Read Zokam Nasepte 22 Bible Online

Nasepte 22 - Zokam bible

Nasepte 22

¹"Sanggamte le pate aw, tu-in kei kihutna thu na ngai un," a ci hi.

²Amaute in amah Aram pau-a, a pau a zak uh ciangin a daipah khipkhep uh hi. Tua ciangin Paul in:

³"Kei Jew mi ka hi hi. Cilicia gam Tarsus ah ka suak a, ahi hangin hih khuapi-a khangkhia ka hi hi. Gamaliel khut nuai-ah i pate thukhamte khempeuh sina, a siamsa ka hi a, tuni-a note khat peuhpeuh zah a Pasian ading a hahkat ka hi hi.

⁴Hih Lampi thu a zuite a sih dongun ka bawlsia a, numei hi ta leh pasal hi ta leh manin thong sungah ka khum hi.

⁵Hih bang ka hihna tulpipa le Vaihawmte in zong teci hong pang thei ding uh hi. Keimah in Damascus a, a sanggamte uh a laikhak nangawn uh amaute tung pan ka ngah a, hih mite Jerusalem thonga khum ding le gawt dinga puak dingin ka va kuan hi.

⁶Damascus kiang ka tun laitak sun pawlin thakhatin van pan a tangpha mahmah khuavak khat in ka kimkot hong tanzal hi.

⁷Lei-ah ka puk a, aw khat in ka tungah, ‘Saul! Saul! Bang hangin kei hong bawlsia na hi hiam?’ hong cih ka za hi.

⁸"‘Topa kua na hiam?’ ci-in ka dong hi. "Amah in, ‘Na bawlsiat Nazareth mi Jesu ka hi hi,’ ci-in hong dawng hi.

⁹Ka tonpihte in tua khuavak mu uh a, ahi hangin kei tunga hong hopih aw a theitel kei uh hi.

¹⁰" ‘Topa aw, bang hih ding ka hi hiam?’ ci-in ka dong hi. "Topa in, ‘Tho inla Damascus khua sungah pai in, tua lai-ah na sep dinga kisehsate hong kigen ding hi,’ hong ci hi.

¹¹Tua khuavakpi in ka mit tawsak ahi manin ka tonpihte in ka khutin hong kai uh a, Damascus khua sungah hong lutpih uh hi.

¹²"Ananias kici mi khat kei hong veh dingin hong pai hi. Amah thukham tan a ngentel mahmah khat hi-a, tua lai-a teng Jew-te khempeuh in a zahtak mahmah khat ahi hi.

¹³Amah ka kiangah hong dinga, ‘Sanggampa Saul aw, khua mu in!’ hong ci hi. Tua hun lianin amah ka mu thei pah hi.

¹⁴"Tua ciangin amah in: ‘I pate Pasian in, ama deihna thei ding Thumaan Pa mu ding le ama kam pan thute za dingin nang hong teel zo hi.

¹⁵Na muhsa le na zaksate mite khempeuh tungah ama teci na hi ding hi.

¹⁶Tua hi-a tu-in nang bang ngak lai na hi hiam? Tho in; ama min lo inla, kibaptise-in na mawhnate silkhia in,’ hong ci hi.

¹⁷"Jerusalem ah ka ciah kika, biakinnpi ah thu ka nget ciangin mumang bangin ka om a,

¹⁸kei kiangah, ‘Kinawh in!’ Amaute in, kei thu teci na panna hong sang lo ding uh ahi manin, Jerusalem nusia pak in,’ hong ci Topa ka mu hi.

¹⁹"Topa aw, synagogue-te ah a banbanin pai-a, nang hong umte thong sungah khumin ka sat lam hih mite in thei zo uh hi.

²⁰Nang hanga si pa b[73] Stephen sisan a luan lai-in ka thukimpihna lakin amah a thatte puante cingin tua lai-ah ka ding hi,’ ci-in ka dawng hi.

²¹"Tua ciangin Topa in ka kiangah, ‘Pai peuh in; gamlapi a om Gentile-te kiangah kong sawl ding hi,’ hong ci hi," ci-in a gen hi.

²²Hih a gen hun ciang dong mihon pite in Paul thugen a ngai uh hi. Tua ciangin nakpi-in kiko uh a, "Leitungah omsak kei un! Hing-khawi huai kei!" a ci uh hi.

²³Amaute in a kiko kawmun a puan tualpite uh suahkhia-in van lamah leivui a theh gawp uh ciangin

²⁴galkap mangpa in galkap inn sungah Paul a tumpihsak hi. Bang hang mihonpite in amah kikosan ahi hiam, cih a theihkhiat nadingin amah sata, thu dot dingin a gen hi.

²⁵Amaute in amah sat dinga a dawhsak laitakun, Paul in tua lai-a ding zakhat ukpa kiangah, "A mawhna kimu nai lopi in, Rome mi khat na sat ding thukham tawh kituak na sak mah hiam?" a ci hi.

²⁶Zakhat-ukpa in hih thu a zak ciangin galkap mangpa kiangah pai-in a va zasak hi. Amah in, "Hih mipa Rome mi ahi hi, bang cih ding na hi hiam?" ci-in a dong hi.

²⁷Paul kiangah galkap mangpa pai-in, "Nang Rome mi na hi hiam, hong gen in?" ci-in a dong hi. Amah in, "Ka hi hi," ci-in a dawng hi.

²⁸Tua ciangin galkap mangpa in, "Rome gammi ka suah nadingin a man tampi ka pia hi," a ci hi. Paul in, "Ahi hangin kei ka suah a kipan gammi ka hi hi," a ci hi.

²⁹Amah thu dong dinga kisate a tawp kik pah lian uh hi. Galkap mangpa mahmah zong Rome gammi khat ahi Paul, sik khainiang a khih ahilam a tel ciangin a patau hi.

³⁰A zing ciangin galkap mangpa in, bang pen hanga Jew-te in Paul hih banga mawhmat nuam uh ahi hiam, cih cian taka a theih khit nop manin, amah khahkhia a, siampi makaite le Sanhedrin-te khempeuh a kikup dingun thu a pia hi. Tua ciangin Paul paipiha amaute mai-ah a dingsak hi.