Read Zokam Nasepte 24 Bible Online

Nasepte 24 - Zokam bible

Nasepte 24

¹Ni nga khit ciangin tulpi Ananias in a upate pawlkhat le Tertullus kici taangding khat tonpihin Caesarea ah paisuk uh a, Paul a mawhsaknate uh ukpipa mai-ah a puak uh hi.

²A sungah Paul a kisap ciangin Tertullus in Felix mai-ah a mawhsakna thu gen a: "Kote, nangma ukna nuai-ah lungmuangin sawtpi ka om uh hi. Na thumuhkholna tawh hih minam ah kipuahphatnate a om hi.

³A hoihpipen Felix aw, mun khempeuh le lam khempeuh ah na hihnate lung damtakin ka sang uh hi.

⁴Ahi hangin nang kong gimsak sawnsawn loh nadingun ka thu uh a tom theithei a kong gen nong ngaihsak ding kong thum hi.

⁵"Kote in buaina a piangsak hih mipa, leitung khempeuh a Jew-te lakah mipi ngonghtatsakin a linglawngsakpa hi, cih ka mu uh hi. Amah Nazareth pawl tuam makaipa hi a,

⁶biakinnpi nangawn buahsak a sawm hi; tua hi-a, amah ka man uh hi. a[76]

⁷Ahi hangin galkap mangpa Lysias hong pai-a, thatang hat thu-in kote khut sung pan amah dokkhia a, ama thulangte na mai-ah a pai dingin thu hong pia hi.

⁸Nang mahmah in ama tungah dongin kan lecin amah ka mawhmatnate uh thutak ahina na theikhia thei ding hi," a ci hi.

⁹Jew-te in hih mawhmatna thumaan hi, ci-in a panpih uh hi.

¹⁰Ukpipa in Paul a gen dingin a khut van ciangin amah in, "Hih minamte tungah kum tamkhop thukhenpa na hilam ka thei hi; tua ahi ciangin ka kihutna thu lungkim takin kong gen hi.

¹¹Jerusalem ah Pasian bia dinga ka paitoh, ni sawm-le-nih sawt nai lo, cih baihtakin na khentel thei ding hi.

¹²Biakinnpi-ah mi khatpeuh tawh ka kiselna ahi zongin, synagogue-te sungah ahi zongin khuapi sung mun khat beekah ahi zongin mihonpite ka linglawngsakna ka thulangte in a mu kei ding uh hi.

¹³Tua hi-a amaute in kei hong ngawhnate uh na mai-ah hong tellah thei kei ding uh hi.

¹⁴Bangbang ahi zongin amaute in biakna pawltuam khat a cih uh Lampi nungzui ka hi bangin ka pate Pasian ka bia hi, cih kong pulak hi. Thukham tawh a kituak le Kamsangte lai sunga kigelhsa peuhmah ka um hi.

¹⁵Hih mite bangin mi thumaante le mi tatsiate thawhkikna om tuak ding, ci-in Pasian sungah lametna ka nei hi.

¹⁶Tua ahi ciangin Pasian le mite mai-ah kisuantakna a om lo dingin gamtat ka sawm tawntung hi.

¹⁷"Kum tampitak ka om loh khit ciangin mizawngte ading letsong ka mipihte puak ding le biaknate pia dingin Jerusalem ah kong pai hi.

¹⁸Biakinnpi huang sunga hihte hih a ka om amaute in hong muh lai-un, biakna ngeina tawh kisai-in ka siang hi. Kei tawh mihon kuamah om lo a, buaina khat beek ah zong ka kihel kei hi.

¹⁹Ahi hangin Asia gam Jew-te pawlkhat a om uh hi. Tuate in kei langah mawhsak nading hong nei uh ahileh hih lai na mai-ah hong dingin hong mawhsak ding uh kilawm hi.

²⁰Ahikeh Sanhedrin mai-a ka din lai-in, kei tungah bang mawhsakna a mu uh hiam? Hih lai-a omte in gen uh hen.

²¹Amaute mai-a ka din lai-a: ‘Misite thawhkikna thu tawh kisai-in tuni-in note mai-ah thusitna ka thuak hi,’ ka cih hoh ahi kei buang leh," ci-in a gen hi.

²²Tua ciangin Lampi thu a thei mah mah Felix in thusit hun a sotto hi. Amah in, "Galkap mangpa Lysias hong pai ciangin na thu kong khensak ding hi," a ci hi.

²³Amah in zakhat-ukpa tungah, "Paul limtakin cingsak inla, ahi zongin bang tan hiam khat kolsak in, a kisapnate a lawmte piasak in, ci-in thu a pia hi.

²⁴Ni tampi khit ciangin Jew numei ahi a zi Drusilla tawh Felix va pai uh hi. Amah in Paul samsak a, Christ Jesu upna thu a gen a ngai uh hi.

²⁵Paul in, thumaanna, ei le ei pumpi ki-ukna le hong tung ding thukhenna thute a gen ciangin Felix lau a, "Pha zo! Ciah ta in. Hun hoih ka sak ciangin kong sam kik ding hi," a ci hi.

²⁶Paul in amah golhguk a piak ding lamen kawmin, amah samsak pahpah a, amah tawh a kiho uh hi.

²⁷Kum nih a bei ciangin Porcius Festus in Felix za laih a, ahi hangin Felix in, Jew-te angvan nuam ahi manin thong kiasa in Paul a nusia hi.