Read Zokam Nasepte 10 Bible Online

Nasepte 10 - Zokam bible

Nasepte 10

¹Caesarea ah Cornelius min nei, Italy galkap pawl a kici ah, zakhat-ukpa khat a om hi.

²Amah le a innkuanpihte khempeuh biakna ah kipumpiakin Pasian kihta uh hi. Amah in a kitasamte phaltakin pia a, Pasian kiangah ahun simin thu a ngen hi.

³Ni khat, nitak lam nai thum pawlin mang a mu hi. Topa vansawltak khat ama kianga pai kiciantakin mu a, amah in, "Cornelius!" a ci hi.

⁴Cornelius lau-in amah en gega a, "Topa aw, bang ahi hiam?" ci-in a dong hi. Tua vansawltak in, "Na thungetnate le mizawngte na citpiaknate Pasian mai-ah a kiphawk den biakna dingin hong tungto zo hi.

⁵Tu-in Joppa ah mi sawl inla, Simon min nei Peter kici pa va samsak kik in.

⁶Amah savun bawl Simon tawh omkhawm a, ama inn tuipi gei ahi hi," ci-in a dawng hi.

⁷Amah a hopih vansawltak a ciah khit ciangin Cornelius in a nasemte nih le a galkapte lakah biakna-a kipumpiak khat a sam hi.

⁸Amah in amaute tungah a piangsa thu khempeuh gena, Joppa ah a sawl hi.

⁹A zingciang sun pawl, amaute khuapi zuana a pai laitakun, thungen dingin Peter inntungah a pai to hi.

¹⁰Amah a gil kiala, bang khatpeuh duh in; a an ding a kihuan san laitakin mumang bangin a om hi.

¹¹Van kihonga, a pek lianpi khat a kiu li tek panin leitunga kikhaisuk a mu hi.

¹²Tua sungah khe li nei ganhing nam khempeuh, leitunga, a bokvak ganhingte le huih lak vasate zong a om hi.

¹³Tua ciangin aw khat in ama kiangah, "Peter aw, tho in. Go inla ne in," ci-in a gen hi.

¹⁴Peter in "Hi buang lo e, Topa! Ken a siangtho lo le a nin na khatpeuh ka ne ngei kei hi," ci-in a dawng hi.

¹⁵Tua aw in a nih veina hopih a, "Pasian in a sianga a bawlsa na khatpeuh, siang lo hi, ci kei in," a ci hi.

¹⁶Thum vei tua bangin hi-a tua khit ciangin tua a pek lianpi vantungah kila kik pah hi.

¹⁷Peter in tua a mangmuh a khiatna a ngaihsutsut laitakin Cornelius sawl mite in Simon inn mu uh a, a kongpi ah a khawl uh hi.

¹⁸Peter kici Simon tua munah a taam lai hiam, ci-in a galdot uh hi.

¹⁹Peter in a mangmuhna a ngaihsutsut laitakin Kha in ama kiangah, "Simon aw, mi thum b[43] in nang hong zong hi.

²⁰Tua ahi ciangin tho inla, kumsuk in. Amaute kong sawl ahi manin, na zuih ding lungsit kei in," a ci hi.

²¹Peter kumsuk a mite kiangah, "Na zonpa uh keimah ka hi hi. Bang dinga hong pai na hi uh hiam?" a ci hi.

²²Tua mite in, "Zakhat-ukpa Cornelius kiang pana hong pai ka hi uh hi. Amah thumaanin Pasian kihta mi hi a, Jew mi khempeuh in a zahtak khat ahi hi. Vansawltak siangtho khat in ama kiangah, nang thu gena, amah in a zak theih nadingin ama kiangah nang hong sap dingin a gen hi," ci-in a dawng uh hi.

²³Tua ciangin Peter in tua mite inn sungah sama zin a tungsak hi. A zing ciangin amaute tawh Peter tonkhawma, Joppa a, sanggamte pawl khat in a zui uh hi.

²⁴A thai ciangin Caesarea a tung uh hi. Cornelius in amau tun ding lamena, a tanaute le a kinaipih a lawmte a na samkhol hi.

²⁵Inn sungah Peter luta, Cornelius in amah na dawn tuahin, amah zahtaka, a khephungah a bok hi.

²⁶Ahi hangin Peter in amah phong to-a, "Ding to in, kei zong mihing lel mah ka hi hi," a ci hi.

²⁷Amah tawh a kiho kawmin Peter sungtuma, mi tampi a kikhawm a mu hi.

²⁸Amah in amaute kiangah, "Jew mi adingin Gentile mi tawh kikholh ahi zongin, amau kiangah va hawh ahi zongin, ka thukham uh tawh kituak lo hi, cih na theihsa uh ahi hi. Ahi hangin mi khatpeuh a siangtho lo ahikeh nin hi ka cih loh nadingin Pasian in hong lak zo hi.

²⁹Tua hi-a kei hong kisapsak ciangin nial loin kong pai hi. Bang hanga kei hong samsak na hi uh hiam?" a ci hi.

³⁰Cornelius in, "Nung ni li lai-in, ka inn sungah nitak lam nai thum, tu hunin thu ka ngen hi. Thakhatin ka mai-ah puan atang selsal a silh mi khat hong dinga,

³¹‘Cornelius aw, Pasian in na thungetna za zo a, mizawngte na piakte ciamteh zo hi.

³²Joppa a Peter kici Simon samsak in. Amah tuipi gei-a teng savun bawlpa Simon inn ah tung hi,’ ci hi.

³³Tua ciangin nang kong samsak pah a, nong pai a hoih mahmah hi. Tu-in kote nong hilh dinga Topa hong thupiak peuhmah a ngai dingin kote khempeuh hih lai Pasian mai-ah ka om uh hi," a ci hi.

³⁴Tua ciangin Peter thugen kipan a, "Pasian in angvan tuam nei loin

³⁵minam khempeuh panin amah kihta-a, a dik-a gamta mite khempeuh a sanna thu, amaan a hina teltakin ka thei ta hi.

³⁶Pasian in Israel-te tunga a thupuak mite khempeuh Topa Jesu Christ tungtawna kigen hih lemna hong tun lungdamna thute ahi hi.

³⁷John in baptise-na thu a gen khit nungin Galilee gama kipan Judea gamsung khempeuh ah bang thu piang hiam, cih na thei zo uh hi.

³⁸Pasian in Nazareth mi Jesu, Khasiangtho le vangliatna sathau a nilh zia le amah pai kawikawi in, Pasian in amah a ompihna hangin na hoih sema, dawimangpa vangliatna nuai-a mi khempeuh a dam saknate na thei zo uh hi.

³⁹Jew-te gam le Jerusalem a, a septe khempeuh ah kote teci ka hi uh hi. Amaute in amah sing tungah khai-in that uh a,

⁴⁰ahi hangin a ni thum ni-in Pasian in misi pan amah thokiksaka, a kimusak hi.

⁴¹Amah mi khempeuh in mu lo a, Pasian in a teci dinga a teelkholhsa kote in mu in - misi pana a thawh khitin amah tawh a nekhawm a dawnkhawm kote ka om uh hi.

⁴²Amah in mite tunga thuhilh ding le mihingte le misite tunga thukhen ding pa in amah a sehna thu teci ahi dingin Pasian in kote thu hong pia hi.

⁴³Amah a umte khempeuh in ama min tungtawnin mawh maina a ngah nading uh thu, kamsangte khempeuh in teci a pang zo uh hi," a ci hi.

⁴⁴Peter in hih thute a gengen laitakin hih thupuak a za mi khempeuh tungah Khasiangtho a tung hi.

⁴⁵Peter tawh a pai khawm vunatte lakah a um mite in, Gentile-te tung nangawna Khasiangtho a kisunkhiat ciangin lamdang a sa mahmah uh hi.

⁴⁶Ahang in, amaute paute a[44] in pau uh a, Pasian a phat uh a za uh hi. Tua ciangin Peter in,

⁴⁷"Hih mite tui-in a kibaptise ding kua in kham thei ding ahi hiam? Eite bang tektekin amaute in Khasiangtho a ngah zo uh hi," a ci hi.

⁴⁸Tua ciangin amah in amaute Jesu Christ min-a kibaptise dingin thu a pia hi. Tua ciangin amaute in ni tawmkha sung amaute kiangah Peter a taam lai nading a thum uh hi.