Read Zokam Nasepte 13 Bible Online

Nasepte 13 - Zokam bible

Nasepte 13

¹Antioch a pawlpi sungah kamsangte le thuhilhte: Barnabas, Niger kici Simeon, Cyrene mi Lucius, Manaen (Gam ukpa Herod tawh a khangkhawmpa) le Saul-te a om uh hi.

²Amaute in Topa bia in an a tan laitakun Khasiangtho in, "Amaute ka sapna na a sem dingin Barnabas le Saul hong sehkhiatsak un," a ci hi.

³Amaute in an tangin thu a nget khit uh ciangin amaute gel tungah a khut uh nga uh a, a sawlkhia uh hi.

⁴Amaute gel Khasiangtho sawlin Seleucia ah paisuk uh a, tua lai panin Cyprus manawhin tembaw in a tuang uh hi.

⁵Amaute Salamis a tun uh ciangin, Jew-te synagogue-te ah Pasian thu a tangko uh hi. John zong amaute huh in amau tawh a omkhawm hi.

⁶Amaute Paphos a tun dongun tua tuikulh tung khempeuh ah a zin kawikawi uh hi. Tua lai-ah dawi-ai tawi-a, kamsang zuau Bar-Jesus kici Jew mi khat om a,

⁷amah pen gam ukpa Sergius Paulus nasempa ahi hi. Tua gam ukpa a pil mahmah mi khat hi-a Pasian thu za nuam ahi manin, Barnabas le Saul a samsak hi.

⁸Ahi hangin Elymas dawi-ai tawi pa (tua pen a min khiatna) in amaute na nang a, tua upna panin gam ukpa heikhiat a sawm hi.

⁹Tua ciangin Paul zong a kici Saul, Khasiangtho tawh kidim a, Elymas en gemgam in,

¹⁰"Nang dawimangpa ta khat na hi-a amaan nate khempeuh gal na hi hi! Khemna nam khempeuh le zuautatna tawh na kidim hi. Topa lampi maan na lehheina, tawp ngei lo ding na hi hiam?

¹¹Tu-in Topa khut in nang hong langpan hi. Na mit a taw dinga, hun bang tan hiam khat nitang na mu thei kei ding hi," a ci hi. Ama tungah thakhatin meiilum le khuamial in tuam a, amah in zawt kawikawi-in a khuta amah kai ding a zongzong hi.

¹²Gam-ukpa in a piangsa thu a muh ciangin a um hi; ahang in, Topa tawh kisai tua thuhilhna lamdang a sa mahmah hi.

¹³Paphos panin Pamphylia gama Perga lam manawhin Paul le a pawlte tembaw in tuang uh a, John in amaute tua khua ah nusia-in amah Jerusalem ah a kileh kik hi.

¹⁴Perga panin amaute Pisidia gama Antioch ah a paisuak uh hi. Sabbath ni-in amaute synagogue ah lutin a tu uh hi.

¹⁵Synagogue ukte in Thukham le Kamsangte laibu pan a sim khit uh ciangin amaute kiangah, "Sanggamte aw, mipite hanthawn nopna thupuak na neih uh leh hehpihna tawh hong gen un," a ci uh hi.

¹⁶Paul ding to-in a khut vana, "No, Pasian a bia Israel-te le Gentile-te aw, ka thugen na ngai un!

¹⁷Israel mite’ Pasian in i pate na teeltuama, Egypt a, a om lai-un tua mite na lawhcingsakin ama vangliatna thupi tawh tua gam panin amaute na pikhia hi.

¹⁸Kum sawmli sung sehnel-gam ah amau gamtatna a[47] a thuak keikai hi.

¹⁹Amah in Canaan gam sunga minam sagihte lawnthal a, amaute leitang ama mite luah dingin a pia hi.

²⁰Hihte khempeuh a tun nading kum 450 bang sawt hi. "Tua nung ciangin kamsang Samuel hun dong, Pasian in amaute ading thukhente a pia hi.

²¹Tua ciangin tua mite in kumpi khat ngen uh a, amah in Benjamin beh ahi Kish tapa Saul, amaute a pia hi. Amah in kum sawmli sung a uk hi.

²²Saul paikhiat khit ciangin amaute kumpi dingin David a koih hi. Amah tawh kisai-in teci panga, ‘Ka lungsim tawh kituak Jesse tapa David ka mu zo hi; amah in sep dinga ka deih peuhpeuh a sem ding hi,’ ci hi.

²³"Pasian in hih mipa suan le khakte panin Israel-te kianga a ciamsa bangin Honpa Jesu a puak hi.

²⁴Jesu a pai ma-in John in, Israel mite khempeuh tungah kisikna le baptisena a hilh hi.

²⁵John in a nasep a zawh kuan in, ‘Kei kua hi-in nong ngaihsun uh hiam? Tua na ngaihsut pa uh ka hi kei hi. Amah ka hi kei a, amah ka nungah hong pai dinga, ama khe dapkhau phel ding nangawnin ka cin kei hi,’ ci hi.

²⁶"Sanggamte, Abraham tate le no Pasian kihta Gentile-te aw, hih hot-khiatna thupuak eite tungah hong kipuak zo hi.

²⁷Jerusalem a mite le a gam-ukte un, Jesu theitel lo napi, Sabbath tenga kisim kamsangte thugente amah mawhpaihna tawh a tangtun uh hi.

²⁸Amaute in sihna ding zahin thukho mu zo lo napi Pilate in a thah nading a ngen uh hi.

²⁹Ama thu a kigelhsa khempeuh a hih kim khit uh ciangin singtung pan lakhia uh a, han sungah a sial uh hi.

³⁰Ahi hangin Pasian in amah misi pan thosak a,

³¹Galilee pan Jerusalem a, a khual zinpihte in ni tampi sung a mu uh hi. Tu-in i mipihte tungah amaute teci ahi uh hi.

³²"Kote in note tunga kong gen uh lungdamna thu: Pasian in i pate tunga a kamciamsa,

³³ei amau tate adingin Jesu thawhsaktohna tawh tangtun zo hi. Phatna-late a nihna ah: "‘Nang ka Tapa na hi hi; tuni-in na Pa b[48] kong suak hi,’ c[49] ci-a kigelhsa bangin,

³⁴a muat ngei nawn lo dinga Pasian in misi pana a thawhsak takpina thu, hih thute: "‘David tunga kamciamsa, a siangtho le a kip thupha nang kong pia ding hi,’ d[50] ci-a,

³⁵tua ahi manin mundangah zong, "‘Nang in, nangma Misiangtho Pa na muatsak kei ding hi.’ e[51] ci-in kigelh hi.

³⁶"Ahang in, David in ama khan sungin Pasian deihna bangin na a sep khit ciangin a ihmu hi; a pate tawh kivui-a, a pumpi a muat hi.

³⁷Ahi hangin Pasian in misi pana a thawhsak pa ahileh a muat kei hi.

³⁸"Tua ahi manin ka sanggamte aw, Jesu tungtawnin mawhnate maisakna thu note tungah kitangko ahilam na theih ding uh ka deih hi.

³⁹Moses thukham pana dik na tan theih lohnate khempeuh uh, ama tungtawnin a um peuhpeuh in dik tang ta hi.

⁴⁰Kamsangte gensa no tunga a tun loh nadingin na kikem un; tua in:

⁴¹"‘No mizahpih hatte aw en un lamdang sa unla mangthang un; ahang in, mi khatpeuh in hong gen taleh na up ngei loh ding uh na khat, na nuntak sungun ka hih ding hi,’ f[52] ci hi," a ci hi.

⁴²Synagogue panin Paul le Barnabas a ciah uh leh mite in Sabbath ni kik ciangin hih nate thu a ban a genlai dingun a sam uh hi.

⁴³A kikhawm mipite a kikhen uh ciangin Jew mite le Jew-te biakna-a kikhelsa a kipumpiak mahmah mi tampite in Paul le Barnabas a zui uh hi. Amaute in na hopih uh a, Pasian hehpihna sungah kiptaka a om den nadingun a kun uh hi.

⁴⁴Sabbath ni kik ciangin khuapi bupa mi khempeuh phial Topa thu ngai dingin a kikhawm uh hi.

⁴⁵Jew-te in mihonpite a muh uh ciangin haza mahmah uh a, Paul thugente langbawlin a siatgen uh hi.

⁴⁶Tua ciangin Paul le Barnabas in: "Note kiangah Pasian thu kong gen masak ding mah uh ahi hi. Note in tua thu nial a, nuntak tawntungna ngah dingin cing kisa lo na hi nungsangun, tu-in Gentile-te lam ka nga ta uh hi.

⁴⁷Ahang in, Topa in eite hong thupiak hih ahi hi. "‘Nang in leitung mongte dongin hotkhiatna na puak theih nadingin keimah in no a[53] Gentile-te tungah khuavak ahi dingin kong bawl zo hi,’ b[54] ci hi," c[55] ci-in amaute hangtakin a dawng uh hi.

⁴⁸Gentile-te in hih thu a zak uh ciangin lungdam mahmah in Topa thu pahtawi uh a, nuntak tawntungna ngah dinga kisehsate khempeuh in a um uh hi.

⁴⁹Tua kual bup tengah Topa thu a kizel hi.

⁵⁰Ahi hangin Jew-te in Pasian kihta numei zahtakhuaite le khuapi sunga tangpi makaite a holhthawh uh hi. Amaute in Paul le Barnabas langbawlin a bawlsia ding mi tawsawn uh a, amau kual panin a hawlkhia uh hi.

⁵¹Tua ciangin amaute in tua mite a langpanna un a khepekua leivuite singkhia uh a, Iconium ah a pai uh hi.

⁵²Nungzuite, lungnopna le Khasiangtho tawh kidim uh hi.