Read Zokam Nasepte 23 Bible Online

Nasepte 23 - Zokam bible

Nasepte 23

¹Paul in Sanhedrin-te tangtakin en a, "Ka sanggamte aw, tuni dongin Pasian tungah kisuantaakna om loin ka sep ding teng ka tangtun khin zo hi," a ci hi.

²Hih bang a cih ciangin tulpi Ananias in Paul kianga dingte kiangah a muk a satsak dingun thu a pia hi.

³Tua ciangin Paul in, "Nang, a kanga kizut kawm aw, Pasian in nang hong sat na ve! Thukham tawh kituaka thukhen dingin tua lai-a tu hi napi kei sat dinga thu na piakna tawh thukham na palsat hi!" a ci hi.

⁴Paul kianga dingte in, "Nang, Pasian tulpipa eng cih ngam maw?" a ci uh hi.

⁵Paul in, "Sanggamte aw, ken amah tulpi ahilam ka thei kei hi, ‘Na mite ukpa gensiatna kam pau kei in,’ a[74] ci-in kigelh mah hi," ci-in a dawng hi.

⁶Tua ciangin Paul in amaute pawlkhat Sadducee hi-in, adangte Pharisee ahilam uh thei a, Sanhedrin mai-ah, "Ka sanggamte aw, kei Pharisee khat tapa Pharisee khat mah ka hi hi. Misite thawhkikna ka lamet manin thukhenna a thuak ka hi hi," a cikhia hi.

⁷Hih banga cih ciangin Pharisee-te le Sadducee-te kikalah kiselna pianga tua-a kikhawmte a kipawlkhen uh hi.

⁸(Sadducee-te in thawhkikna om lo, vansawltak ahi a, kha ahi zongin om lo hi, ci uh a, ahi hangin Pharisee-te in, tuate khempeuh om hi, ci uh hi.)

⁹Mihonpi buaina lianpi pianga, thu kham sia ahi Pharisee-te pawlkhat dingin nakpitakin sel uh a, "Hih mipa a tat khialhna bangmah ka mu kei uh hi. Vansawltak khatpeuh, kha khatpeuh in ama tungah thu gen hileh eite in bang lawh ding!" a ci uh hi.

¹⁰Kiselna nasia lua mahmah a, amaute in Paul a balzan khak ding uh, galkap mangpa a lau hi. Amah in galkapte va paisuk a, thatang hat suanga amaute lak pan amah lakhia in galkap inn sungah a paipih dingun thu a pia hi.

¹¹A zing ciang zanin Paul kiangah Topa dinga, "Kilungkhauhsak in! Jerusalem a ka thu teci na pansa bangin Rome ah zong teci na pan teitei kul ding hi," a ci hi.

¹²A zing ciang zingsang in Jew-te in kisimzopna khat bawl uh a, Paul a thah khit matengun an ne tui dawn om lo ding, ci-in a kiciam uh hi.

¹³Hih sawmsimna ah mi sawmli sanga tamzaw kihel uh hi.

¹⁴Siampi makaite le upate kiangah amaute pai uh a, "Paul ka thah khit matengun, bangmah ne lo dingin khauh takin ka kiciam zo uh hi.

¹⁵Tua ahi ciangin tu-in nang le Sanhedrin in Paul thu a cingzaw a thei nuam kineihin note mai-ah galkap mangpa in amah hong puak nadingin na ngen un. Amah hih lai hong tun ma-in a that dingin kigingsa-in ka om uh hi," a ci uh hi.

¹⁶Ahi hangin Paul sanggamnu tapa in hih sawmsimna a zak ciangin galkap inn sungah pai-in Paul a va hilh hi.

¹⁷Tua ciangin Paul in zakhat-ukpa khat sam a, "Hih khangnopa galkap mangpa kiangah va paipih in, amah in thugen ding a nei hi," a ci hi.

¹⁸Tua ciangin amah in galkap mangpa kiangah a paipih hi. Zakhat ukpa in, "Thong kiapa Paul in kei hong samsak a, hih khangnopa in nang kiangah gen ding nei ahi manin nang kianga puak dingin hong sawl hi," a ci hi.

¹⁹Galkap mangpa in khangnopa a khutah lenin kai a, "Kei kianga nong gen nop bang ahi hiam?" ci-in a dong hi.

²⁰Amah in: "Jew-te in ama thu a cingzaw-a thei nuam kineih in, zing ciangin Sanhedrin mai-ah Paul na puak nading hong nget ding uh a thukim zo uh hi.

²¹Amaute thu mang peuhmah kei in. Bang hang hiam cih leh amaute, mi sawmli sanga tamzaw in amah lamkalah na pangsim ding uh hi. Amaute in amah a thah khit matengun, an ne tui dawn om lo dingin kiciamna bawl zo uh hi. Amaute tu-in a kigingsa-in om uh a, a ngetna uh na phal ding bek ngakin om uh hi," a ci hi.

²²Galkap mangpa in khangnopa ciahsak in, "Hih thu kei kiangah nong theihsak lam kuama kiangah gen kei in," ci-in limtakin a vaikhak hi.

²³Tua khit ciangin amah in zakhat ukte nih sama, "Tu zan nai kua in Caesarea a pai ding, galkap zanih, sakol tuang galkap sawm sagih le teipi tawi galkap b[75] zanih tawh na kithawikhol un.

²⁴Ukpipa Felix kiang bittaka a tun nadingin Paul tuan nading zong vai hawmsak un," ci-in thu a pia hi.

²⁵Amah in a nuai-a bangin laikhak khat a gelh hi:

²⁶Claudius Lysias, A Hoihpipen Ukpipa, Felix tungah: Kong hopih hi.

²⁷Hih mipa Jew-te in man uh a, that dektak uh hi. Ahi hangin amah Rome mi hi, cih thei ka hi manin ka galkapte tawh pai-in amah ka va hukhia uh hi.

²⁸Amaute in bang hanga amah mawhsak uh hiam, cih ka thei nuama, amau Sanhedrin tungah amah ka puak uh hi.

²⁹Amaute ngawhna pen amau thukham tawh kisai hi-a, ahi hangin amah a kingawhna, sih nading ahi zongin thong a khiat nading ahi zongin thukho ka mu kei hi.

³⁰Hih mipa thah ding kisawmsim cih hong kizaksak ciangin thakhatin nang kiangah kong paisak pah hi. Amah a mawhsakte zong, nangma kiangah thulang dingin hong om nading thu ka pia zo hi.

³¹Tua bangin galkapte in amaute thupiakte pua uh a, Paul tonpihin azan azanin Antipatris dong a paipih uh hi.

³²A zing ciangin amah sakol tuang galkapte tonpihsak uh a, amaute galkap innte ah a ciah kik uh hi.

³³Sakol tuang galkapte Caesarea a tun uh ciangin ukpipa tungah laikhak pia-in ama tungah Paul a ap uh hi.

³⁴Ukpipa in laikhak sim a, amah bang gam pan hiam, cih a dong hi. Amah Cilicia pan ahilam a theih ciangin,

³⁵"Na thulangte hih lai hong tun ciangin na thu ka za ding hi," a ci hi. Tua ciangin Herod kumpi inn sungah Paul kem a, cin dingin thu a pia hi.