Read Zokam John 12 Bible Online

John 12 - Zokam bible

John 12

¹Paisan-pawi ma ni guk laitakin Jesu in misi pana a thawhsakpa Lazarus tenna Bethany ah Jesu a tung hi.

²Hih lai-ah Jesu pahtawina in nitak-an kivak hi. Martha in an nek ding bawl-a sabuai-a kingamte lakah Lazarus a om hi.

³Tua ciangin Mary in nard sathau citak a namtui, a manpha mahmah pint a[60] khat tawi a, Jesu khepekte buakin a sam tawh a khepekte a nul hi. Tuateh sathau namtui gim in inn sung khempeuh a zel khin hi.

⁴Ahi hangin a nungzuite khat, a nung cianga amah lehhek ding pa Judas Iscariot in,

⁵"Bang hanga hih sathau namtui zuaka a sum mizawngte kipia zaw lo ahi hiam? Tua in kum khat thaman b[61] zah man hi," a ci hi.

⁶Amah in mizawngte a khualna tawh a cih hi loin amah guta ahi man ahi hi; amah sum-ip kem hi-a tua sunga kikoihte ama adingin a la zelzel pa ahi hi.

⁷Jesu in, "Amah bangmah cih dah un, ka kivui ni cianga dingin a sit sathau namtui zang ahi hi.

⁸Note mizawngte tawh na om khawm lai ding uh hi. Ahi hangin kei tawh na omkhawm tawntung kei ding uh hi," a ci hi.

⁹Tua hun sungin Jesu tua lai-a a om lam Jew mihon tampi in a theih uh ciangin a va pai uh hi. Ama hang bek hi loin misi pana a thawhsakpa Lazarus zong a mu nuam uh hi.

¹⁰Tua ahi ciangin siampi makaite in Lazarus zong thah a sawm uh hi.

¹¹Ahang in, ama hangin Jesu lamah Jew-te kihei uh a, amah a muang uh hi.

¹²A zing ciangin Pawi sima pai mihon tampi in, Jesu in Jerusalem zuan, cih thu a za uh hi.

¹³Amaute nisuh hiang tawi-in amah dawn dingin paikhia uh a, "Hosanna!" c[62] "Topa mina hong paipa in thupha a ngah hi!" d[63] "Israel Kumpipa in thupha a ngah hi!" ci-in a awng uh hi.

¹⁴Jesu in laano khat mu a,

¹⁵"Zion Tanu aw, lau kei in; en in, na kumpipa laapi ta laano tungah tuangin hong pai hi," ci-a kigelhsa bangin tua tungah a tuang hi. e[64]

¹⁶A tunglai teng a nungzuite in hihte khempeuh a theitel kei uh hi. Jesu a kipahtawi khit ciang bekin ama thu hih banga, a kigelh lam le amaute in hih banga hih uh ahilam a thei pan bek uh hi.

¹⁷Tua laitakin amah tawh a om khawm mihonpite in, amah in han sung panin Lazarus sama, misi pan a thawh sakna thu a thangsak beh lailai uh hi.

¹⁸Hih nalamdang a bawlna thu a zak manun mi tampite amah dawn dingin a kuankhia uh hi.

¹⁹Tua ciangin Pharisee-te in, "Thei un, bangmah i lawh zo nawn kei hi. Leitung bupin ama nung zui khinmang uh hi!" a kici uh hi.

²⁰Pawi sunga Pasian bia dinga pai mite lakah Greek-te pawlkhat a om uh hi.

²¹Amaute Galilee gama Bethsaida a teng Philip kiangah pai uh a, "Sia aw, Jesu ka mu nuam uh hi," ci-in a thum uh hi.

²²Philip in Andrew ko-a Andrew le Philip in Jesu a ko sawn uh hi.

²³Jesu in, "Mihing Tapa a kimin-thansak hun tung zo hi.

²⁴Thutak kong geninah, mangbuh tang khat lei lakah kia-a, a sih phot kei leh a tang khat guak mah om niloh hi. Ahi hangin a sih leh tang tampi a suang hi.

²⁵Ama nuntakna a it mi in taan dinga, hih leitunga, a nuntakna a mudah mi in nuntak tawntungna adingin a kemcing ding hi.

²⁶Ka na a sem peuhmah in kei hong zuih pelmawh kul-a, kei omna ah ka nasempa zong a om ding hi. Ka na a sem mi peuhmah ka Pa in a pahtawi ding hi.

²⁷"Tu-in ka lungmang hi, bang ka ci gen ding hiam? ‘Pa aw, hih hun panin hong hon in,’ ka ci ding hiam? Ka ci kei ding hi, hih hang maha hih hun dong a tung ka hi hi.

²⁸Pa aw, na min thangsak in!" a ci hi. Tua ciangin, "Ka thangsak zo a, ka thangsak lai ding hi," ci-in vantung pan aw khat a ging hi.

²⁹Tua lai-a om mihonpite in za uh a, vanging hi, a ci tawh, vansawltak in amah hopih hi, a ci tawh a om uh hi.

³⁰Jesu in, "Hih aw, kei phattuam nading hi loin note ading ahi hi.

³¹Hih leitunga thu khen ding tu hun ahi hi; hih leitung a ukpa tu-in kihawlkhia ding hi.

³²Ahi hangin kei ka hileh leitung pan hong kikhaitoh ciangin kei lamah mi khempeuh ka huai ding hi," a ci hi.

³³Hih bang a cih ciangin a sih cianga a sihzia ding lak ahi hi.

³⁴Mihonpite in, "Thukham sungah, ‘Christ, a[65] a om tawntung ding hi,’ cih ka za uh hi. Tua hi napi bang dinga, ‘Mihing Tapa kikhaito ding,’ ci thei na hi hiam? Hih Mihing Tapa kua ahi hiam?" a ci uh hi.

³⁵Tua ciangin Jesu in amaute kiang ah, "Note in tawmvei sung bek khuavak na nei lai ding uh hi. Khuamial in hong lap ma-in khuavak na neih lai-un pai un. Khuamial laka paite in a pai nading uh a thei kei uh hi.

³⁶Khuavak tate na suah theih nadingun khuavak na neih lai-un khuavak muang un," a ci hi. Thu a gen khit ciangin Jesu paikhia a, amaute lak pan a kisel hi.

³⁷Jesu in amaute om-a, hih lim lam dangte a bawl khit nangawnin amaute in a um tuan kei lailai uh hi.

³⁸Hih in kamsangpa Isaiah gen: "Topa aw, ka thugen kuan um-a, kua tungah Topa khut kilaak hiam?" b[66] a cih thu a tangtunsak nading ahi hi.

³⁹Hih thu hangin amaute in a um thei kei uh hi. Bang hang hiam cih leh Isaiah in mun dangah:

⁴⁰"Amah in amaute mit tawsakin, a lungtangte uh sisak hi, tua ahi manin a mit uh tawh bangmah mu thei lo uh a, a lungtang uh tawh zong bangmah theitel thei loin a kihei thei kei uh hi - tua hi kei leh amaute ka damsak kha ding hi," c[67] ci hi.

⁴¹Isaiah in Jesu minthanna mu zo ahi manin ama thu a na gen ahi hi.

⁴²Tua hi napi a makai tampite lak nangawn ah tua hun mahmah in tampi in amah a um uh hi. Ahi zongin Pharisee-te in synagogue pan a hawlkhiat ding a lau manun a upna uh a pulakkhia ngam kei uh hi.

⁴³Ahang in, amaute in Pasian phatna sangin, mihing phatna a itzaw uh hi.

⁴⁴Tua ciangin Jesu in, "Mi khat in kei hong up leh, kei bek hong um kei hi. Kei hong sawlpa zong a um hi.

⁴⁵Kei hong et ciangin kei hong sawlpa a mu hi.

⁴⁶Kei hong um khat beek khuamial ah a om loh nadingin khuavakin leitung ah hong pai ka hi hi.

⁴⁷"Ka thugente za napi a zui lo mi tungah thu ka khen kei ding hi. Ahang in, leitung thukhen dinga hong pai ka hi kei a, a honkhia dinga hong pai ka hizaw hi.

⁴⁸Kei hong nial a, ka thugente a sang lo mi ading thukhenpa khat a om hi. Ni nunung ni ciangin tua ka thu genkhiat tektek in amah a mawhpaih ding hi.

⁴⁹Ahang in, keima ut thu-a gen ka hi kei a, kei hong sawl Pa in bang thu gen dinga, bangci gen ding cih hong thu piaksa bek ka gen hi.

⁵⁰Hih thupiakna in nuntak tawntungna tun hi cih ka thei hi. Tua ahi ciangin ka gen peuhmah Pa in kei gen dinga hong hilh tektekte bek ka gen hi," ci-in a kiko hi.