Read Zokam Nasepte 21 Bible Online

Nasepte 21 - Zokam bible

Nasepte 21

¹Amaute tawh ka kikhen khit uh ciangin tembaw in ka tuang uh a tangtakin Cos ka zuan pah vingveng uh hi. A zing ciangin Rhodes pai-in tua panin Patara ah ka pai uh hi.

²Phoenicia ah a galkah ding tembaw khat ka mu uh a, tua ah tuangin ka pai uh hi.

³Cyprus ka galmuh khit uh ciangin a khang lam nawkin Syria dong ka pai uh hi. Tyre ah ka kinga uh hi. Tua lai-ah ka tembaw un a vanpuakte a suahkhia ding ahi hi.

⁴Tua lai-ah nungzuite ka muh uh ciangin ni sagih sung amau kiangah ka taam uh hi. Amaute in Jerusalem dong, Paul a pai loh nadingin Kha tungtawnin a kho uh hi.

⁵Ahi hangin ka hun uh a bei ciangin ka ding khia uh a, ka zinna ban uh ka zom uh hi. Nungzuite khempeuh le a zi a tate un khuapi nawl ciang hong kha uh a, tua lai mun, tuipiau-ah khukdinin thu ka ngen uh hi.

⁶Khat le khat mangpha ka kikhak khit uh ciangin tembaw tungah ka kah uh a, amau bel inn ah a ciah kik ta uh hi.

⁷Tyre panin ka zinna ban uh ka zom uh a, Ptolemais ah ka kinga uh hi. Tua lai-a sanggamte ka hopih uh a, amau kiangah ni khat ka kulh uh hi.

⁸A zing ciang pai leuleu in Caesarea ka tung uh a, tua Sagihte lakah khat, lungdamna thugen Philip inn ah ka tung uh hi.

⁹Amah in pasal a nei nai lo kam a sang tanu li a nei hi.

¹⁰Tua lai-ah ni tam khop ka tam khit uh ciangin Judea panin Agabus kici kamsang khat hong paisuk hi.

¹¹Kote kiangah hong pai-a, Paul kawnggak la-in ama khut le a khete kihenin, "Khasiangtho in, ‘Jerusalem ah hih kawng gak neipa, Jew-te in hih bangin hen ding uh a, Gentile-te khut sungah pia ding uh hi,’ ci hi," a ci hi.

¹²Kote in hih thu ka zak uh ciangin kote le tua lai-a om mipite in Jerusalem ah Paul a pai loh nadingin ka kho uh hi.

¹³Tua ciangin Paul in, "Bang hangin note kapa, ka lungtang tamkhamsak na hi uh hiam? Hong kihen bek tham loin Topa Jesu min hangin Jerusalem a sih ding nangawn a kigingkholsa ka hi hi," hong ci hi.

¹⁴Ka khohna uh hong man nop loh ciangin ka kho nawn kei uh a, "Pasian deih bangin piang ta hen," ka ci uh hi.

¹⁵Hih teng khit ciangin ka kithawi uh a, Jerusalem ah ka paito uh hi.

¹⁶Caesarea panin nungzuite pawlkhat in hong zui uh a, ka tun nading uh Manson inn ah hong kha uh hi. Amah Cyprus mi hi-a, nungzui masate lakah khat ahi hi.

¹⁷Jerusalem ah ka tun uh ciangin sanggamte in lungtaitakin hong tungsak uh hi.

¹⁸A zing ciangin Paul le ko adang teng James tawh kimu dingin ka pai uh a, tua lai-ah upate khempeuh a kim uh hi.

¹⁹Paul in amaute hopih in, Gentile-te lakah ama nasepna tungtawna Pasian nasepna cingtakin a zasak hi.

²⁰Amaute in hih thu a zak uh ciangin Pasian a phat uh hi. Tua ciangin Paul kiangah, "Sanggam aw, Jew-te tul bangzah in um khin zo cih le amaute khempeuh thukham zuih hahkatte hi cih na mu hi.

²¹Gentile-te laka teng Jew-te khempeuh in a tate uh vunat loh ding ahi zongin ngeina zui loin Moses pan kiheikhia dingin nang na hilh, ci-in amaute a kizasak uh hi.

²²Bang cih ding i hiam? Amaute in hihtak nong tun za ngel ding uh hi.

²³Tua ahi ciangin kong gen bangun hih in. Kote kiangah a kiciam khinsa mi li a om hi.

²⁴Hih mite va tonpih in amaute a ngeina-a a kisiansuahna ah va kihel inla, a sam uh a metmai theih nadingun a sam met man ding uh sik in. Tua ciangin mi khempeuh in nang thu a kigennate a maanlohna thei ding uh a, nang mahmah thukham thu manga a nungta na hina thei ding uh hi.

²⁵Thu um Gentile-te ahi uh leh ka thukhensatna uh lai amaute ka khak zo uh a, amaute in milimte thoihna ante, sisan, ngawnghek ganhing sate le numei-pasal paktatna a tan dingun ka gelh zo uh hi," a ci uh hi.

²⁶A zing ciangin Paul in tua mite tonpih a, amaute tawh amah mah a kisiansuah hi. Tua ciangin kisiansuahna nite bei ni ding le amau ciat in biakna a bawl ni ding uh theisak dingin biakinnpi ah a pai hi.

²⁷Tua ni sagih a cin dektak ciangin Asia gam pana Jew-te pawlkhat in biakinnpi ah Paul a mu uh hi. Amaute in mihonpite khempeuh tawsawnin amah man uh a,

²⁸"Israel mite aw, ko hong huh un! I mite, i thukham le hih mun lang panga, mun khempeuh-a mi khempeuh tungah thu a hilhpa hih pa ahi hi. Tua tham loin biakinnpi huang sungah Greek-te hong paipih in hih munsiangtho a buahsak hi," ci-in a kiko uh hi.

²⁹(Tua hun ma-in khuapi sungah Ephesus mi Trophimus le Paul a kithuah mu uh a, Paul in amah biakinnpi huang sungah lutpih khin zo ding hi, ci-a theihsa banga a koih uh ahi hi.)

³⁰Khuapi sung khempeuh linglawnga, mun khempeuh panin mi hong tai-in a kisutuah uh hi. Paul manin biakinnpi panin kaigawp uh a, kongpite kikhak pah lian hi.

³¹Amah thah a sawm laitakun Jerusalem khuapi bup hehin a so hi, cih Rome galkap mangpa kiangah thu va tung hi.

³²Amah in bute hon khat le galkapte tonpih a mihonpite lamah a taisuk uh hi. Tua mi ngonghtatte in galkap mangpa le a galkapte a muh uh ciangin Paul a sat nawn kei uh hi.

³³Galkap mangpa paikhia a, amah manin sik khainiang nih tawh hen dingin thu a pia hi. Tua ciangin amah kua hi-a, bang hih hiam, cih a dong hi.

³⁴Mihonpi lakah pawlkhat in thu khat gena, adang pawlkhat in a thu dang khat mah genin a kiko uh hi. Galkap mangpa in mite buaina hangin thutak a muh theih loh ciangin galkap inn sungah Paul paipih dingin thu a pia hi.

³⁵Kahlei ah Paul a tun ciangin tua migilote uang lua uh ahi manin galkapte in Paul a puak uh kul hi.

³⁶A nungzui mihonpite in, "Amah thatmang un," ci-in a kiko uh hi.

³⁷Galkapte in galkap inn sungah Paul a lutpih dektak laitakun amah in galkap mangpa kiangah, "Kam khat kong gen thei ding hiam?" ci-in a dong hi. Amah in, "Greek pau na thei hiam?

³⁸A beisa hunlai-a mi linthawn pawl, tulli makaih a kumpi langpang dinga kipan Egypt mipa hi lo na hia?" ci-in a dawng hi.

³⁹Paul in, "Kei Jew mi ka hi hi. Cilicia gam Tarsus pan ka hi-a khuapi mawk mawk a mi ka hi kei hi. Nong hehpihna in mipite tungah thu hong gensak in," ci-in a dawng hi.

⁴⁰Galkap mangpa tung pan thu a ngah khit ciangin kahlei tungah Paul dingto a, mihonte lamah a khut a van hi. Amaute khempeuh a daih dide khit uh ciangin amaute kiangah Aram a[72] pau-in: