Read Zokam Nasepte 12 Bible Online

Nasepte 12 - Zokam bible

Nasepte 12

¹Tua hunlai pawlin Kumpi Herod in pawlpi mite pawlkhat bawlsiat sawmin a man hi.

²Amah in John sanggampa James namsau tawh that khin zo hi.

³Hih thu in Jew-te lung kimsak cih a muh ciangin Peter zong mat beh a sawm lai hi. Hih in Silngo-sawhloh Anlum Pawi huna thupiang ahi hi.

⁴Amah a mat khit ciangin thong sungah khuma, galkap li-a kipawl, pawl lite cin dingin a ap hi. Herod in, Paisan Pawi a ven cianga mipite mai-ah thukhen dingin lakkhiat a sawm hi.

⁵Tua dinga Peter thong sunga a khum ahi hi. Ahi hangin pawlpite in ama ading cihtakna tawh Pasian tungah thu a ngen uh hi.

⁶Herod in thukhen dinga lakkhiat a sawm ni ma zanin, galkap nih kikalah Peter luma, sikkhainiang nihin kikhihin, a cingte in kong a cing uh hi.

⁷Thakhatin Topa vansawltak khat kilanga, thong inn sung teng khuavak in a tan hi. Amah in Peter a pang bengin a phawng hi. Amah in, "Manlang in, tho in!" ci-a Peter khutdawh pan sikkhainiangte a kitolkhia hi.

⁸Tua ciangin vansawltak in a kiangah, "Na puante silh in, na khedapte bulh in," a ci hi. A cih bangin Peter in a hih hi. Vansawltak in, "Na puantualpi silh inla kei hong zui in," ci-in a gen hi.

⁹Peter in amah thong pua ah a zuih hangin, vansawltak hihna a takpi mah hiam, cih thei loin mangmu-in kingaihsun hi.

¹⁰Amaute in thong cingte a masa le a nihna khengin khuapi sung paina sik kongpi a tung uh hi. Tua kongpi ama thu-in na kihonga, amaute a paikhia uh hi. Kongzing khat a zuih suak khit uh ciangin vansawltak in amah thakhatin a nusia hi.

¹¹Tua ciangin Peter in khua phawk a, "Topa in ama vansawltak hong sawla, Herod khutlum pan le Jew mite in zong lamena, a ngak uh na khempeuh panin kei hong hukhia ahilam lungheina om loin tu-in ka thei ta hi," a ci hi.

¹²Amah in hih thu a phawkkhiat ciangin, mi tampi kikhawm a thu a ngetna mun Mark zong a kici John nu Mary inn ah a pai hi.

¹³Peter in kongkhak puanung pen va kiu-a, a hon dingin Rhoda kici nasem numeino khat a pai hi.

¹⁴Tuanu in Peter aw ahilam a theihcian ciangin nuam mahmah a, kong hon loin lehtai kika, "Kongkhak ah Peter om!" ci-in a kiko zak hi.

¹⁵Amaute in ama kiangah, "A hai hi mai niteh!" a ci uh hi. Hi taktak hi, ci-in a nial teitei ciangin amaute in, "Ama vansawltak hi inteh," a ci uh hi.

¹⁶Ahi hangin Peter in kongkhak kiukiu a, kong a hon uh ciangin amah mu uh a, lamdang a sa mahmah uh hi.

¹⁷Peter in amaute a daih nadingun a khut vana, thong sung panin Topa in amah a lakkhiatna zia teng a gen hi. Amah in, "James le sanggamte kiangah hih thu na ko un," a cih khit ciangin mundang ah a pai hi.

¹⁸A zingsang ciangin Peter bang suakta hiam, ci-in galkapte a pumbuai gawp uh hi.

¹⁹Herod in kiciantakin amah zonga, a muh loh ciangin thong cingte sittel a, amaute thah dingin thu a pia hi. Tua ciangin, Judea gam panin Caesarea ah Herod pai-a tua lai-ah tawmvei sung a om hi.

²⁰Amah Tyre le Sidon mite tawh a kitawng den ahi hi. Amaute kipawl khawmin amah tawh kihopih a sawm uh hi. Amaute in kumpipa nasem muan pa Blastus panpihna tawh lemna a ngen uh hi. Bang hang hiam cih leh amaute an ngahna ama kumpipa gam sung bek ahi hi.

²¹A ni ciam ni ciangin Herod in a kumpi puantual silh-a a kumpi tokhom tungah tu-in, mipite tungah thu a gen hi.

²²Amaute in, "Hih aw, mihing aw hi loin Pasian aw ahi hi," ci-in a awng uh hi.

²³Herod in, Pasian phatna pia lo ahi manin Topa vansawltak khat in, amah sattukin than in ne-a a si hi.

²⁴Ahi hangin Pasian thu khangin a kizel semsem hi.

²⁵Barnabas le Saul in a nasep uh a zawh khit uh ciangin Jerusalem panin a[46] ciah kik uh a, Mark zong a kici John a tonpih uh hi.