Read Zokam Thupiakkikna 8 Bible Online

Thupiakkikna 8 - Zokam bible

Thupiakkikna 8

¹Note nungta-in pungin na pate uh tungah kiciamna TOPA in a khapsa gam ah lut a na lak theih nadingun tuni-a kong piak thupiak khempeuh limtakin zui un.

²TOPA note Pasian in ama thupiakte na zui uh hiam, na zui kei uh hiam cih note lungsim hong sittel nop manin, note hong niamkhiat a kum sawmli sung sehnel-gam lampi ah hong bangci makaih ahi hiam, cih phawk gige un.

³Amah in note hong niamkhiatin hong gilkialsak a, tua ciangin note gen loh na pate un zong a theih nai loh manna in hong vaka, mite anlum bek tawh nungta loin TOPA kam pana pusuak thu khempeuh tawh a nungta ahilam hong hilh hi.

⁴Hih kum sawmli sungin na puansilhte uh patkhia loin na khete uh zong a bawk kei hi.

⁵Tua ahi ciangin pa in a tapa a sek bangin TOPA note Pasian in note hong sek ahilam na lungsim un thei un.

⁶TOPA note Pasian thupiakte zui unla ama lampi tawnin zahtak mahmah un.

⁷Ahang in, TOPA note Pasian in gam hoihna mun - luitui le bualtui omna, mualtung le guam sunga ciktui a luanna gam;

⁸mangbuh le mangbuh-ham, lenggui, theikung, mang-kawlsing, olive thau le khuaizu omna gam;

⁹anlum cilbawl lo-a bangmah kisap lohna gam; suangtumte sik hi-a, mualte panin sumsan na tawhkhiat theih nading uh gam ah note hong puak hi.

¹⁰TOPA note Pasian in gam hoih hong pia ahi manin an ne in na kham uh ciangin amah phat un.

¹¹TOPA note Pasian na mangngilh khak ding uh le tuni-a kong piak ama thupiakte, a thukhamte le a thukipte na zuih loh khak ding uh kidawm un.

¹²Tua hi kei leh, ne in na kham khit uh ciang, inn hoih lamin na ten khit uh ciang,

¹³le na bawng honte uh le na tuuhonte uh khangin tampitak a phak khit ciang, na ngun na khamte uh kibehlapin na neihsa uh a pun ciangin

¹⁴na lungsim uh kiphasakin na salsuahna uh Egypt gam panin note hong paikhiatpih TOPA note Pasian na mangngilh kha ding uh hi.

¹⁵Amah in, a lauhuai sehnel-gam zaipi kantan in tui om lohna keugaw gam sung gul gupha le mom-ai lakah note hong makaih hi. Amah in a sak suangtumpi panin no adingin tui phulkhiasak hi.

¹⁶Sehnel-gam ah na pate un a theih ngei loh uh na nek dingun manna hong pia-a, a tawpna ah note hoih nadingin hong zia-etin hong niamkhiat hi.

¹⁷No le no in, "Ka vangliatna le ka khut thahatna tawh kei ading hauhna hizah hong piangkhia hi," na ci thei ding uh hi.

¹⁸Ahi hangin amah in tuni-a mah bangin na pute uh tungah kiciamin a thukhun lenkip-a, na hauh theihna uh hong pia TOPA note Pasian ahilam phawk un.

¹⁹Note in TOPA note Pasian na mangngilh khak zenzen uh a, pasian dangte nung zui-in tuate bia-a na kun uh leh note hong kisuksiat taktak nading tuni-in note langah teci-in ka om hi.

²⁰TOPA in note mai-ah minamte a suksiat bangin TOPA note Pasian in ama thu na man kei uh leh note zong hong susia ding hi.