Read Zokam John 15 Bible Online

John 15 - Zokam bible

John 15

¹"Keimah lenggui taktak ka hi-a, ka Pa, tua lo neipa ahi hi.

²Kei sungah oma, a gah lo hiang peuhmah a sattan hi; a gah hiang peuhmah tam a gah zawk nadingin heuhin a hahsiang a[74] hi.

³Note tungah kong gensa thu hangin na siang khin ta uh hi.

⁴Keima sungah om un, note sungah ka om ding hi. Amah beka gah thei hiang a om kei hi. A guipi-ah a om pelmawh kul hi. Note zong keima sunga na om kei uh leh na gah thei kei ding uh hi.

⁵"Keimah, lengguipi ka hi hi. Note hiangte na hi uh hi. Mi khat kei sungah oma, ama sungah kei ka om leh gah tampi a gah ding hi. Kei loin bangmah na hih thei kei uh hi.

⁶Mi khatpeuh kei sungah a om kei leh amah, a kipaimang a vul hiang tawh kibang hi. Tua bang hiangte kitawmin mei sungah kikhula, a kangtum hi.

⁷Kei sungah na om uh a, ka thute no sungah a om leh na ut peuhpeuh uh na ngen un; hong kipia ding hi.

⁸Note in gah tampi na gah uh a, ka nungzuite na hina uh na lahna uh, ka Pa minthanna ahi hi.

⁹"Ka Pa in kei hong itsa bangin note kong it zo hi. Tu-in ka itna sungah om un.

¹⁰Ka Pa thupiakte manga ama itna sungah ka om bang tektekin, kong thupiakte na man uh leh ka itna sungah na om ding uh hi.

¹¹Ka lungnopna note sungah om a, note lungnopna a kicin theih nadingin hih thu kong gen zo hi.

¹²Kong thupiak hih ahi hi: Note kong it bangin note khat le khat na ki-it thuk un.

¹³A lawmte tang dinga a nuntakna a paai itna sanga itna lianzaw a nei kuamah om lo hi.

¹⁴Ka thupiak na zuih uh leh ka lawmte na hi uh hi.

¹⁵Silate in a pu nasep thei lo uh ahi manin note silate kong ci nawn kei hi, tua sangsikin ka Pa tung pana ka theih khempeuh note hong theisak khin ka hi manin lawmte kong ci ta hi.

¹⁶Note in kei nong teel kei uh a, keimah in pai-a gah a gah tawntung dingin note kong teel hi. Tua ciangin ka min suanga na nget peuhpeuh uh Pa in note hong pia ding hi.

¹⁷Ka thupiak hih ahi hi: Khat le khat ki-it thuk un.

¹⁸"Leitung in note hong muhdah leh, kei hong mudah masa hi, cih thei gige un.

¹⁹Leitung aa na hi uh leh ama aa bangin note hong it ding hi. A taktak in leitung aa na hi kei uh hi. Keimah in leitung mite lak panin note kong teelkhia zo hi. Tua hangin leitung in note hong mudah hi.

²⁰Note tunga kong gensa thute ciamteh un: ‘A pu sanga lianzaw nasem kuamah a om kei hi.’ b[75] Amaute in kei hong bawlsia uh ahileh, no zong hong bawlsia ding uh hi. Amaute in ka hilhna a man’ uh leh no aa zong a mang ding uh hi.

²¹Ka min hangin amaute in note hih bangin hong bawl ding uh hi. Ahang in, amaute in kei hong Sawlpa a thei kei uh hi.

²²Amaute kiangah hong pai-in thu gen lo hi leng khialhna hanga a mawh a suak kei ding uh hi. Ahi zongin tu-in ahileh a mawhna uh paulap ding a nei kei uh hi.

²³Kei hong mudahte in ka Pa zong a mudah uh hi.

²⁴Amaute lakah kuama bawl loh va bawl kei leng, amaute khialhna hangin a mawh suak lo ding uh hi. Ahi hangin tu-in hih nalamdangte mu zo uh a, tua hi napi amaute in kei le ka Pa hong mudah khawm uh hi.

²⁵Ahi hangin hih in amaute thukham sunga kigelhsa: ‘Amaute in ahang om lopi-in kei hong mudah uh hi,’ c[76] cih a tangtunna ahi hi.

²⁶"Pa kiang pana no kianga kong sawl ding, Pa kiang pana hong paikhia thutak Kha - Thukuppihpa hong pai ciangin kei tungtang thu teci a pang ding hi.

²⁷Note zong a cil a kipan kei tawh om khawm na hi uh ciangin teci na pang pelmawh ding uh hi.