Read Zokam John 17 Bible Online

John 17 - Zokam bible

John 17

¹Jesu in hih teng a genkhit ciangin vantung lam entoin thu ngen a: "Pa aw, a hun tung zo hi. Na Tapa in nang hong minthansak theih nadingin, na Tapa minthangsak in.

²Ahang in, amah na piaksa mi khempeuh tungah nuntak tawntungna a piak theih nadingin mi khempeuh tunga thuneihna amah na pia zo hi.

³Tu-in hih in nuntak tawntungna ahi: nang bek a maan Pasian na hina le na sawlpa Jesu Christ a theihna uh ahi hi.

⁴Ka hih dinga nong piakte zawhsiangna tawh leitungah minthanna nang kong puak zo hi.

⁵Tu-in ahileh Pa aw, leitung a om ma-a nang tawh ka neih minthanna-in kei hong minthangsak in.

⁶"Leitung pana nong piakkhiatte tungah nang c[79] na laakkhia zo hi. Amaute nang aa ahi uh hi; amaute kei nong pia zo-a na thu a mang uh hi.

⁷Tu-in amaute in kei nong piak khempeuh nang kiang pana hong pai ahilam thei ta uh hi.

⁸Ahang in, kei nong piak thute, amaute ka pia-a, tuate a sang uh hi. Amaute in nang kiang pana pai ka hilam theitel uh a, nang kei nong sawl zong a um uh hi.

⁹Amaute ading thu kong ngetsak hi. Leitung ading kong ngen kei hi. Ahi hangin nong piaksate ading kong ngen hi. Ahang in, amaute nang aa ahi uh hi.

¹⁰Kei neih khempeuh nang aa hi-a, nang neih khempeuh kei aa ahi hi. Tua hi-a, amau tungtawnin minthanna ka ngah hi.

¹¹Leitung ah sawt ka om nawn kei ding hi. Ahi hangin amaute leitung ah om lai ding uh a, nang kiangah kei kong pai ding hi. A Siangtho Pa aw, nang le kei khat i hi bangin, amaute khat ahi theih nading un kei nong piaksa min - nangma min vangliatna tawh amaute hu in.

¹²Amaute tawh ka omkhawm laitakin, nong piaksa min tawh amaute bittakin ka hu zo hi. Laisiangtho a tangtun nadinga a mang thang pa pen simloh khat beek ka mansuah kei hi.

¹³"Tu-in nang kiangah kong pai ta ding hi. Ahi hangin amaute in amau sungah ka lungnopna a dim a neih theih nadingun leitung a ka om laitakin hih thute ka gen hi.

¹⁴Amaute tungah na thu ka pia khin a, kei leitung aa ka hi lo bangin amaute zong leitung aa hi nawn lo uh ahi manin leitung in amaute a mudah hi.

¹⁵Amaute leitung pan na lakkhiat ding kong ngen kei hi. Ahi hangin gilopa panin na hut ding kong ngen hi.

¹⁶Kei, leitung aa ka hi lo bangin, amaute zong leitung aa hi lo uh hi.

¹⁷Amaute thutak tawh siangthosak a[80] in; na thu thutak ahi hi.

¹⁸Leitungah kei nong sawl bangin, amaute leitungah ka sawl zo hi.

¹⁹Amaute zong a siantho takpi nadingun keimah le keimah ka kisiangthosak hi.

²⁰"Amaute ading kia kong ngen kei hi. Amaute thupuakte tungtawn a kei hong um ding mite adingin zong kong ngen hi.

²¹Pa aw, nang kei sungah na om a, kei nang sungah ka om bang tektekin amaute khat a suah theih nadingun kong ngen hi. Nang, kei nong sawl ahilam leitung in a up nadingin amaute zong ei sungah om uh hen.

²²Eite khat i hi mah bangin amaute zong khat ahi theih nadingun nong piaksa minthanna amaute ka pia zo hi.

²³Amaute sungah kei ka oma kei sungah nang na om hi. Nang, kei nong sawl le kei nong it bangin amaute na it cih leitung in a theih nadingin amaute kiciantakin pumkhat suak uh hen.

²⁴"Pa aw, nong piaksa mite ka omna-ah kei tawh a om khawm ding le nong it mana leitung piansak ma-a minthanna nong piak keima minthanna a muh ding uh ka deih hi.

²⁵"A thumaan Pa aw, leitung in nang hong thei kei zongin, ken nang kong thei-a, nang, kei nong sawl amaute in a thei uh hi.

²⁶Amaute tungah nang kong pulak zo-a, nangmah in kei nong itna amaute aa ahi theih nading le kei mahmah amaute sungah ka om theih nadingin kong pulak lai hi," a ci hi.