Read Zokam John 4 Bible Online

John 4 - Zokam bible

John 4

¹John sangin Jesu in nungzui tam ngahzaw, tam baptise zaw hi, ci-in Pharisee-te in a za uh hi.

²A taktakin Jesu hi loin a nungzuite in a baptise uh hizaw hi.

³Topa in hih thu a zak ciangin Judea gam nusia-a, Galilee gamah khat vei a pai kik hi.

⁵Tua hi-a Jacob in a tapa Joseph adingin a piakna mun kiang Samaria a khuapi khat, Sychar kici ah a tung hi.

⁶Tua lai-ah Jacob tuikhuk a om hi. Jesu a khualzinna-in gim a, tuikhuk kiangah a tu hi. Tua hun pen nai gukna pawl ahi hi.

⁷Samaria numei khat tui tawi-in va pai a, Jesu in ama kiangah, "Ka dawn ding tui nong pia diam?" a ci hi.

⁸(A nungzuite an lei dingin khuapi sungah paikhin uh hi.)

⁹Samaria numei in, "Nang Jew mi hi-in, kei Samaria numei ka hi hi, bangci-a tui dawn ding hong ngen na hi hiam?" a ci hi. (Ahang in, Samaria mite tawh Jew-te kithuah lo uh hi. e[29])

¹⁰Jesu in, "Pasian letsong thei-in, na kianga tui hong ngenpa thei hi lecin, ama kiangah na ngen zaw ding a, amah in a nungta tui hong pia khin zo ding hi," ci-in a dawng hi.

¹¹Numei in, "Sia aw, tuikhuk lah thuka, na khai nading bangmah na neih loh pi hih a nungta tui koi pan ngah thei ding na hi hiam?

¹²Amah mah le a tate, a tuuhonte, a ganhonte in a dawnna uh, hih tuikhuk hong piapa ka pa uh Jacob sangin lianzaw na hi hiam?" a ci hi.

¹³Jesu in, "Hih tui a dawnte peuhmah a dangtak kik ding hi;

¹⁴ahi hangin kei piak tui a dawn mi peuhmah a dangtak ngei nawn kei ding hi. Ken ka piak tui, ama sungah tuinak suakin nuntak tawntungna dongin a phulto taktak ding hi," ci-in a dawng hi.

¹⁵Numei in ama kiangah, "Sia aw, ka dangtak nawn loh nading le hih muna tui khai-a ka pai nawn loh nadingin, tua tui kei hong pia in," a ci hi.

¹⁶Amah in tuanu kiangah, "Pai-in na pasal va sam inla, hong pai kik in," a ci hi.

¹⁷Amah in, "Pasal ka nei kei hi," ci-in a dawng hi. Jesu in, "Pasal ka nei kei hi, na cih amaan hi,

¹⁸a taktakin pasal nga na nei zo a, tu-a na neih pa pen na pasal a hi kei hi. Tu-a na gen pak maan mahmah hi," a ci hi.

¹⁹Numei in, "Sia aw, kamsang khat na hilam ka thei thei hi.

²⁰Ka pate un hih mualtungah bia uh a, ahi hangin no Jew-te in: Jerusalem bekah kibia thei hi, na ci se uh hi," a ci hi.

²¹Jesu in, "Numei aw, kei hong um in. Hih mual tung ahi a, Jerusalem ah ahi zongin Pa na biak loh hun uh hong tung ding hi.

²²No Samaria mite in na theih lohpi uh na bia uh hi; kote in ka theih uh ka bia uh hi. Ahang in, hotkhiatna, Jew-te pan ahi hi.

²³Ahi hangin a bia taktakte in a kha le thutak a, Pa a biak hun uh hong tung ding tham loin tu-in a tung zo hi, ahang in, tua banga biate bek Pa in a zong hi.

²⁴Pasian in kha ahi hi. Amah a biate in kha le thutakin a bia pelmawh ding uh hi," a ci hi.

²⁵Tua numei in, "Tua Messiah (Christ kici) hong pai ding cih ka thei hi. Amah hong pai ciangin eite tungah na khempeuh hong telgen ding hi," a ci hi.

²⁶Tua ciangin Jesu in, "Amah pen tu-a nang hong hopih pa ka hi hi," a ci hi.

²⁷Tua khit phetin a nungzuite tung kik uh a, numei tawh a kiho a muh uh ciangin lamdang a sa uh hi. Ahi hangin khat beek in, "Bang deihna hiam?" ahikeh "Bang hang tuanu hopih na hi hiam?" ci-in a dong kei uh hi.

²⁸Tua ciangin tua numei in tuibel nusia in khuapi sungah pai kik a, mite kiangah,

²⁹"Hong pai un, ka hihsa khempeuh kei tunga hong genpa khat hong en un. Hih pa Christ f[30] hi kha lo ding hiam?" a ci hi.

³⁰Amaute khuapi panin paikhia uh a, ama lam a zuan uh hi.

³¹Tua kalin a nungzuite in, "Rabbi aw, bang khatpeuh ne in," ci-in a sawl uh hi.

³²Ahi hangin amah in amaute kiang ah, "A thu bangmah na theih loh uh an nek ding ka nei hi," a ci hi.

³³Tua ciangin a nungzuite in, "Mi khatpeuh in an na puak zo hi ve maw?" a kici uh hi.

³⁴Jesu in, "Kei hong sawlpa deihna bang sep ding le tua nasep ka zawh ding, ka an ahi hi," a ci hi.

³⁵"Note in, ‘tu zawh kha li ciangin an lak hun ta ding hi,’ ci hi lo na hi uh hiam? Note kong hilh hi, khuadakin lote en dih un! Ante min khin in lak hun ta hi.

³⁶Tu nangawn in buh atpa in thaman a sang hi. A vawh pa le a at pa a lungdam khawm theih nadingin tu nangawnin tawntung nuntakna ading an a la hi.

³⁷‘Mi khat in vawh a, midang khat in a at hi,’ kici in thumaan ahi hi.

³⁸Na sep loh uh at dingin note kong sawl hi. Midangte in nakpi-in na sem uh a, amau sep gah note in na at uh hi," a ci hi.

³⁹Tua numei in, "Ka hih ngeisa khempeuh hong gen hi," ci-a teci a panna hangin tua khuapi a Samaria mite tampi in amah a um uh hi.

⁴⁰Tua ciangin Samaria mite ama kiangah pai-in amaute kiangah a taam nadingin kho uh a, ni nih a taam hi.

⁴¹Ama thugente hangin thu-um tampi a kibehlap hi.

⁴²Amaute in tua numei kiangah, "Nang hong genna hang bek-a um ka hi nawn kei uh a, ko mahmah in tu-in ka za uh a, hih mipa, leitung Honpa taktak hi, cih ka thei uh hi," a ci uh hi.

⁴³A ninih ni khit ciangin Galilee zuanin a pai hi.

⁴⁴(Jesu mahmah in, kamsangpa in ama gamah pahtawina ngah lo hi, cih a kawkkhia khin hi.)

⁴⁵Galilee ah a tun ciangin Galilee mite in amah a na muak uh hi. Amaute, Jerusalem a Paisan Pawi hun sungin va om kha uh ahi manin a hihsate khempeuh a mu zo uh hi.

⁴⁶Tui, lenggahzu a suahsakna mun Galilee gam Cana ah khat vei va hawh kik hi. Tua lai-ah kumpi nasem ulian khat oma, a tapa Capernaum ah cina-in a lum hi.

⁴⁷Hih pa in, Judea panin Galilee ah Jesu tung zo cih a zak ciangin ama kiangah va pai a, a si dektak a tapa a va damsak nadingin a thum hi.

⁴⁸Jesu in ama kiangah, "No mihingte in na lamdang le a lamdangte na muh loh ngalun na um ngei kei ding uh hi," ci-in a gen hi.

⁴⁹Tua kumpi nasem ulianpa in, "Sia aw, ka ta a sih ma-in hong paisuk in" a ci hi."

⁵⁰Jesu in, "Pai lel in, na tapa nungta ding hi," a ci hi. Tuapa in Jesu thugen muangpah a, a paikhia hi.

⁵¹Amah lamkal ah a om laitakin a nasemte in a tapa nungta hi, cih thu tawh amah a na dawn uh hi.

⁵²Amah in a tapa noptuam hun a kan ciangin amaute in, "Zanni a nai sagihna hunin nattun a dam hi," a ci uh hi.

⁵³Jesu in, "Na tapa a nungta ding hi," a cih hun lian hi, cih a pa in a thei hi. Tua ciangin amah le a innkuanpihte in a um uh hi.

⁵⁴Hih pen Judea pan Galilee ah Jesu, tun zawh nalamdang a bawl a nihna ahi hi.