Read Zokam Nasepte 18 Bible Online

Nasepte 18 - Zokam bible

Nasepte 18

¹Hih teng khit ciangin Athen nusia in Corinth ah Paul a pai hi.

²Tua lai-ah Pontus gammi Aquila kici Jew mi khat tawh a kituak hi. Amah, Jew-te khempeuh in Rome nusia dinga Claudius in thu a piakna hanga Italy pana a zi Priscilla tawh hun sawt nai lo-a a tung uh ahi hi. Amaute tawh kimu dingin Paul a pai hi.

³Bang hang hiam cih leh amah amaute banga puanbuk bawlpa ahi manin amaute kiangah taamin na semkhawm uh hi.

⁴Sabbath ni simin Jew-te le Greek-te zol sawmin synagogue sungah thu a kikuppih hi.

⁵Macedonia panin Silas le Timothy a tun uh ciangin Paul amahmah thuhilhna bekah kipumpiak a, Jew-te kiangah, "Jesu in Christ a[64] hi," ci-in a hilh hi.

⁶Ahi hangin Jew-te in Paul sel uh a, a selpho uh ciangin amaute a langpan dingin a puante singkhia a, amaute kiangah, "Na sisan uh nomau lutungah tu ta hen! Ka tavuan ah ka siang zo hi. Tu-a kipan Gentile-te kiangah ka pai ta ding hi," a ci hi.

⁷Tua ciangin Paul in synagogue nusia a, tua inn zoma om Pasian bia pa khat Titus Justus inn ah a lut hi.

⁸Synagogue ukpa Crispus le a innkuan pihte khempeuh in Topa um uh a, ama thu a za Corinth mite tampi in umin a kibaptise uh hi.

⁹Zan khat Paul mangmuhna sungah Topa in hopih a: "Kihta kei in, na gen ban zom in, dai tuan kei in.

¹⁰Nang tawh omkawm ka hi manin kuamah in nang hong doin hong liamsuah lo ding hi. Bang hang hiam cih leh hih khuapi sungah mi tampi ka nei hi," a ci hi.

¹¹Tua ciangin Paul, kum khat le alang sung om a, amaute Pasian thu a hilh hi.

¹²Gallio, Achaia-a gam-ukpa ahi laitakin Jew-te kipawlkhawmin Paul va busim uh a, thukhen zumah a tun uh hi. Amaute in,

¹³"Hih mipa in thukham tawh kileh bulhin Pasian bia dingin mite a zol hi," ci-in a ngawh uh hi.

¹⁴Paul a pau dektak laitakin Gallio in Jew-te kiangah, "No Jew-te in a kilawm lo gamtatna ahikeh khialhna lian thu hong gen hi le uh cin na thu uh, thu-in kisang thei ding hi.

¹⁵Ahi hangin nomau thukham tawh kisai kammalte le minte thu hanga piang ahi manin no le no mah in na siangsak un. Tua bang thute a khen in ka pang kei ding hi," a ci hi.

¹⁶Tua ciangin thukhen zum panin amaute a hawlkhiasak hi.

¹⁷Tua ciangin amaute khempeuh in synagogue ukpa Sosthene bawhhuan uh a, thukhen zum mai-ah a sat uh hi. Ahi hangin Gallio in a awlmawh kei hi.

¹⁸Corinth ah tawm vei sung Paul a taam lai hi. Tua ciangin sanggamte nusia in Priscilla le Aquila tonpih a Syria ah tembaw-in a pai uh hi. Amah in kiciam nasa khat a neih manin tembaw tung a tuan ma-in Cenchrea ah a sam a metmaisak hi.

¹⁹Amaute Ephesus tung uh a, tua lai-ah Paul in Priscilla le Aquila a nusia hi. Amah ahileh synagogue ah pai-a Jew-te thu a kikuppih hi.

²⁰Hun tamzaw a zat ding a nget uh ciangin amah in a sel hi.

²¹Ahi hangin a nusiat ding ciangin, "Pasian deihna ahileh kong pai kik ding hi," ci-in a kamciam hi. Tua ciangin Ephesus panin tembaw tuangin a dingkhia hi.

²²Caesarea a tun uh ciangin paito-in pawlpite va hopih a, tua ciangin Antioch ah a paisuk hi.

²³Antioch ah hun sawtkhop a zat khit ciangin tua lai pan Paul kipankhia kik a, Galatia le Phrygia kual mun khat khit mun khatah zin kawikawi-in, nungzuite khempeuh a va thakhauhsak hi.

²⁴Tua hun sungin Alexandria khua mi Apollos kici Jew mi khat Ephesus ah a pai hi. Amah theihna sang khat hi-a, Laisiangtho theih mahmah tawh a thuah hi.

²⁵Amah Topa lampi lama kihilh ngiingeisa hi-a, John baptisena bek a thei hi napi, Jesu thu tawh kisai siangtakin hilha, lawptakin b[65] thu a gen hi.

²⁶Amah, synagogue sungah hangtakin a pau ngam hi. Priscilla le Aquila in a thu gen a zak uh ciangin a innuah sam uh a, ama tungah Pasian lampi thu a kimzawin a hilh cian uh hi.

²⁷Achaia-ah Apollos a pai nop ciangin sanggamte in amah hanthawn uh a, tua lai-a om nungzuite in amah a na muak nadingun lai a khak uh hi. Amah a tun ciangin hehpihna hanga a um mite adingin amah a phatuam pha mahmah hi.

²⁸Ahang in, mipi laka thu kinialnate ah amah in Jesu in Christ hi, ci-in Laisiangtho panin Jew-te a dongkhak giapgiap hi.