate uh Pasian TOPA in hong ciamsa bang tektek in bawngnawi le khuaizu a luanna gamah tampitak pha a nuam na sak theih nadingun thu na man ding uh limtakin ngaihsun un.

⁴Israel aw za in: TOPA eite Pasian, TOPA in khat b[15] ahi hi.

⁵TOPA note Pasian na lungsim khempeuh, na hinna khempeuh na hatna khempeuh un it un.

⁶Tuni-a kong piak hih thupiakte na lungsimun vom un.

⁷Na tate uh limtakin ciamtehsak un. Inn ah na om uh ciang; lam na pai uh ciang, na lup uh ciang, na thawh uh ciangin amaute genpih un.

⁸Tuate na khutuah lim bangin hen unla na taltang uah suang un.

⁹Na inn kongkhuamte le na kongpite uh tungah tuate gelh un.

¹⁰TOPA note Pasian in na pate uh, Abraham, Isaac, le Jacob tungah note piak dinga a ciamsa gam - gamzaipi, note phuh loh a etlawm mahmah khuapite,

¹¹note khol loh na hoih khempeuh tawh a dim innte, note tawh loh tuikhukte le na suan loh uh lenggui le olive huante omna ah hong puakin - tuate ne a na kham uh ciangin

¹²salsuahna gam Egypt pan hong paikhiatpih TOPA na mangngilh khak ding uh kidawm un.

¹³TOPA note Pasian kihta unla ama na bek semin ama min ah kiciam un.

¹⁴Note kim-a om midangte’ pasiante nung zui kei un;

¹⁵na zuih uh leh note laka om TOPA note Pasian a aam Pasian hi a, a hehna in note hong kangin, lei maitang panin hong susia ding hi.

¹⁶Massah a na hih bangun TOPA note Pasian zia-et kei un.

¹⁷TOPA note Pasian thupiaknate ngeinakipte le thukipte limtakin zui un.

¹⁸Note adingin a hoih nading le TOPA kiciama na pute uh tunga a ciam gam hoih na luah theih nadingun TOPA muhna ah a hoih le amaanin gamta unla,

¹⁹TOPA gensa bangin na mai-ua galte khempeuh tuancilmang un.

²⁰Mailam hunah na tapate un, "TOPA note Pasian in hong thupiak, ngeinakipte thukipte le thukhamte bang a deihna hiam?" ci-a hong dot uh leh

²¹amaute tungah: "Eite Egypt ah Pharaoh salin i om a, ahi hangin TOPA in khut thahat tawh hong paikhiatpih hi.

²²TOPA in eite mitmuhin alian, a lauhuai - a piandang limte le alamdangte - Egypt tung, Pharaoh le a innkuan buppi tungah a tungsak hi.

²³Ahi hangin amah in kiciama i pute tungah piak dinga a khapsa gamah hong puak dingin tua lai panin hong paikhiatpih hi.

²⁴Eite a tawntungin daupai-a tuni-a bangin i nuntak theih nadingin hih thukipte zui a, TOPA eite Pasian i kihtak nadingin TOPA in thu hong pia hi.

²⁵Ama hong thupiak bangin TOPA eite Pasian mai-ah hih thukham zuih ding i thupi sim leh, tua in eite thumaanna ahi ding hi," ci-in gen un.