Read Zokam John 19 Bible Online

John 19 - Zokam bible

John 19

¹Tua ciangin Pilate in Jesu a satsak hi.

²Galkapte in ling phekkhawmin kumpi lukhu phan uh a, a lu-ah a khusak uh hi. Amaute in kumpi puan dupsan silhsak uh a,

³ama kiangah pai thithe in, "Jew-te kumpipa, cidam ta in!" a ci uh hi. Tua ciangin amaute in a mai a beng uh hi.

⁴Pilate khatvei paikhia kik a, Jew-te kiangah, "En un, amah mawhsak nading thukho bangmah ka mu kei hi, cih kong theihsakna-in amah note kiangah kong khahkhia hi," a ci hi.

⁵Jesu, kumpi puan dupsan silhin, ling lukhu khusa-in a paikhiat ciangin Pilate in amaute kiangah, "Mipa hiah om hi!" a ci hi.

⁶Siampi makaite le uliante in amah a muh phetun, "Kilhlum in! Kilhlum in!" ci-in a kiko uh hi. Ahi hangin Pilate in, "Amah la unla, kilhlum un. Ken ahileh amah mawhsak nading thukho ka mu zo kei hi," a ci hi.

⁷Jew-te in, "Kote in thukham ka nei uh hi; tua thukham tawh kizui-in amah a sih pelmawh kul hi. Bang hang hiam cih leh, amah ‘Pasian Tapa ka hi hi,’ kici hi," a ci teitei uh hi.

⁸Pilate in hih thu a zak ciangin lau semsem zaw a,

⁹innpi sungah a lut kik hi. Amah in, "Koi pana hong pai na hi hiam?" ci-in Jesu a dot ciangin Jesu in a dawng kei hi.

¹⁰Pilate in, "Kei hong dawng nuam lo na hi hiam? Nang, kilhlup theihna le khahkhiat theihna thuneihna a nei ka hilam phawk lo na hi hiam?" a ci hi.

¹¹Jesu in, "Tunglam pana hong kipia ahikeh kei tungah bangmah vangliatna na nei kei hi. Tua ahi ciangin nang tunga kei hong puakpa in mawhna lianzaw a bawl hi," ci-in a dawng hi.

¹²Tua-a kipan Pilate in Jesu a khah nading a hanciam hangin Jew-te in, "Hih mipa na khahkhiat leh Caesar lawm na hi kei hi. Kumpipa ka hi hi, a kici peuhmah Caesar langpang ahi hi," ci-in a kiko niloh uh hi.

¹³Pilate in hih thu a zak ciangin Jesu a pualam ah paikhiatpih a, Suangphah (Aram pau in Gabbatha) kici mun-a thukhenna tokhom tungah a tu hi.

¹⁴Tua hun, Paisan-pawi Nipikal Kiginkholh ni, nai gukna pawl ahi hi. Pilate in Jew-te kiangah, "Hih lai-ah na kumpipa uh om hi," a ci hi.

¹⁵Ahi hangin amaute in, "Amah lakhiamang in! Amah lakhia mang in! Amah kilhlum in!" ci-in a kiko uh hi. Pilate in, "Na kumpipa uh kilhlum ding ka hi hiam?" ci-in a dong hi. Siampi makaite in, "Caesar longal kumpi dang kuamah ka nei kei uh hi," ci-in a dawng uh hi.

¹⁶A tawpna-ah Pilate in amah kilhlup dingin amaute tungah piakhia ta hi. Tua ciangin galkapte in Jesu cingin a paikhiatpih uh hi.

¹⁷Ama singlamteh ding amah in pua-a, Luguh Mun (Aram pau-a Golgotha kici) lamah a paikhia hi.

¹⁸Amaute in amah singlamteh tungah a kilh uh hi. Amah tawh midang nih - alang tuakah khat tuak kilhin a laizangah Jesu a kilh uh hi.

¹⁹Pilate in theihsakna khat bawlsak a, singlamteh ah a suang hi. Tua ah, JEW-TE KUMPIPA, NAZARETH MI JESU, kici hi.

²⁰Jew-te tampi in hih lai kisuang a sim uh hi. Ahang in, Jesu singlamteh tunga a kikilhlupna mun khuapi kiang hi-a, tua theihsakna lai, Aram, Latin le Greek pau-in kigelh hi.

²¹Jew-te siampi makaite in Pilate kiangah, "‘Jew-te’ Kumpipa’ ci-in gelh kei in, hih mipa’ Jew-te kumpipa ka hi hi’ kici hi, ci-in gelh in," a va ci uh hi.

²²Pilate in, "Ka gelh khitsa, ka gelhkhitsa ahi hi," ci-in a dawng hi.

²³Galkapte in singlamteh tungah Jesu a kilh uh ciangin a puansilhte la in phel li suah uh a phel khat ciatin tang uh a, a puan sungsilh a siit lai uh hi. A puan sungsilh pen a khuina om lo, alu pan ataw dong zang khata kiphan ahi hi.

²⁴Amaute in, "Balkek kei ni, a ngah ding pen aisan ni," a kici uh hi. Hih banga a hihna uh, Laisiangtho sunga kigen, "Amaute in ka puante hawm uh a, ka puan-ak ading ai a san uh hi," a[83] cih thu a tangtun nading ahi hi. Tua hi-a, hih pen galkapte hih ahi hi.

²⁵Jesu singlamteh gei-ah a nu, a nu sanggamnu, Clopas zi Mary le Magdalane a Mary-te a ding uh hi.

²⁶Jesu in tua lai-a om a nu le a kianga ding, a it a nungzuipa khat a muh ciangin a nu kiangah, "Kong it numei aw, na tapa hih lai-ah om hi," ci-in,

²⁷nungzuipa kiangah, "Na nu hih lai-ah om hi," a ci hi. Tua hun a kipan hih nungzuipa in tuanu a inn ah a kem hi.

²⁸Tua khit, Jesu in na khempeuh cingkim khin ta, cih a theih ciangin Laisiangtho a tangtun nadingin, "Ka dangtaak hi," a ci hi.

²⁹Tua lai-ah lenggahzu thuk bel khat a om hi. Amaute in tua sungah tuihup diah uh a, puknah hiang dawnah suangin Jesu mukah a tah uh hi.

³⁰Jesu in tua dawn ding a ngah khit ciangin, "Kizo zo hi," a ci hi. Tua tawh a lukunsukin, a kha a khahkhia hi.

³¹Tua ni pen Kiginkholh ni hi-a, a zingciang lah Sabbath ni thupi tuam ni ding ahi hi. Jew-te in Sabbath ni-a singlamtehte tungah a luangte uh a om ding a deih loh man un, Pilate kiangah a khete uh sutan-a, a luangte uh a lakkhiat ding a ngen uh hi.

³²Tua ahi ciangin galkapte va pai in, Jesu tawh kikhai khawm, a masa pa khete sutan uh a, tua ciangin adang khat aa a sutan uh hi.

³³Ahi hangin Jesu kiang a tun uh ciangin amah a sisa in mu uh a, a khete a sutan kei uh hi.

³⁴Tua tangin galkapte khat in Jesu teneem teipi khatin sun-a, sisan le tui kihel a luangkhia pah hi.

³⁵A mu pa in a muh thu teci panga, ama teci panna thutak ahi hi. Amah in thutak gen ahilam thei a, nang zong na up theih nadingin teci a pang hi.

³⁶Laisiangtho in: "Ama guh khat beek a kisutan kei ding hi," b[84] a cih le

³⁷Laisiangtho mundang khatah: "Amaute in a sutpa uh a en ding uh hi," c[85] a cih thu a tangtun nadingin hih banga piang ahi hi.

³⁸Tua nung ciangin Arimathea a teng Joseph in Pilate kiangah, Jesu luang a ngen hi. Joseph, Jesu nungzui khat ahi hangin Jew-te a kihtak manin a langtang in a zui kei hi. Amah pai-in Pilate phalna tawh a luang a la hi.

³⁹Amah tunung lama zana Jesu kianga hawhpa Nicodemus in a zui hi. Nicodemus in paknamtui kha le aloes kihel pound d[86] sawm sagih le nga ding khawng a keng hi.

⁴⁰Amaute in Jesu luang lakhia uh a, saihadial puanin gim namtui tawh a tuam khawm uh hi. Hih pen Jew-te kivuina ngeina zuihna ahi hi.

⁴¹Jesu kikilhlupna munah huan khat om a, tua huan sungah kuamah a kisial ngei nai lohna han thak khat a om hi.

⁴²Jew-te Kiginkholh ni ahi hang le a kiangah han om pah ahi manin amaute in tua lai-ah Jesu a sial uh hi.