Read Zokam Nasepte 16 Bible Online

Nasepte 16 - Zokam bible

Nasepte 16

¹Derbe ah amah tunga, tua khit ciangin nungzui Timothy tenna Lystra a tung hi. Timothy nu, thu um Jew mi hi-a a pa Greek mi ahi hi.

²Lystra le Iconium a sanggamte in amah phat mahmah uh hi.

³Paul in a khualzinna ah amah tonpih nuam ahi manin a vun a atsak hi. Bang hang hiam cih leh tua huam a tengte Jew-te vive hi-a, a pa Greek mi ahilam a theih khitsa uh ahi hi.

⁴Amaute khuapi khat pan khuapi khatah zin uh a, Jerusalem a sawltakpite le upate in mite zuih dinga thukhensatna a bawlsate uh a gen kawikawi uh hi.

⁵Tua hi-a pawlpite upna ah kithakhauhsakin nisimin mi a kibehlap hi.

⁶Paul le a lawmte Phrygia le Galatia kual khempeuh ah zin kawikawi uh a, Asia gama thu a hilh ding uh Khasiangtho in a phal kei hi.

⁷Mysia tawh gamgi a tun uh ciangin amaute, Bithynia ah lut sawm uh a, ahi hangin Jesu’ Kha in amaute a pai ding uh a phal kei hi.

⁸Tua ciangin Mysia khengin Troas ah a paisuk uh hi.

⁹Zan laitakin Paul in Macedonia gam mi khat dingin, "Macedo-nia ah hong galkah unla, ko hong huh un," ci-a gen khat a mangin a mu hi.

¹⁰Paul in mang a muh khit ciangin Pasian in eite amau kianga lungdamna-thu hilh dingin hong deih hi, ci-a Macedonia a pai dingin a kithawi pah uh hi.

¹¹Troas panin tuipi tungah tembaw in Samothrace zuanin tangtakin ka pai uh a, a zing ciangin Neapolis ka tung uh hi.

¹²Tua lai panin Macedonia khuapi khen sunga a lian pen Rome pemtate tenna khua ahi, Philippi ka tung uh hi. Tua lai ah sawt veipi ka taam uh hi.

¹³Sabbath ni-in khuapi kongpi pualam ah paikhia-in thunget nading mun om a ka lametna uh gungei-ah ka pai uh hi. Tua lai-a a na kikhawmsa numeite tungah thu ka gen uh hi.

¹⁴Tua thungaite lakah Lydia min nei, Thyatira khuapi pana puan dupsan zuak Pasian a bia numei khat a om hi. Topa in Paul thupuak sang dingin a lungsim a honsak hi.

¹⁵Amah le a innkuanpihte a kibaptise khit uh ciangin a inn ah kote hong sam hi. Amah in, "Kei, Topa a um khat hi, ci-a nong sim uh leh hong pai-in ka inn ah hong taam un," a ci hi. Tua ci-in kote hong zol zo ta hi.

¹⁶Khat vei thungetna muna ka pai laitakun dawi lawmnei-a mailam thu a genkhol thei sila numeino khat ka tuak uh hi. Amah in mailam thu genkholin, amah a neite ading sum tampitak a thalawhsak hi.

¹⁷Hih numeino in Paul le ko adangte hong zui a, "Na suahtak nading uh lampi hong gen hih mite Sang pen Pasian nasemte ahi uh hi," ci-in a kiko hi.

¹⁸Hih bangin amah in ni tampi sung a hih den hi. A tawpna ah Paul in nawngkai sa mahmah a kihei-in tua kha kiangah, "Ama sung pan paikhia dingin Jesu Christ minin thu kong pia hi," a ci hi. Tua hun lianin kha in tuanu a nusia hi.

¹⁹Tua silanu a neite in a sum muhna uh bei ta cih a theih uh ciangin Paul le Silas man uh a, thuneite mai-a ding dingin vanzuakna mun sumbuk tualah a kaigawp uh hi.

²⁰Amaute in thukhen mangte mai-ah amaute puak uh a, "Hih mite Jew-te hi uh a, ka khuapi uh a tokbuai gawp uh hi.

²¹Tua pen, ko Rome mite san le zuih dinga ngeina tawh kituak lo hong hilh hang uh ahi hi," a ci uh hi.

²²Paul le Silas langah mihonpite pang uh a, thukhen mangte in amaute puan hawkkhiatsakin satsak dingin thu a pia uh hi.

²³Amaute nakpi-a, a kisat khit ciangin thong sungah kikhum a, limtaka a cin ding in thong cingpa thu a pia uh hi.

²⁴Tua bang thupiaknate a ngah bangin amaute thong sungnung pen ah khuma, a khete ah kol a bulh hi.

²⁵Zankim pawlin Paul le Silas in, Pasian kiangah thu ngenin biakna late sa uh a, thongkia dangte in a ngai uh hi.

²⁶Thakhatin zin nakpi-in linga, thong inn bulpi a kilok hi. Thakhatin thong kong khak khempeuh kihonga, mi khempeuh kikhihna sik khainiang khempeuh kitolkhia hi.

²⁷Thong cingpa khanglo a thong kongkhakte kihongsa a om a muh ciangin, thongkiate suakta khin hi ci-a ngaihsun ahi manin a namsau dokin amah le amah thah a kisawm hi,

²⁸Ahi hangin Paul in, "Bangmah kicih kei in! Kote ka vekun hiah ka om uh hi!" ci-in a kiko hi.

²⁹Thong cingpa in meivaksakin a sungah lut pah a, Paul le Silas-te mai-ah ling kawmin a bok hi.

³⁰Tua ciangin amah in amaute paikhiatpih a, "Pute aw, hong kihotkhiat nadingin bang ka hih ding kul hiam?" ci-in a dong hi.

³¹Amaute in, "Topa Jesu um un, nang le na innkuanpihte hong kihonkhia ding hi," a ci uh hi.

³²Tua ciangin amaute in amah le a inn sunga om adangte khempeuh tungah Topa thu a genpih uh hi.

³³Tua zan hunpi mah in thong cingpa in amaute paipih a, a liamnate uh silsakin amah le a innkuanpihte khempeuh a kibaptise uh hi.

³⁴Thong cingpa in a inn ah paipih a, amaute an lui-in, Pasian um ta uh ahi manin a innkuan bupun lungnopna tawh kidim uh hi.

³⁵Khuavak ciangin thukhen mangte in thong cingpa kiangah a bupate uh sawlin, "Tua mite khahkhia in," cih thupiak tawh a paisak uh hi.

³⁶Thong cingpa in Paul kiangah, "Thukhen mangte in nang le Silas khahkhiat ding thu hong pia zo uh hi. Na pai thei ta uh hi. Lungnuamtakin pai ta un," ci-in a gen hi.

³⁷Ahi hangin Paul in uliante kiangah, "Kote Rome mi hi napi thudotna om loin mipi mai-ah hong satin thong sungah hong khum uh hi. Tua hi napi tu-in sim khahkhiat hong sawm uh ahi hiam? Hi thei peuhmah lo ding hi! Amaute mahmah hong pai-in kote hong tonpihkhia ta uh hen," a ci hi.

³⁸Uliante in hih thu thukhen mangte kiangah tun uh a, amaute in Paul le Silas, Rome mi ahilam a theih uh ciangin a patau uh hi.

³⁹Amaute lungkimsak dingin va pai uh a, thong sung pan tonpihkhia in khuapi a nusiat nadingun a ngen uh hi.

⁴⁰Paul le Silas thong sung pan a paikhiat khit uh ciangin Lydia inn ah a pai uh hi. Tua lai-ah sanggamte tawh kimu-in amaute a hanthawn uh hi. Tua ciangin a paikhia uh hi.