Read Zokam Nasepte 2 Bible Online

Nasepte 2 - Zokam bible

Nasepte 2

¹Pentecost ni a tun ciangin amaute a vekpi un mun khatah a om khawm uh hi.

²Van pan thakhatin huihpi nung ging bangin ging a, amaute tutna inn sung khempeuh a dim hi.

³Amaute in meileiite hileh a kilawm amah le amah kikhenin amaute tung tekah a khawl ciat a mu uh hi.

⁴Amaute khempeuh Khasiangtho tawh kidim uh a, Kha hihsak theih bang, kam dangte c[6] in a pau uh hi.

⁵Tua lai-in van nuai-a minam khempeuh panin a pai Pasian kihta Jew-te, Jerusalem ah a tam lai uh hi.

⁶Amaute in hih awging a zak uh ciangin mi hon khat lungmangin va kikhawm uh hi. Ahang in, amaute thugente amau pau ciatin a za uh hi.

⁷Amaute in lamdang sa lua mahmah uh a, "Hih mite a vekpi-un Galilee-te pau-a pau mi hi lo uh ahi hiam?

⁸Tua hi napi eite in amaute pau, ei pianpih pau tekin i zak theih bangci dan hiam?

⁹Parthia-te Media-te Elam-te;Mesopotamia le, Judea le Cappadocia, Pontus le Asia,

¹⁰Phrygia, le Pamphylia, Egypt le Cyrene kianga Libya gam khente a tengte; Rome pana a hawhte,

¹¹(Jew-te le Jew biakna a zuite tawh); Cret-te le Arab-te - eite khempeuh in, amaute in Pasian nalamdang bawlte a gen uh ei pau ciatin lah i za mawk a!" ci-in a kidong uh hi.

¹²Lamdang sa mahmah in lungzing uh a, "Bang cihna hi peuhmah ding hiam?" a kici uh hi.

¹³Ahi zongin mi pawlkhatte in amaute nuihsan in, "Lenggahzu tam dawn lua ta uh hi," d[7] a ci uh hi.

¹⁴Tua ciangin Sawm-le-khatte tawh Peter ding to-a a aw sangsak in mihonte kiangah, "Ka mipih Jew-te le Jerusalem a om note khempeuh aw, hih thu note tungah kong telgen ding hi. Ka thugen limtakin na ngai un.

¹⁵No upmawh bangin hih mite zukham hi lo uh hi. Tu-in zingsang nai kua sat pan bek hi!

¹⁶Hi lo hi, hih in kamsangpa Joel in a na gen:

¹⁷"Pasian in, ‘Ni nunungte ah mi khempeuh tungah ka Kha ka sungkhia ding hi. Na tanute na tapate un kamsang ding uh a, na tangvalte un mangmu in, na putekte un mang a man ding uh hi.

¹⁸Tua ni ciangin, ka nasem numei le pasalte tung nangawn ah ka Kha ka sungkhia ding a, amaute in thu a genkhol ding uh hi.

¹⁹Tunglam vanah a lamdangte le nuailam leitungah limte le sisan le mei le meikhu sahpite ka lak ding hi.

²⁰A lian a minthang Topa ni hong tun ma-in ni khuamial suak dinga khapi sisan a suak ding hi.

²¹Tua ciangin Topa min a lote peuhmah kihonkhia ding hi,’ e[8] a cihsa ahi hi.

²²"Israel mite aw, hih thu ngai un: note in na theih mah bangun Nazareth mi Jesu pen Pasian in note lakah ama tungtawna a bawl nalamdangte, a lamdangte le limte tawh Pasian in a kipsak mi ahi hi.

²³Pasian in a tupsa le a theihkholhsa bangin note khutah hong kipia hi. Tua ciangin note in mitatsiate f[9] huhna tawh singlamteh tungah na kilhlum uh hi.

²⁴Ahi hangin sihna in amah lenden zo lo ahi manin, Pasian in misi pan thokiksak a, sih gentheihna pan a suaktasak hi.

²⁵David in ama thu a genna-ah: " ‘Ka mai-ah Topa ka mu tawntung hi. Ka taklamah om ahi manin, kei ka ling kei ding hi.

²⁶Tua ahi manin ka lung nuam a; ka leii a kipak hi; ka pumpi zong lametna-in a nungta ding hi.

²⁷Ahang in, hankhuk ah kei nong nusia kei dinga, na Mi Siangthopa zong na muatsak kei ding hi.

²⁸Nuntakna lampi kei nong theisak zo hi; na omna munah lungnopna tawh kei nong dim ding hi,’ g[10] a na ci hi.

²⁹Sanggamte aw, pupi David si zo a, kivui zo-in, tuni mahmah in hih lai-ah a han om hi, cih kimuangtakin kong gen thei hi.

³⁰Ahi hangin amah kamsang khat hi-a, Pasian in kiciama, ama suante sung pan khat ama kumpi tokhoma, a tutsak ding a kamciamsa a thei hi.

³¹Hong tung ding mukhol ahi manin hankhuk sungah kinusia lo-a, a pumpi zong muat lo ding, ci-in Christ a[11] thawhkikna thu a na genkhol hi.

³²Pasian in hih Jesu thosakin nung tasaka, hih thu a taktak a hina kote khempeuh, teci ka hi uh hi.

³³Amah Pasian taklam ah kitawisang a, Pa kiang pana kamciamsa Khasiangtho ngahin ama hong buakkhiat tu-a na muh na zakte uh ahi hi.

³⁴Ahang in, David vantung ah kah lo napi: "‘Topa in ka Topa kiangah,

³⁵"Na galte khempeuh na khepekte ngak nading ka suahsak matengin ka taklam ah na tu in,"’ b[12] ci hi.

³⁶"Tua ahi manin Israel mi khempeuh in tel ta un: Na kilhluppa uh hih Jesu, Pasian in Topa le Christ suaksak zo hi," a ci hi.

³⁷Mite in hih thu a zak uh ciangin a lung uh vut a, Peter le sawltakpi dangte kiangah, ‘Sanggamte aw, bang hih ding ka hi uh hiam?" a ci uh hi.

³⁸Peter in, "Na mawhnate uh a kimai sak theih nadingin note, na vekpi un kisik unla Jesu Christ minin na kibaptise un. Tua ciangin Khasiangtho letsong na ngah ding uh hi.

³⁹Tua kamciam pen note le na tate uh ading le gamlapi-a omte khempeuh ading - i Topa Pasian in a sap dingte khempeuh ading ahi hi," ci-in a dawng hi.

⁴⁰Kammal dang tampi tawh amaute vauhilh a, "Hih a kisiasa khang mite panin note kihonkhia un," ci-in amaute tungah a thum hi.

⁴¹Ama thu gen a sangte kibaptise uh a, tua ni-in amau pawl sungah mi tul thum bang a kibehlap hi.

⁴²Sawltakpite thuhilhna le amau tawh kithuahna, anlum balkhapna le thu ngetnate ah, amau le amau a va kipumpiak uh hi.

⁴³Mi khempeuh in lamdang sa mahmah uh a, sawltakpite in alamdang tampi le apiandang limte a bawl uh hi.

⁴⁴Thu-umte khempeuh omkhawm uh a na khempeuh a nei khawm uh hi.

⁴⁵A neihsate uh le a vante uh zuakin mi khatpeuh a kisapna bangbangin a pia uh hi.

⁴⁶Nisimin biakinnpi huangte sungah a kithuah khawm ngitnget uh hi. Amaute innah anlum balkhamin lungdamna le itna lungsimtak tawh nekhawm uh a,

⁴⁷Pasian phatin, mi khempeuh in angvanna nuam a sa uh hi. Topa in nisimin amau pawl sungah a kihonkhia mi a kibehlapsak hi.