Read Zokam John 18 Bible Online

John 18 - Zokam bible

John 18

¹Jesu in thu a nget khit ciangin a nungzuite tawh tua mun nusia in Kidron Kuam a kantan uh hi. Tua kuam galkhatah Olive lo khat a om hi; tua lo sungah amah le a nungzuite a lut uh hi.

²Jesu le a nungzuite tua lai-ah kituah pahpah uh ahi manin amah lehhekpa Judas in tua mun a thei hi.

³Tua ahi ciangin Judas in, galkap pawlkhat le siampi makaite le Pharisee-te pana ulian pawlkhat makaih in lo sungah a va pai uh hi. Amaute in meisel, meivak le hiam a keng uh hi.

⁴Jesu in ama tunga thu piang ding khempeuh thei khin a, paikhia-in amaute kiangah, "Kua deih na hi uh hiam?" ci-in a dong hi.

⁵Amaute in, "Nazareth mi Jesu," ci-in a dawng uh hi. Jesu in, "Kei, amah ka hi hi," a ci hi. (Tua laitakin a lehhekpa Judas zong amaute lakah a ding hi.)

⁶Jesu in, "Kei, amah ka hi hi," a cih ciangin amaute nungkin in lei-ah a puk uh hi.

⁷Jesu in, "Kua deih na hi uh hiam?" ci-in amaute a dong kik hi. Amaute in, "Nazareth mi Jesu," a ci uh hi.

⁸Jesu in, "Kei, amah ka hi hi, ci-in kong gen zo hi. Kei hong zong na hi uh leh hih mite paisak un," ci-in a dawng hi.

⁹"Nong piaksa mi khat beek ka mansuah kei hi," b[81] a cih thu a tangtun nadingin hih thu a piang ahi hi.

¹⁰Tua ciangin namsau khat a nei Simon Peter in a namsau dokin tulpipa nasempa a sat leh a taklam bil a satkhia hi. (Tua nasempa min Malchus ahi hi.)

¹¹Jesu in Peter kiangah, "Na namsau paimang in. Pa hong piaksa hai dawn lo ding ka hi hiam?" ci-in thu a pia hi.

¹²Tua ciangin galkap pawlkhatte le a makaipa uh tawh Jew-te uliante in Jesu a man uh hi. Amaute in amah hen uh a,

¹³tua kuma tulpi a sem Caiaphas sungpa Anna kiangah a puak masa uh hi.

¹⁴Caiaphas pen, mipite tangin mi khat si leh hoih ding hi, ci-a Jew-te tungah thuhilh pa ahi hi.

¹⁵Simon Peter le nungzui dang khat in Jesu a nungzuih uh hi. Hih nungzuipa pen tulpipa meltheih ahi manin tulpipa huang sung dong Jesu tawh a tonkhawm hi.

¹⁶Ahi zongin Peter in a pualam kongbiang ah a ngak hi. Tulpipa meltheih nungzuipa pai kika, nasem-a om nungak kiangah a gen ciangin huang sungah Peter a lutsak hi.

¹⁷Kongkhak a nungaknu in Peter kiangah, "Nang hih mipa nungzui lakah khat hi lo na hia?" ci-in a dong hi. Amah in, "Hi keng," ci-in a dawng hi.

¹⁸Khuadam a, nasemte le uliante mei awi-in mei kimkotah a ding uh hi. Peter zong amaute lakah mei awi-in a ding hi.

¹⁹Tua hun laitak, tulpipa in Jesu, a nungzuite le a hilh thute a dot laitak ahi hi.

²⁰Jesu in, "Leitung kiangah a lang tang in ka gen zo hi. Jew-te kikhopna ahi zongin synagogue-te le biakinnpi ah thu ka hilh tawntung hi. Ka sim gen bangmah a om kei hi.

²¹Bang dinga kei hong dong na hi hiam? Ka thugen a zate dong in. Ka gensate thei mahmah uh hi," ci-in a dawng hi.

²²Jesu in hih bang a cih ciangin a kianga om uliante laka khat in, "Tulpipa dawn nading hih bang maw?" ci-in a maitang a beng hi.

²³Jesu in, "Thu maan lo gen ka hileh ka khialhna hong gen in. Ahi hangin thutak gen ka hileh bang hanga hong beng na hi hiam?" ci-in a dawng hi.

²⁴Tua ciangin Annas in amah hensa mah in tulpi Caiaphas tungah a puak hi. a[82]

²⁵Simon Peter mei awi-a a din laitakin, "Ama nungzui dang khat hi ngel ve teh aw?" ci-in amah kidong hi. Amah in, "Hi keng," ci-in a nial hi.

²⁶Tulpipa nasemte laka Peter in a bil a satkhiatsak pa tanaute khat in, "Olive lo sungah amah le nang hong mu khawm hi lo ka hia?" ci-in a to hi.

²⁷Peter in nial kik leuleu a, tua hun laitakin ak a khuang hi.

²⁸Tua ciangin Jew-te in Caiaphas inn panin Rome-te ukpipa innpi ah Jesu a paipih uh hi. Tua hun zingsang tung ahi hi. Jew-te in Paisan Pawi ne thei nuam uh a, biakna ngeina palsat a, a nit loh nadingun kumpipa inn sungah a lut kei uh hi.

²⁹Tua ahi ciangin amaute kiangah Pilate paikhia a, "Hih mipa na mawh matna uh bang ahi hiam?" ci-in a dong hi.

³⁰Amaute in, "Amah in tatkhialh na lian nei kei leh nang khut sungah kong tun kei ding uh hi," ci-in a dawng uh hi.

³¹Pilate in, "Note mah in amah pai-pih unla, nomau thukham bangin thu khen un," a ci hi. Jew-te in, "Ahi hangin mi khatpeuh tungah thu khena thah theih nading thu ka nei kei uh hi," ci-in a nial uh hi.

³²Bangci banga sihna thuak ding cih, Jesu in ama sih nading thu a genkholhna, a tangtun nadingin hih thu a piang ahi hi.

³³Tua ciangin innpi sungah Pilate lut kik a, Jesu samin thu donga, "Nang, Jew-te kumpipa na hi hiam?" a ci hi.

³⁴Jesu in, "Tua pen nang ngaihsut mah ahi hiam, ahikeh kei thu midang khatpeuh hong gen ahi hiam?" ci-in a dong hi.

³⁵Pilate in, "Kei Jew mi ka hi hiam? Nang, kei khut sung hong tun na mipihte le na siampi makaite ahi hi. Nang bang hih na hi hiam?" ci-in a dong hi.

³⁶Jesu in, "Kei kumpi gam hih leitung hi lo hi. Hi hileh, Jew-te hong matin ka nasemte in kei hong hutna un a do ding uh hi. Ahi hangin kei kumpi-gam mundang pan ahi hi," a ci hi.

³⁷Pilate in, "Nang, kumpi khat na hi maw leh!" a ci hi. Jesu in, "Kei kumpi nong cih na maan hi. A taktakin, hih thu hangin ka suaka, hih thu hang mahin leitung ah kong pai-a thutak ah teci ka pang hi. Thutak lama pang peuhmah in ka thu a ngai uh hi," ci-in a dawng hi.

³⁸Pilate in, "Thutak bang ahi hiam?" ci-in a dong hi. Tua a cih kawmin Jew-te kiangah paikhia kik a, "Amah mawhsak nading thukho bangmah ka mu kei hi.

³⁹Ahi hangin Paisan-pawi hun ciangin note kiangah thongkia khat ka khah ding na ngeina uh ahi hi. ‘Jew-te kumpipa’ kong khah ding na deih uh hiam?" ci-in a dong hi.

⁴⁰Amaute in, "Hi lo, amah hi lo! Barabbas hong pia ou," ci-in a kiko kik uh hi. Barabbas ahileh kumpi langdona-a kihel khat ahi hi.