Read Zokam John 2 Bible Online

John 2 - Zokam bible

John 2

¹A ni thum ni-in Galilee gam Cana ah mopawi khat a om hi. Tua lai-ah Jesu nu om a,

²Jesu le a nungzuite zong tua mopawi ah kisam hi.

³Lenggahzu a bei ciangin Jesu nu in, "Amaute’n lenggahzu a nei nawn kei uh hi," ci-in a gen hi.

⁴Jesu in, "Kong it numei aw, bang hanga kei hong kaaipaan na hi hiam, ka hun a tung nai kei hi," a ci hi.

⁵A nu in a nasemte kiangah, "Ama hong gen bangbang na hih un," a ci hi.

⁶Tua kiang nai-ah gallon g[14] sawmnih pan sawmthum a ta suang tuibel guk om-a tuate Jew-te biakna ngeina-a kisilna a zatte nam ahi hi.

⁷Nasemte kiangah Jesu in, "Tuibeelte sungah tui dim un," ci a, amaute in agong ciang a dim uh hi.

⁸Tua khit ciangin amah in amaute kiangah, "Bang zah hiam khat suakkhia unla, pawi thusapa kiangah va puak un," a ci hi. Amaute in a cih bangin a hih uh hi.

⁹Pawi thusapa in tui, lenggahzu a kisuaksak pen a ciam hi. Tui a dim nasemte in a theih uh hangin amah in lenggahzu koi pan kingah cih a thei zo kei hi. Tua ciangin zipipa sam tuama,

¹⁰"Mi khempeuh in lenggahzu alim pente hawm masa a, lenglate in a kham khit ciangin a lim lote hawm hi. Nang na hileh tu dong alim pente na sit lai hi," a ci hi.

¹¹Jesu nalamdang bawlte lakah a masa pen hih Galilee gam Cana-a a bawl ahi hi. Amah in a minthanna tua bangin kilaaka, a nungzuite in amah a um uh hi.

¹²Hih khit ciangin a nu, a sanggamte le a nungzuite tawh Capernaum ah a paisuk uh hi. Tua lai-ah ni tawmkha a taam uh hi.

¹³Jew-te Paisan pawi hun a tun dektak ciangin, Jerusalem ah Jesu a pai to hi.

¹⁴Biakinnpi huang sungah bawngte, tuute le vakhu zuak-a omte le sum khek-a tu midangte a mu hi.

¹⁵Amah in satna khauhual tep nei bawl-a, tuute, bawngte le mi khempeuh biakinnpi huang sung panin a hawlkhia hi. Sum khekte dangka-tangte thehthangsaka, a sabuaite uh a lumletsak hi.

¹⁶Amah in vakhu zuakte kiangah, "Hihte hih mun panin lakhia un. Bang hangin ka Pa inn van zuakna mun suaksak ngam na hi uh hiam!" a ci hi.

¹⁷A nungzuite in, "Na inn ading ka aam luatna in kei hong netum ding hi," a[15] ci-a kigelh thu a phawk uh hi.

¹⁸Tua ciangin Jew-te in, "Hihte khempeuh na hih theih nading thuneihna na neih lam ka theih nadingun kote nalamdang khat hong lak in," ci-in a kal uh hi.

¹⁹Jesu in, "Hih biakinnpi susia un, ni thum sungin ka ding kiksak ding hi," ci-in a dawng hi.

²⁰Jew-te in, "Hih biakinnpi lam nading kum sawmli le kum guk a sawt hi. Nang ni thum sungin dingsak zo ding na hi hiam?" a ci kik uh hi.

²¹Ahi hangin Jesu gen biakinnpi pen, ama pumpi ahi hi.

²²Misi panin amah a kithawhsak ciangin a nungzuite in hih a gensa thute a phawk kik uh hi. Tua ciangin Laisiangtho le Jesu gensa thute a um uh hi.

²³Paisan Pawi sung Jerusalem a, a om laitakin, a lim lamdang bawlte mi tampi in mu uh a, ama min a um uh hi. b[16]

²⁴Ahi hangin Jesu in mi khempeuh thei ahi manin amaute tungah a ki-ap kei hi.

²⁵Amah in mihing lungsim sunga omte thei khina, mihing in mihing thu a gen ding kisam lo hi.