Read Zokam John 20 Bible Online

John 20 - Zokam bible

John 20

¹Nipi kal a ni masa ni, zingsang tung khuamial laipi-in Mary Magdalene, hanah pai-a, han kongvang panin suang kilikkhiasa-a om a mu hi.

²Tua ciangin Simon Peter le Jesu in a it nungzuipa kiangah amah va tai-a, "Amaute in han sung panin Topa a lakhia zo uh hi, amah koi-ah koih uh hiam, ka thei kei uh hi!" a ci hi.

³Tua ciangin Peter le nungzui dang khat pen in han lam a manawh uh hi.

⁴A nih un taikhawm uh a, ahi hangin tua nungzui dang khat pa in Peter makhelhin han a tung masa hi.

⁵Amah kunsukin a sung ena, tua lai-a om a kitunna saihadial puante enin, a sungah a lut kei hi.

⁶Tua ciangin a nunga om Simon Peter tunga, han sungah a lut hi. Tua lai ah a luang tunna saihadial puan mu a,

⁷Jesu lutang kimkot-a han puan om zong a mu hi. Tua puante kizial tuamin saihadial puan tawh a tuamtuakin a om hi.

⁸A tawpna ah han a tung masa nungzuipa zong a sungah a lut hi. Amah in mu-a a um hi.

⁹(Amaute in tua hun dong, Laisiangtho in, Jesu misi pan kithosak ding hi, cih thu a theitel nai kei uh hi.)

¹⁰Tua ciangin nungzuite a inn uah ciah kik uh a,

¹¹ahi hangin Mary han pua-ah dingin a kap hi. A kah kawmkawmin kunsukin han sung a et leh,

¹²puanpak silh vansawltak nih, Jesu luang kisialna mun, a lukhungah khat, a khekhuantaw-ah khat a tu a mu hi.

¹³Amaute in, "Numei aw, bang dinga kap na hi hiam?" ci-in a dong uh hi. Tuanu in, "Ka Topa lakhiamang uh a, koi-ah koih uh hiam, ka thei kei hi," a ci hi.

¹⁴Tua laitakin a nunghei leh a nunga ding Jesu a mu hi; ahi zongin Jesu ahilam a thei kei hi.

¹⁵Amah in, "Numei aw, bang dinga kap na hi hiam? Kua zong na hi hiam?" a ci hi. Tuanu in huan neipa sa a, "Sia aw, amah na puakkhiat mang ahileh koi-ah koih na hi hiam, hong gen in, ken ka la kik nuam hi," a ci hi.

¹⁶Jesu in, "Mary" ci-in a sam hi. Ama lam nga-in amah kihei a Aram pau in, "Rabboni!" (Sia cihna) ci-in a awngkhia hi.

¹⁷Jesu in, "Pa kiangah ciah nai lo ka hi manin hong lenlen kei in. Tua sangin ka sanggamte kiangah pai inla, ‘Ka Pa, na Pa uh, ka Pasian na Pasian uh kiangah a ciah kik dek ta ka hilam amaute va hilh in,’" a ci hi.

¹⁸Tua thu tawh nungzuite kiangah Mary Magdalene pai-in, "Topa ka mu khin hi!"a ci hi. Jesu in ama tunga a gen khempeuh amaute a ko hi.

¹⁹Tua nipikal, ni masa ni nitak in, Jew-te kihta-in kong kikalhkhum uh a, a kikhop laitakun, Jesu pai-in amaute lakah va dinga, "Lungmuanna, note tawh om ta hen!" a ci hi.

²⁰Hih a cih khit ciangin a khutte le a teneem amaute a lak hi. Nung-zuite in Topa a muh uh ciangin a nuam lua mahmah uh hi.

²¹Jesu in, "Note tawh Lemna, om ta hen! Pa in kei hong sawl bangin note kong sawl hi," a ci leuleu hi.

²²Tua tawh amaute tungah a huu khah a, "Khasiangtho na sang un.

²³Mi khatpeuh a mawhnate na maisak uh leh amau mawhnate a kimaisak hi a, amau mawhnate na maisak kei uh leh amau mawhnate a kimaisak lo ahi hi," a ci hi.

²⁴Nungzuite kiangah Jesu a pai lai-in Sawm-le-nihte lakah khat Thomas (Didymus kici) a om kei hi.

²⁵Nungzui dangte in ama kiangah: "Topa ka mu khin uh hi," ci-in a gen uh hi. Ahi hangin amah in, "A khut sunga siktukkilh ma mu-a, ka khutme-in siktukkilh omna munte lawng-a, a pang ka lawn tektek mateng ka um kei ding hi," a ci bikbek hi.

²⁶Nipikal khat khit ciangin a nungzuite tua inn ah kikhawm kik uh a, Thomas zong amaute tawh a omkhawm hi. Kongkhakte a kikalh hi napi, Jesu pai-in amaute lakah dinga, "Lemna, note tawh om ta hen!" a ci hi.

²⁷Tua ciangin "Thomas kiangah, "Na khutme in hih lai lawng in; ka khutte en in. Na khut zan inla ka pang lawng in. Lunghei nawn kei inla um in," a ci hi.

²⁸Thomas in, "Ka Topa le ka Pasian!" a ci hi.

²⁹Tua ciangin Jesu in ama kiangah, "Na muh khit manin nong um hi; mu lo napi-a umte thupha ngah ahi hi," ci-in a gen hi.

³⁰Jesu in a nungzuite muhin hih laibu sunga kigelh lo lim lamdang tampi a bawl hi.

³¹Ahi hangin Jesu, Christ hi-a, Pasian Tapa hi, cih na up theih a[87] nading uh le tua upna hangin ama minin nuntakna na neih theih nadingun hihte a kigelh ahi hi.