Read Zokam Nasepte 1 Bible Online

Nasepte 1 - Zokam bible

Nasepte 1

¹Theophilus aw, ka laibu masa sungah Jesu in a septe le a hilhte khempeuh a kipat tunga kipan

²a teelsa sawltakpite tungah Khasiangtho tungtawna a lah khit ciangin vantungah a kilaktoh ni donga thute ka gelh ahi hi.

³A thuak dingte a thuak khit nungin hih mite kiangah amah mah kilak-a, amah a nungta takpi ahina, a uptak kitelna tampitak a lak hi. Amaute kiangah amah kilak in, ni sawmli sung Pasian gam thu a gen hi.

⁴Khatvei amaute tawh an a nek khawm laitakun amah in: "Jerusalem nusia kei un. Ahi zongin kong gen na zaksa uh ka Pa in letsong hong piak dinga hong ciam, na ngak un.

⁵Ahang in, John in tui-ina hong baptise hi. Ahi hangin ni tawmkha khit ciangin Khasiangtho-in na kibaptis a[1] ding uh hi," ci-in thu a pia hi.

⁶Tua ahi ciangin amaute a kisuktuah khawm laitakun, "Topa aw, Israel tungah tuhunin kumpi-gam ding kiksak ding na hi hiam?" ci-in dong uh hi.

⁷Amah in amaute kiangah, "Pa in ama thuneihna tawh a seh ani ahi zongin ahun ahi zongin note theih ding hi lo hi.

⁸Ahi hangin note tungah Khasiangtho hong tun ciangin vangliatna na ngah ding uh a, Jerusalem, Judea gam, Samaria gam khempeuh le leimong dongah ka tecite na hi ding uh hi," a ci hi.

⁹Tua teng a cih khit ciangin amaute muh mahmah in amah kilato a, amaute muhtawp ah meii in a liah hi.

¹⁰Amah a paito amaute in a et zuizui laitakun, amaute gei-ah thakhatin puanpak silh mi nih a ding hi.

¹¹Amaute in, "Galilee mite aw, hih lai-ah vanlam enin bang hangin ding na hi uh hiam? Note kiang pan vantung ah kilato hih Jesu tektek mah vantung ah a pai na muh bangun hong pai kik ding hi," a ci uh hi.

¹²Tua ciangin khuapi pana Sabbath ni khat lam b[2] a gamla Olive Vum kici mualno panin Jerusalem ah a ciah kik uh hi.

¹³Amaute a tun uh ciangin amau omna ngei dei tungnung ah a pai uh hi. Tua lai-a omte: Peter, John, James le Andrew; Philip le Thomas, Bartholomew le Matthew; Alphaeus tapa James le Zealot pawla Simon le James tapa Judas-te ahi uh hi.

¹⁴Amaute in numeite, Jesu sanggamte le a nu Mary tawh thu a ngen khawm tawntung uh hi.

¹⁵Tua nite in, thu-umte c[3] (za le sawm nih bang a pha ding mi hon khat) lak panin Peter ding to-a,

¹⁶"Sanggamte aw, tanglai peka Khasiangtho in David kam tawna a na gen, Jesu a mante a makaih Judas tawh kisai Laisiangtho thu a tangtun ding kisam hi.

¹⁷Tuapa eite lakah khat hi-a i naseppih ahi hi," a ci hi.

¹⁸(Judas in a gitlohna mana a ngah pahtakman tawh lo khat a lei hi. Tua munah bungbu kiatin a pumpi kitam a, a gilzangte buakhia hi.

¹⁹Jerusalem a om mi peuhmah in hih thu a za uh hi. Tua ahi ciangin amaute in tua mun amau kamin, Sisan-lo cihna Akeldama, ci-in a phuak uh hi.)

²⁰Peter in, "Bang hang hiam na ci uh leh Phatna-late bu sungah, "‘Ama mun kinusia ta hen; tua sungah a teng ding kuamah om kei hen,’ a[4] tua ciangin, ‘Ama makaihna mun midang in laih ta hen’" b[5] ci-in kigelh zo hi.

²¹Tua ahi manin Topa Jesu eite lakah sungtum pusuak in a om sung khempeuh,

²²John baptise a kipan eite kiang pana Jesu a kilaktoh hun dong eite tawh a om khawmsa mite lak-a khat i teel ding kisam hi. Ahang in, tuate lakah khat in eite tawh ama thawhkikna teci a pan tektek ding kisam hi," a ci hi.

²³Tua ciangin mi nih: Barsabbas kici Joseph (Justus zong a kici) le Mathias-te a sehkhia uh hi.

²⁴Tua khit ciangin thu ngen uh a, "Topa aw, mi khempeuh lungtang na thei hi.

²⁵Judas ama munah pai-a, a nusiat hih sawltakpi nasep a sem ding hih mi nihte kua zaw teel na hi hiam, kote hong lak in," a ci uh hi.

²⁶Tua ciangin ai lawn uh a, Mathias tung a tu hi. Tua ahi ciangin amah sawltakpi sawm-le-khat lakah kigawm beh hi.