Read Zokam Nasepte 19 Bible Online

Nasepte 19 - Zokam bible

Nasepte 19

¹Corinth ah Apollos a om laitakin gam sung lamzikpi zui in Paul zina, Ephesus a tung hi. Tua lai-ah nungzuite pawlkhat mu a, amaute kiangah,

²"Na up uh ciangin c[66] Khasiangtho na ngah uh hiam?" ci-in a dong hi. Amaute in, "Ka ngah kei uh hi, Khasiangtho a om lam nangawn ka za ngei nai kei uh hi," ci-in a dawng uh hi.

³Tua ciangin Paul in, "Tua ahileh bang baptisena na ngah uh hiam?" a ci hi. Amaute in, "John baptisena" a ci uh hi.

⁴Paul in, "John baptisena pen kisikna hanga baptisena ahi hi. Amah in mipite kiangah ama nunga paipa a up dingun hilha, tua pen Jesu um ding cihna ahi hi," a ci hi.

⁵Amaute in hih thu a zak uh ciangin Topa Jesu min sungah a[67] a kibaptise uh hi.

⁶Paul in amaute tungah a khut a ngak ciangin amaute tungah Khasiangtho tunga paute b[68] in pau-in thu a gen uh hi.

⁷Tua mite a vekpi un sawm-le-nih bang a pha uh hi.

⁸Synagogue sungah Paul luta, mi lungsim a zo theithei dingin Pasian gam thu kiselin, hangtakin kha thum sung tua lai-ah thu a gen hi.

⁹Ahi hangin amaute pawlkhat phengphi uh a, um nuam loin mipi mai-ah Lampi thu a gensia uh hi. Tua ciangin Paul in amaute a nusia hi. Amah in nungzuite paikhiatpih a, Tyrannus-te thugenna innpi sungah nisimin thu a kikuppih hi.

¹⁰Asia gam sunga teng Jew-te le Greek-te khempeuh in Topa thu a zak nadingun hih bangin kum nih sung a hih hi.

¹¹Pasian in Paul tungtawnin a lam dang tuam nalamdangte a bawl hi.

¹²Paul tawh a kisukhasa mainul neute le angtuamte, cinate kiangah a kitawi ciangin a natnate uh damin, kha gilote in amaute a nusia uh hi.

¹³Kha gilote hawlkhia-a, a vak kawi kawi Jew-te pawlkhat in dawilut mite tungah Topa Jesu min zangin kha gilote hawlkhiat a sawm uh hi. Amaute in, "Paul in a thu a hilhpa Jesu minin na paikhiat ding thu kong pia hi," khawng a ci uh hi.

¹⁴Hih banga a hihte, Jew siampi makai khat Sceva tapa sagihte ahi uh hi.

¹⁵Ni khat tua kha gilo in amaute tungah, "Jesu ka thei a, Paul thu zong ka thei hi, no kua na hi uh hiam?" a ci hi.

¹⁶Tua ciangin kha gilo lutna mipa amaute tungah diang gawpa, a vekpi un a zogawp hi. Amah in amaute nakpi-in vua a, guaktangin sisan luang sa-in a taikhia uh hi.

¹⁷Ephesus a teng Jew-te le Greek-te in hih thu a theih uh ciangin lau uh a, Topa Jesu min nakpitakin a zahtak uh hi.

¹⁸A umte tampi hong pai uh a, a gitloh gamtatnate uh a pulakkhia khin uh hi.

¹⁹Dawi-ai tawi mi honkhat in a laizialte uh kaikhawm uh a mipite muhin a haltum uh hi. Tua laizialte aman a seh uh ciangin a vekpi in drachmas c[69] tul sawmnga man hi.

²⁰Hih bangin Topa thu zaipitakin kizela, a vangliatna a khang hi.

²¹Hihte khempeuh a pian khit nungin Paul in Macedonia le Achaia-ah nawkin Jerusalem ah pai ding a khensat hi. Amah in, "Tua lai ka tun khit ciangin Rome ah zong ka hawh kul hi," ci hi.

²²Amah a huhte nih, Timothy le Erastus, Macedonia ah sawl a, amah tawmvei sung Asia gamah a taam lai hi.

²³Tua hun pawlin Lampi thu tawh kisai buaina lianpi khat a piang hi.

²⁴Ngun seek Demetrius min nei khat oma, tuapa in ngun tawh, Artemis biakbuknote bawla, khutsiamte adingin sumzuakna neu het lo khat a suaksak hi.

²⁵Amah in amau sep bang a semte le sumbawlna-a a neite khempeuh samkhawm in, "Guaite aw, hih sum bawlna panin sum tampitak hong tum hi, cih na thei uh hi.

²⁶Tua hi-a hih mipa Paul in Ephesus le Asia gam bupah mi tampitak thuzawha, a pimang zia mu-in na za zo uh hi. Amah in, ‘Mihing bawltawm pasiante Pasian hi peuhmah lo hi,’ ci hi.

²⁷I sumbawlna a minsiat ding a lauhuai bek tham loin alian numei Artemis biakinnpi zong kithusim loin Asia gam le leitung bup khempeuh-a kibia nusian mahmah kiminsiasaka a pasian thupina teng a kisuh ding lauhuai hi," a ci hi.

²⁸Amaute in hih thu a zak uh ciangin lungso uh a, "Ephesus-te Artemis alian hi!" ci-in a kiko uh hi.

²⁹Khuapi sung bup a so pah henhan hi. Mipite in Macedonia pana Paul khualzinpihte, Gaius le Aristarchus man uh a, limlahna inn sungah khekhatkhai bangin a lut henhan uh hi.

³⁰Mihonpite mai-ah Paul kilaak nuama, ahi hangin a nungzuite in a phal kei uh hi.

³¹Paul lawmte, tua gam uliante pawlkhat nangawn in tua limlahna inn sungah a va kilai-phum loh nadingin thumin thu a khak uh hi.

³²Tua-a kikhawmte pumbuai gawp uh a, pawlkhat in thu khat genin, adang pawlkhat in thu dang khat mah gen uh a, a kiko uh hi. Mi a tamzaw thamte, amau bang hanga tua lai-a om uh hiam, cih nangawn a kithei kei uh hi.

³³Jew-te in amai lamah Alexander sawn uh a, mihonpite pawlkhat amah lamlakin a kiko uh hi. Amah in mipite mai-ah a kiphelhna thu a gen theih nadingin a daih nading uh a khut a van hi.

³⁴Ahi hangin amah Jew mi hi, cih a theihcian uh ciangin amaute khempeuh kithukhat in, "Ephesus-te Artemis a lian hi!" ci-in nai nih sung bang a kiko uh hi.

³⁵Khuapi lai-atpa in mihonpite daisak a: "Ephesus mite aw, Ephesus khuapi in a lian Artemis biakinnpi le van pana hong kia tuanu lim a kem ahilam leitung bupin a theihsa hi lo ahi hiam?

³⁶Tua ahi manin hih thute nial theih nading a om lo ahi khit nungsang daitakin om a, na gamhtat loh ding uh ahi hi.

³⁷Hih mite in eite nusian gendai loin i biakinnpi lah luh lo napi hih lai-ah nong tun zo uh hi.

³⁸Demetrius le ama khutsiampihte in mi khatpeuh tungah lungkimlohna nei uh ahileh thukhenna innte honsa in om a, gam-ukte lah om uh hi. Amaute in ngawhna thu a bawl thei uh hi.

³⁹Tua lo adang thu puaktoh nop lai na neih uh leh a ngeina om bangin kikhopna ah a kisiansak kul ding hi.

⁴⁰Tuni-a thupiangte hangin a ngongtat a hong kingawh khak ding lauhuai hi. Hih thu tungtang ah siksan ding thukho i neih loh nungsang hih banga buaina bawl kei ni," a ci hi.

⁴¹Hih teng a gen khit ciangin tua-a kikhawm teng a kikhensak hi.