Read Zokam John 11 Bible Online

John 11 - Zokam bible

John 11

¹Amah Mary le a sanggamnu Martha tenna Bethany khua mi ahi Lazarus kici mi khat a ci na hi.

²Hih a cina pa sanggamnu Mary pen, Topa tunga sathau namtui sunga a khepekte a sama a nulsaknu mah ahi hi.

³Tua ciangin a sanggam numeite in Jesu kiangah, "Topa aw, na itpa cina hi," ci-in kam a vaikhak uh hi.

⁴Jesu in hih thu a zak ciangin, "Hih natna sih nading hi lo hi. Hi lo hi, hih tungtawnin Pasian Tapa kiminthangsaka Pasian in minthanna a ngah nading ahi hi," a ci hi.

⁵Jesu in Martha le a sanggamnu le Lazarus a it hi.

⁶Ahi zongin amah in Lazarus cina hi cih za napi a omna mah ah ni nih a taam lai hi.

⁷Tua ciangin ama nungzuite kiang ah, "Judea ah ciah kik ni," a ci hi.

⁸Ahi hangin amaute in, "Rabbi aw, Jew-te in suang tawh den hong sawm uh sawt nai lo hi, tuapi mah tua lai-ah pai kik ding na hi hiam?" a ci uh hi.

⁹Jesu in, "Khuavak hun sung nai sawm-le-nih pha hi lo ahi hiam? Sun lai-a lampaite in hih leitung khuavak hangin khua mu ahi manin a kisuikha kei ding hi.

¹⁰Zanin lam a pai ciangin khua vak lo ahi manin a kisuikha uh hi," ci-in a dawng hi.

¹¹Hih teng a cih khit ciangin amaute tunga a thugen ban zomlai-a, "I lawmpa Lazarus ihmu hi, ahi hangin amah phong dingin tua lai-ah ka pai ding hi," a ci hi.

¹²A nungzuite in, "Topa, ihmu ahileh a nuamtuam ding hi," ci-in a dawng uh hi.

¹³Jesu in a si a genna hi napi, a nungzuite in ihmut ngei-a ihmu a sa uh hi.

¹⁴Tua ciangin amaute kiangah, Lazarus si zo hi;

¹⁵na up theih nadingun kei tua lai-a ka om loh note adingin ka nuam hi. Ahi zongin ama kiangah pai ni," ci-in a telgen hi.

¹⁶Tua ciangin Thomas (Didymus kici) in a nungzui dangte kiangah, "Amah tawh i sihkhawm theih nadingin ei zong va zui ni," a ci hi.

¹⁷Jesu a tun ciangin, Lazarus han sungah a om zawh ni li pha zo hi, cih a thei hi.

¹⁸Jerusalem panin Bethany tai a[57] nih sangin naizaw a,

¹⁹a sanggampa sihna hangin Mary le Martha hehnem dingin Jew-te tampi a pai uh hi.

²⁰Martha in Jesu tung ta cih a zak ciangin a dawn dingin paikhia-a, inn ah Mary a om lai hi.

²¹Martha in Jesu kiangah, "Topa, hih lai-ah om lecin ka sanggampa a si kei ding hi.

²²Ahi hangin tu nangawnin na nget peuhpeuh Pasian in hong pia ding cih ka thei hi," a ci hi.

²³Jesu in tuanu kiangah, "Na sanggam-pa a tho kik ding hi," a ci hi.

²⁴Martha in, "Ni tawp ni-a thawhkik hun ciangin a thawh kik ding ka thei hi," ci-in a dawng hi.

²⁵Jesu in tuanu kiangah, "Keimah in, thawhkikna le nuntakna ka hi hi. Kei hong um mi a sih hangin a nungta ding hi;

²⁶nungta-a kei hong um peuhmah a si ngei kei ding hi. Hih thu na um hiam?" ci-in a dong hi.

²⁷Tuanu in, "Ka um hi Topa aw, leitunga hong pai ding Pasian Tapa Christ b[58] na hi, cih ka um hi," ci-in a gen hi.

²⁸Hih teng a gen khit ciangin kileh kika, a sanggamnu Mary a va sam tuam hi. Amah in, "Siapa hih lai ah om-a, nang hong kan hi," a ci hi.

²⁹Mary in hih thu a zak ciangin dingkhia vat-a a kiangah a va pai hi.

³⁰Tua hunin Jesu khua sungah lut nai lo a, Martha tawh a kituahna mun ah om lai hi.

³¹Inn sunga Mary tawh a om, amah a hehnem Jew-te in, Mary thakhatin dinga a paikhiat a muh uh ciangin han ah pai-a a va kap ding sa in a zui uh hi.

³²Jesu omna mun ah Mary tunga, amah a muh ciangin a khephung ah bokin, "Topa, nang hih lai-ah om lecin ka sanggampa a si kei ding hi," a ci hi.

³³Jesu in tuanu kah mu a, amah a zui Jew-te zong a kah uh a muh ciangin a lungsim ah na sa mahmah in a lunggim hi.

³⁴Amah in, "Amah koi-ah sial na hi uh hiam?" ci-in a dong hi. Amaute in, "Topa aw, hong pai inla hong en dih in," a ci uh hi.

³⁵Jesu a kap hi.

³⁶Tua ciangin Jew-te in, "En sin uh, nak it mahmah si!" a ci uh hi.

³⁷Ahi hangin amaute pawlkhat in, "Mittawte khua a musak theipa in amah silosak thei lo hi ve maw?" a ci uh hi.

³⁸Jesu, a lungsim sunga na sa mah mah kawmin han lam zuanin a pai hi. Tua han, a vang suangpek a kikhak kawhawm khat ahi hi.

³⁹Jesu in, "A suang lakhia un," a ci hi. Misipa sanggamnu Martha in, "Ahi zongin Topa, tua lai-a a om zawh ni li pha khin ta a tu-in namsia ta hi," a ci hi.

⁴⁰Tua ciangin Jesu in, "Na up leh Pasian minthanna na mu ding hi, hong ci zo hi lo ka hi hiam?" a ci hi.

⁴¹Tua ciangin suang a likkhia uh hi. Tua khit ciangin Jesu dakto a, "Pa aw, kong ngetna hong zazo na hi manin ka lung dam hi.

⁴²Ka thu nong sang tawntung cih ka thei hi. Ahi hangin hih lai-a ding mite phattuam nading, nang kei hong sawl na hilam a up nading uh deihna-in hih ka gen hi," a ci hi.

⁴³Hih teng a cih khit ciangin Jesu in, "Lazarus, hong paikhia ou!" ci-in nakpi in a sam hi.

⁴⁴Misipa paikhia-a, a khut le a khete hanpuan tawh kitunin, a maitang puan khatin a kituam hi. Jesu in amaute kiangah, "Han puante phelkhia unla, amah paisak un," a ci hi.

⁴⁵Tua ahi manin Mary inn-a a hawh, Jesu sepsa a mu Jew-te tampi in amah a um uh hi.

⁴⁶Ahi hangin pawlkhatte Pharisee-te kiangah pai uh a, Jesu hihsa teng a gen uh hi.

⁴⁷Tua ciangin siampi makaite le Pharisee-te in Sanhedrin kikhop a sam uh hi. Amaute in, "A bangci tazen i hi hiam? Hih mipa in limlamdangte bawlbawl a;

⁴⁸hih banga i hih saksak leh mi khempeuh in amah um ding uh a, tua ciangin Rome mite hong kuanin i mun c[59] le i minam a lamang ding uh hi," a ci uh hi.

⁴⁹Tua ciangin amaute lakah tua kum a tulpi a sem Caiaphas kici pa paukhia a, "No bangmah thei kei uh teh!

⁵⁰Minam khat a bupa a manthan sangin mipite tangin mi khat si leh a hoihzawk lam na phawkkha kei uh hi," a ci hi.

⁵¹Amah in ama lungsim puaka hih thu a gen hi lo hi. Ahi hangin tua kuma tulpi ahi bangin Jew minam tangin Jesu si ding hi, cih a genkhol hizaw hi.

⁵²Tua minam tang ding bek hi loin a kitheh thang Pasian tate tang ding zong hi a, amaute kaikhawm kikin khat a suahsak nading ahi hi.

⁵³Tua ahi ciangin tua ni-a kipan amah thah nading a gelsim uh hi.

⁵⁴Tua ahi manin Jew-te lakah mipi theihin Jesu a pai nawn kei hi. Tua sangsikin sehnel-gam gei Ephraim khua omna kualah kileh kik zaw a, a nungzuite tawh tua lai-ah a om uh hi.

⁵⁵Jew-te Paisan-pawi hun a nai mahmah ciangin kisakkholhna, Paisan-pawi ma-a biakna ngeina-a kisiansuahna bawl dingin gamsung khua panin mi tampi Jerusalem ah a paito uh hi.

⁵⁶Amaute in Jesu zongzong uh a, biakinnpi huang-sung tengah dingin, "Nang bang na ci ngaihsut hiam? Pawi sungah amah hong pai lo ding hi ve maw?" a kici uh hi.

⁵⁷Ahi hangin siampi makaite le Pharisee-te in, amah a mat theih nadingun Jesu omna mun a mu a om leh amau kiangah a va gen nadingun thu a pia uh hi.