Read Zokam John 13 Bible Online

John 13 - Zokam bible

John 13

¹Tua hun, Paisan Pawi madiak ahi hi. Jesu in hih leitung nusia in, Pa kiangah a pai hun ta, cih a thei hi. Hih leitunga om ama mite it a, amaute a itna d[68] a vekpi-in tu-in a lak hi.

²Nitak-an nek laitakin dawimangpa in Simon tapa Judas Iscariot tungah Jesu a lehhek nadingin tawsawn khin zo hi.

³Pa in ama vangliatna nuai-ah na khempeuh koihin amah Pasian kiang pana hong pai hi-a, Pasian kiangah a ciah kik ding ahi hi, cih Jesu in a thei hi.

⁴Tua ahi ciangin ankuang um kimlai dingkhia-a a puantungsilh suahkhia in mainulpi khat a kawngah a vial hi.

⁵Tua khit ciangin kuang sungah tui sunga, a nungzuite khe silsakin, a kawnga a vialh mainulpi in a nulkeusak hi.

⁶Simon Peter ciang tunga amah in, "Topa nang lawmlawm in ka khe hong silsak zawzen ding na hi hiam?" a ci hi.

⁷Jesu in, "Tu-in bang hih ka hi hiam, cih na thei kei hi, ahi hangin nung ciangin na theihtel ding hi," ci-in a dawng hi.

⁸Peter in, "Hi kei, ka khe na sil ngei kei ding hi," a ci hi. Jesu in, "Nang kong sil kei leh kei tawh a kipawl lo na hi hi," ci-in a dawng hi.

⁹Simon Peter in, "Tua ahileh Topa aw, ka khe bek hi loin ka khutte le ka lu zong hong silsak in!" a ci leuleu hi.

¹⁰Jesu in, "A kipumsilsate, a khe bek sil kul hi; a pumpi khempeuh a siang hi. Note na siang uh hi, ahi hangin na vekpi un na siang kim kei uh hi," ci-in a dawng hi.

¹¹Amah in a lehhek ding pa thei zo ahi manin, note na siang kim kei uh hi, a ci ahi hi.

¹²Amaute khe a silsak a man ciangin a puan silha, a tutna munah a pai kik hi. Amaute kiangah, "Note adinga ka septe na theitel uh hiam?" ci-in a dong hi.

¹³"Note in kei ‘Sia’ le ‘Topa’ nong ci uh a, amaan hi; kei zong tua mah ka hi hi.

¹⁴Tu-in keimah na Topa le na Siapa un na khe uh hong silsak ka hileh, no zong khat le khat na khe uh na kisilsak ding uh hi.

¹⁵Note tunga ka hih banga na hih dingun na etteh ding uh kong lak zo hi.

¹⁶Thutak kong geninah, a pu sangin a nasemte a lianzaw kei hi. Tua mah bangin thupuapa in a sawlpa sangin a lianzaw kei hi.

¹⁷Hihte thei khin na hi uh ciangin na sep uh leh thupha na ngah ding uh hi.

¹⁸"Note na vekpi un kong ci khin kei hi; ka teelsate ka thei hi. Ahi zongin hih in, Laisiangtho sunga; ‘An ka nekkhawm pihpa in kei langah a khetul a liikto zo hi,’ e[69] a cih thu a tangtunsak nading ahi hi.

¹⁹"Hih thu a pian ciangin kei amah ka hilam na up nadingun a pianma tu-in note tungah kong gen khol hi.

²⁰Thutak kong geninah, ka sawl mi khatpeuh a sang peuhmah, kei hong sang ahi hi; kei hong sang peuhmah, kei hong sawlpa a sang ahi hi," a ci hi.

²¹Jesu in hih teng a cih khit ciangin a lungsim buai mahmah a, "Thutak kong geninah, note lakah khat in kei nong lehhek ding uh hi," ci-in a telgen hi.

²²Kua a cihna hiam cih thei zo loin a nungzuite khat le khat a ki-en uh hi.

²³Amaute lakah khat, Jesu in a it nung zuipa ama zomah a kingam hi.

²⁴Simon Peter in hih nungzuipa suphei a, "Kua gen hiam, na dong dih in," a ci hi.

²⁵Amah Jesu lamah awnphei a, "Topa kua gen na hiam?" ci-in a dong hi.

²⁶Jesu in, "Hih anlum them khat kuang sungah diaha, ka piak ding pa ahi hi," ci-in a dawng hi. Tua ciangin anlum them khat diah a Simon tapa Judas Iscariot a pia hi.

²⁷Judas in anlum a san phetin a sungah Satan a lut hi. Jesu in, "Na hih ding manlangin hih in," a ci hi.

²⁸Ahi hangin ankuang umte khat beek in, Jesu in bang hanga hih banga ama kiangah ci hiam, cih a thei kei uh hi.

²⁹Pawlkhatte in, Judas sum kem ahi ciangin Pawi-a zat ding na kisam khatpeuh lei dinga sawl ahikeh mi zawngte na khatpeuh pia dinga sawl hi ding hi, ci-in a ngaihsun uh hi.

³⁰Anlum a san khit phetin Judas a paikhia hi. Tua hun zan laitak ahi hi.

³¹Amah a paikhiat khit ciangin Jesu in, "Tu-in Mihing Tapa kipahtawi-a, ama sungah Pasian a kipahtawi hi.

³²Ama sungah Pasian a kiminthansak a[70] leh Pasian in ama sungah Tapa minthangsak dinga, amah minthangsak pah ding hi.

³³"Ka tate aw, note tawh tawmvei sung bek ka omkhawm lai ding hi. Note in kei nong zong ding uh hi, Jew-te ka hilh bangin note kong hilh hi: Ka paina munah nong pai thei kei ding uh hi.

³⁴"Thupiak thak khat note kong pia hi: Khat le khat na ki-it un. Keimah in note kong it bangin note khat le khat na ki-it pelmawh un.

³⁵Note khat le khat na ki-it uh leh ka nungzuite na hilam uh mi khempeuh in a thei ding uh hi," a ci hi.

³⁶Simon Peter in, "Topa koi-ah pai ding na hi hiam?" ci-in a dong hi. Jesu in, "Ka pai nading mun ah tu-in nong zui thei kei ding uh hi, ahi hangin tunung ciangin nong zui ding uh hi," ci-in a dawng hi.

³⁷Peter in, "Topa, bang dingin tu-a hong zui thei lo ding ka hi uh hiam? Nang adingin ka nuntakna ka pai ding hi," a ci hi.

³⁸Tua ciangin Jesu in dawnga, "Nang, kei adingin na nuntakna paitakpi ding na hi hiam? Thutak kong geninah, ak khuan ma-in kei thumvei nong kitheihmawhbawl ding hi!