Read Zokam John 9 Bible Online

John 9 - Zokam bible

John 9

¹Jesu a paipai laitakin mittawsa-a suak khat a mu hi.

²A nungzuite in, "Rabbi aw, hih pa mittawsa-a a suah kua mawhna hang hiam, amah hiam, a nu-le-pa hizaw hiam?" ci-in a dong uh hi.

³Jesu in, "Amah lah mawh kei, a nu-le-pa lah mawh kei, ahi hangin ama nuntakna ah Pasian nasepna a kilat nadinga piang ahi hi.

⁴Sun ahi laiteng kei hong sawlpa na i sep pel mawh ding ahi hi. Kuamah in na a sep theih loh hun zan hong tung ding hi.

⁵Leitunga ka om laiteng, leitung khuavak ka hi hi," a ci hi.

⁶Hih teng a cih khit ciangin lei lakah a cil phiha, a ciltui tawh buan bawlin mittaw pa mit a nuh hi.

⁷Ama kiangah, "Pai inla Siloam (Hih Kammal Sawl cihna) bualah va sil in," ci-in a sawl hi. Tua ciangin tuapa pai-in va sil-a khua musa-in innah a ciah hi.

⁸A vengte le khut dawh-a a nget lai a musate in, "Hih pa, mun khatah tu-a a ngenpa pen hi lo hiam?" ci-in a kidong uh hi.

⁹Pawlkhat in, "Hi mah hi," a ci uh hi. Adangte in, "Hi kei tuapa tawh a kisun bek hi," a ci uh hi. Ahi hangin amahmah in, "Tua mipa ka hi hi," a ci hi.

¹⁰Amaute in, "Tua ahileh na mitte bang hong ci vak hiam?" ci-in a dong tentan uh hi.

¹¹Amah in, "Jesu a cih uh mi khat in, buan bawlin ka mit nuha, ‘Siloam bual ah va pai inla va sil in,’ ci-a hong gen ciangin kei zong pai-a ka va sil leh khua ka mu thei hi," ci-in a dawng hi.

¹²Amaute in, "Tuapa koi-ah om ta hiam?" ci-in a dong uh hi. Amah in, "Thei keng," a ci hi.

¹³Amaute in Pharisee-te kiangah mittaw ngei pa a paipih uh hi.

¹⁴Jesu in buan bawla mipa mit a vaksak ni, Sabbath ni khat ahi hi.

¹⁵Tua ahi ciangin Pharisee-te in zong khua bangci muh kik hiam, cih amah a dong uh hi. Mipa in, "Ka mit ah buan hong nuhsaka ka sil leh tu-in khua ka mu thei hi," ci-in a dawng hi.

¹⁶Pharisee-te pawlkhat in, "Tua mipa in Sabbath ni tang lo ahi manin Pasian kiang pana hong pai ahi kei hi," a ci uh hi. Adangte in, "Mawh nei mi khat in tua bang limlamdang bangci bawl theih ding ahi hiam?" a ci uh hi. Tua ciangin amaute a kipawlkhen uh hi.

¹⁷A tawpna ah mittawpa kiangah kihei kik uh a, "Amah in na mitte vaksak ahi ciangin, ama thu gentheih bang na nei hiam?" a ci uh hi. Tua mipa in, "Kamsang khat hi," ci-in a dawng hi.

¹⁸Jew-te in amah mittaw ngei-a tu-in khua mu thei ahilam, a nu-le-pa a sapsak matengun a um kei teitei uh hi.

¹⁹Amaute in, "Hih pa no tapa ahi hiam? A mittawsa-a suak na cih pa uh ahi hiam? Tu-a khua a muh theih kikna bangci bang ahi hiam?" ci-in a dong uh hi.

²⁰A nu-le-pa in, "Amah ka tapa uh hi, cih ka thei uh hi; mittawsa-a suak ahilam zong ka thei uh hi.

²¹Ahi zongin bangci bangin tu-a khua mu thei-a, kua in a mit vaksak cih ka thei kei uh hi. Amah dong dih un. Amah picing ta hi; ama thu amahmah in gen hen," a ci uh hi.

²²Jew-te in: Jesu pen Christ a[50] hi, ci-a a sang peuhmah synagogue pan kihawlkhia ding hi, ci-a thukhensatna nei zo uh ahi ciangin a nu a pa-te in Jew-te a kihtak manun hih banga a gen uh ahi hi.

²³A nu-le-pa in, "Amah picing ta hi, amah dong un," a cihna uh tua thu hang ahi hi.

²⁴Mittaw ngei pa a nihveina sam kik uh a, "Pasian min thangsak in b[51] Kote in hih pa mawhnei hi, cih ka thei uh hi," a ci uh hi.

²⁵Amah in, "Amah mawh nei ahi le ahi loh ka thei kei hi. Na khat ka thei hi, ka mit a tawsa hi-a ahi zongin tu-in khua ka mu hi!" ci-in a dawng hi.

²⁶Tua ciangin amaute in, "Nang tungah bang hong hih hiam? Na mit bang hong ci vaksak ahi hiam?" ci-in a dong uh hi.

²⁷Amah in, "Kong gen khin zo-a na ngai kei uh hi. Bang dinga za kikkik nuam se na hi uh hiam? No zong ama nungzui suak nuam na hi uh hiam?" ci-in a dawng hi.

²⁸Tua ciangin amaute in amah sim mawh bawlin tai gawpgawp uh a, "Hih mipa nungzui nang na hi mah ve! Ko bel Moses nungzui ka hi uh hi!

²⁹Pasian in Moses a hopih lam ka thei uh hi. Ahi hangin hih pa koi pana hong pai cih nangawn ka thei kei uh hi," a ci uh hi.

³⁰Tuapa in, "Tua hi ve a ciamteh huai! Note in hong paina thei lo. Amah’n lah ka mit hong vaksak.

³¹Pasian in mawh neite thu ngai lo hi, cih i thei hi. Amah in a deihna a hih a pasian-mite thu a ngai hi.

³²Mittawsa a suak, mit kivaksak thu kuamah in a za ngei kei hi.

³³Hih pa, Pasian kiang pan hi kei leh bangmah a hih thei kei ding hi," a ci hi.

³⁴Hih thu ah amaute in, "Nang, suah tunga mawhna tawh a kidim pa, bang hangin ko thu hong hilh ngam tazen na hi hiam!" ci-a a dawn kik khit uh ciangin amah a hawlkhia uh hi.

³⁵Amaute in tuapa hawlkhia uh cih Jesu in za a, amah a muh ciangin, "Mihing Tapa na um hiam?" a ci hi.

³⁶Mipa in, "Sia aw, amah kua ahi hiam? Amah ka up theih nadingin hong gen in," ci-in a dong hi.

³⁷Jesu in, "Tu-in amah na mu zo hi; tu laitaka nang tawh a kihopa ahi hi," a ci hi.

³⁸Tua ciangin tuapa in, "Topa aw, ka um hi," ci-in a bia hi.

³⁹Jesu in, "Mittawte in khua a muh nading le mitvakte a mit uh a tawt nading, thukhen dingin hih leitungah kong pai hi," a ci hi.

⁴⁰Amah tawh a om khawm Pharisee-te pawlkhat in hih banga a gen a zak uh ciangin, "Bang e? Ko zong a mittaw maw?" ci-in a dong uh hi.

⁴¹Jesu in, "Mittawsa hi le uh cin mawhna ah na khial kei ding uh hi. Ahi hangin tu-in ka mit uh a vak hi, ci na hi manun na mawhna uh a om lai hi.