Read Zokam Nasepte 20 Bible Online

Nasepte 20 - Zokam bible

Nasepte 20

¹Tua buaina a ven ciangin Paul in nungzuite samsaka, amaute a hanthawn khit ciangin mangpha khaka, Macedonia a pai dingin a dingkhia hi.

²Amah tua huam tengah zin kawikawi-a, mite kiangah hanthawnna thu tampi genin a tawpna-ah Greece a tung hi.

³Tua lai-ah kha thum a taam hi. Syria gam zuana tembaw tawh pai a sawm hi napi Jew-te in thah a sawmsim manin Macedonia tawna ciah kik dingin a khensat hi.

⁴Berea panin Pyrrhus tapa Sopater, Thessalonica panin Aristarchus, Secundus, Derbe panin Gaius le Timothy zong, Asia gam panin Tychicus le Trophimus-te in a zui uh hi.

⁵Hih mite na mapai uh a, Troas ah kote hong ngak uh hi.

⁶Ahi hangin Silngo-sawhloh Anlum Pawi khit ciangin Philippi panin tembaw in ka tuang uh a, ni nga khit ciangin Troas ah ka lawmte uh pha in tua lai-ah ni sagih ka taam khawm uh hi.

⁷Nipikal ni masa pen ni-in anlum balkham dingin ka kikhawm uh hi. Paul in mite kiangah thu gena, a zing ciangin paisan sawm ahi manin zankim dong thu a gen niloh hi.

⁸Ka kikhopna mun uh inn tungnung dei sungah meivak tampi a om hi.

⁹Paul in thu gengen mai ahi ciangin Eutychus kici tangvalno khat tawhlet ah tu-a, a ihmut suak mahmahin a lusu hi. Amah a kikhim ciangin inn dawl thumna panin lei-ah kiasuka, a sisa in kitawm hi.

¹⁰Paul kumsuka, tua tangvalnopa tungah boksukin a kawi hi. Amah in, "Amah nungta hi, patau kei dih un!" a ci hi.

¹¹Tua ciangin inn tungah kahto kika anlum balkhamin a ne hi. Khuavak dong thu a gen khit ciangin a paisan hi.

¹²Mite in tangvalnopa a nungta in a inn ah ciahpih uh a, amaute nakpi-in a kihehnem hi.

¹³Tembawpi-in Assos lamah ka na ma pai uh a, tua lai-ah tembaw tawh Paul a la ding ka hi uh hi. Amah tua lai-ah khe-a, a na mapai ding ahi manin amah in hih banga a gel ahi hi.

¹⁴Amah in Assos ah kote hong dawntuah a, tembaw ah ka tuansak khit uh ciangin Mitylene ah ka paisuak uh hi.

¹⁵A zing ciangin tua lai panin ka paikhia leuleu uh a, Kios ka tung uh hi. A thai ciangin Samos ka kantan uh a, a zing ciangin Miletus ka tung uh hi.

¹⁶Paul in a hi theih le Pentecost ni lap nuam ahi manin Asia gam sungah ahun zang khin loin, Ephesus khengsuakin a manlangin Jerusalem tun a sawm hi.

¹⁷Miletus panin Paul in, Ephesus a pawlpi upate a samsak hi.

¹⁸Hong tun uh ciangin amaute kiangah: "Asia gam kong tun a ni masa pen ni-a kipan no lakah ka om sung khempeuh ka nuntakzia na thei khin zo uh hi.

¹⁹Jew-te in kei thah dingin hong sawmsimna un nakpi-in hong zia-et ta leh, nakpitakin kiniamkhiatin khitui tawh Topa na ka sem hi.

²⁰Note adingin a phatuam ding peuhmah kong hilh ding ka lungsit kei a, tangpi theih ahi zongin inn simah ahi zongin note kong hilh hi, cih na thei uh hi.

²¹Jew-te le Greek-te tungah, i Topa Jesu upna nei-in kisik a, Pasian lamah a kihei pelmawh nadingun ka tangko zo hi.

²²"Tu-in Kha hong sawl teiteina mangin, ka tungah bang thu piang ding cih thei loin Jerusalem ah ka pai ding hi.

²³Khasiangtho in kei tungah, khuapi simah thong kiat ding le haksatna in hong maituah hi, cih vauhilhna bek ka thei hi.

²⁴Ahi zongin tai kidemna man thei in Topa Jesu in ka sep dinga hong piaksa Pasian hehpihna lungdamna-thu teci ka pan ding mansiang khin peuh leng kei adingin ka nuntakna bangmah man loin ka ngaihsun hi.

²⁵"Tu-in kumpi-gam thu gena a laka ka pai kawikawina mite khat beek in nong mu kik nawn kei ding uh cih ka thei hi.

²⁶Tua ahi manin mi khempeuh sisan tungah ka mawhpeng hi, cih tuni-in note tungah kong pulak hi.

²⁷Ahang in, Pasian deihna buppi no tungah kong tangko ding sit ka nei kei hi.

²⁸Khasiangtho in nomau mahmah a cing a[70] mite hong suahsak, tua tuuhonte limtakin na kem un. Ama sisan tawh a leisa Pasian b[71] pawlpi a cingte na hi un.

²⁹Ken kong nusiat khit ciangin note lakah ngia hangsante hong lutin tuuhonte a hawi loh ding uh ka thei hi.

³⁰Note lak nangawn ah nungzuite amau lamah a kaihmang zawh nadingun thumaan a lehkaih mi hong khangkhia ding hi.

³¹Tua ahi ciangin kigalging un! Kum thum sung khawl lo-a, sun tawh zan tawh khitui luanga note a milip tunga kong vauhilhna ciamteh un.

³²"Tu-in Pasian tung le note hong picingsak thei-a, a sianthosak sate khempeuh lakah gouluahna a pia ama hehpihna thu tungah note kong ap hi.

³³Mi khatpeuh neihsa, ngun ahi a, kham ahi a, nikten puansilh ahi zongin ka deih gawh kei hi.

³⁴Hih ka khutte in kei kitang sapna le ka lawmte kitangsapna pia, cih note mahmah in na thei zo uh hi.

³⁵Ka sepnasa peuhmah ah Topa Jesu kammal mahmah in, ‘Ngahna sangin piakna ah thupha omzaw hi,’ a cih phawk kawmin, hih bang nasep hahkatna tawh a thanem mi i huh ding kul hi, cih kong lak hi," a ci hi.

³⁶Hih teng a cih khit ciangin amaute khempeuh tawh khukdinin thu a ngen uh hi.

³⁷Amaute khempeuh in amah kawi-in, namin, a kap uh hi.

³⁸Ama mai mu kik ngei nawn lo ding a cih in amaute a dahsak pen hi. Tua ciangin amaute in amah tembaw tung dong a kha uh hi.