Read Zokam John 10 Bible Online

John 10 - Zokam bible

John 10

¹"Thutak kong geninah, tuukhumna kongpi lam pan lut lo-a, mundang ah kahin a lut peuhmah, guta le misuam ahi hi.

²Kongpi lam tawna lutpa ahileh ama tuute a cingpa ahi hi.

³Kong cingpa in amah kong honin tuute in a aw a ngai uh hi. Ama tuute a minin sama a pikhia hi.

⁴Ama aa khempeuh a pikhiat khit ciangin amaute mai-ah amah masa-a, a tuute in a aw thei uh ahi manin anung a zui uh hi.

⁵Ahi hangin a theih loh uh mi nung a zui ngei kei uh hi. A taktakin, a mel a theih loh mite aw thei lo uh ahi manin, amah a taisan ding uh hi," a ci hi.

⁶Jesu in hih bang tehpihna zangin thu gena, ahi hangin amaute tungah bangci nuam hiam cih a theitel kei uh hi.

⁷Tua ahi ciangin Jesu in, "Thutak kong geninah, keimah tuute adingin kongpi ka hi hi.

⁸Ka mai-a hong pai ngei khempeuh gutate le misuamte hi uh a, ahi hangin tuute in amau thu a ngai kei uh hi.

⁹Keimah, tua kongpi ka hi hi; kei hong tawna a lut mi peuhmah kihonkhia a[52] ding hi. Amah sungtumin pusuakkhia dinga lonona a mu ding hi.

¹⁰Gutate ahileh, a gu ding, a that ding le a siasak ding beka pai ahi hi. Kei ka hileh amaute in nuntakna a neih nading, adim a neih nadingun hong pai ka hi hi.

¹¹"Keimah, tuucing hoihpa ka hi hi. Tuucing hoihpa in a tuute ading a nuntakna a pia hi.

¹²A kicial tuucing pen tuu neipa hi lo hi. Tua ahi ciangin keivom pai a muh ciangin a tuute nusia in a taimangsan hi. Tua ciangin keivom in tuute mana, tuuhonte a kithehthangsak hi.

¹³Tua mipa a kicial ahi manin a tuute don lo-a, a taimangsan ahi hi.

¹⁴"Keimah, tuucing hoihpa ka hi hi; ka tuute ka thei-a, ka tuute in zong kei hong thei uh hi.

¹⁵Pa in kei hong theih bang tektekin kei zong Pa ka thei hi - tua hi-a ka tuute ading ka nuntakna ka kham hi.

¹⁶Hih tuu khumna inn sungah a om lo tuu dang zong ka nei hi. Amaute zong kong paipih pelmawh ding hi. Amaute in zong ka aw ngai ding uh a, tuuhon khat omin tuucingpa khat a om ding hi.

¹⁷Ka Pa in kei hong itna pen, ka lakkik dinga ka nuntakna ka kham hang ahi hi.

¹⁸Kei tung pan kuamah in hong lak khiatsak hi lo hi. Keima ut thu-a kikham ka hi hi. Keima ut thu-a kikham-theihna le lakkik-theihna thuneihna ka nei hi. Hih thupiak, ka Pa tung pana ka ngah ahi hi," a ci hi.

¹⁹Hih thute hangin Jew-te a kipawl khen leuleu uh hi.

²⁰Amaute tampi in, "Amah dawi lut-a a haipau ahi hi. Bang dinga ama thu ngai i hi hiam?" a ci uh hi.

²¹Ahi hangin adangte in, "Dawi lut mi thugen hih bang hi lo hi. Dawi in mittawte mit vaksak thei ding hiam?" a ci uh hi.

²²Tua ciangin Jerusalem ah Apna b[53] Pawi a tung hi. Phalbi lai hi a,

²³biakinnpi huang sunga om, Solomon Talap sungah Jesu a vak kawikawi hi.

²⁴Jew-te a kimah va kikhawm uh a, "Bang tan vei lungsim laklawha hong koih ding na hi hiam? Nang, Christ c[54] na hileh siangtakin hong gen dih in," a ci uh hi.

²⁵Jesu in, "Kong gen hangin na um kei uh hi. Ka Pa min a ka bawl nalamdangte in kei adingin gen khin zo hi.

²⁶Ahi hangin ka tuute hi lo na hi manun na um kei uh hi.

²⁷Ka tuute in ka aw a ngai uh hi; keimah in amaute ka thei-a amaute in kei hong zui uh hi.

²⁸Amaute nuntak tawntungna ka pia-a, a mangthang ngei kei ding uh hi; amaute ka khut sung pan kuamah in a lakhia thei kei ding hi.

²⁹Amaute hong pia ka Pa, na khempeuh sangin lianzaw a, d[55] ka Pa khut panin kuamah in hong sutkhia thei kei ding hi.

³⁰Kei le ka pa, khat ka hi uh hi," ci-in a dawng hi.

³¹Jew-te in amah deng dingin suang a tawm leuleu uh hi.

³²Ahi hangin Jesu in amaute kiangah, "Pa kiang pana nalamdang a thupi tampite kong lak zo hi. Tuate lakah a koi pen hanga kei suang tawh hong deng ding na hi uh hiam?" a ci hi.

³³Jew-te in, "Tua thute khatpeuh hanga nang suang tawh hong deng ding ka hi kei uh hi. Pasian na gendaina hanga hong deng ding ka hi uh hi; bang hang hiam cih leh mihing leltak khat Pasian na kici hi," ci-in a dawng uh hi.

³⁴Jesu in amaute kiangah, "Note’ Thukham sungah, ‘Note pasiante na hi uh hi, ka ci zo hi,’ e[56] ci-in kigelh hi lo hiam?

³⁵Amah in Pasian thu tunna amaute ‘pasiante’ ci ahileh, Laisiangtho thu lah kipelh thei lo dinga,

³⁶Pasian in ama aa mahmah a, a sehtuampa le leitunga, a sawlpa kua hi ding hiam? ‘Pasian Tapa ka hi hi’ ka cih mana bang hangin Pasian gendai a hong ngawh na hi uh hiam?

³⁷Ka Pa hih banga ka hih keileh hong um kei un.

³⁸Ahi hangin Pa hih banga ka hih leh kei nong um kei uh zongin, kei sungah Pa om a, Pa sungah kei om ka hilam thei in, na theihtel theih nadingun nalamdangte na um beek un," a ci hi.

³⁹Amaute in amah mat sawm leuleu uh a, ahi hangin amaute khut panin a suakta hi.

⁴⁰Tua ciangin ni masa lai-a, John in a baptisena mun Jordan galah Jesu a pai kik hi. Hih lai-ah amah taam a,

⁴¹a kiangah mi tampi a va pai uh hi. Amaute in, "John in na lamdang a bawl ngei loh hangin hih mipa thu a gen khempeuh amaan hi," a ci uh hi.

⁴²Tua munah mi tampi in Jesu a um uh hi.