Read Zokam Nasepte 25 Bible Online

Nasepte 25 - Zokam bible

Nasepte 25

¹Tua gam a tun zawh ni thum khit ciangin Caesarea panin Jerusalem ah Festus pai to a,

²tua munah siampi makaite le Jew makaite ama mai-ah dingin Paul a mawhmatnate uh a gen uh hi.

³Amaute in Festus kiangah amau a angvanna-in, a manlang theithei a Jerusalem ah Paul a puak nading a ngen uh hi. Ahang in, amaute in lamkal ah buksimin Paul thah nading a kigingkhol khin zo uh hi.

⁴Festus in, "Caesarea ah Paul a kikhumsa hi a, kei mahmah zong tua lai-ah ka paipah ding hi.

⁵Na makaite uh pawlkhat kei hong zuisak unla, tua mipa in hihkhialh nei ahileh tua lai-ah a mawhmatna uh gen uh hen," ci-in a dawng hi.

⁶Amaute tawh ni giat hiam, ni sawm hiam a omkhawm khit ciangin Caesarea ah paisuka, a zing ciangin thukhenna zum ah kahin a mai-ah Paul a puak nadingun thu a pia hi.

⁷Paul a kilak ciangin Jerusalem pana paisuk Jew-te a kimkotah ding uh a, kiteltaka a lah theih loh uh mawhmatna nasia mahmah tampi tawh a mawhsak uh hi.

⁸Tua ciangin Paul in a kihutna thu gen a: "Jew-te thukham tungah ahi zongin, biakinnpi tungah ahi zongin Caesar tungah ahi zongin khialhna bangmah ka bawl kei hi," a ci hi.

⁹Festus in Jew-te angvan-nopna khat nei a, Paul kiangah, "Hih mawh matna mah hong kisit dingin Jerusalem a paitoh ding na ut hiam?" ci-in a dong hi.

¹⁰Paul in, "Kei hong kisit nading a kilawm mun Caesar thukhenna mai ah tu-in ka ding hi. Nang mahmah in zong siangtaka na theihsa bangin Jew-te tungah bangmah khialhna ka bawl kei hi.

¹¹Ahi ta zongin sihna thuak nading donga mawhna ka neih leh sih ding ka nial kei hi. Ahi hangin hih Jew-te hong mawhmatna a maan lopi ahileh amaute tungah kei a piak nading thuneihna kuamah in a nei kei hi. Caesar tunga ka thu ka tun hi," ci-in a dawng hi.

¹²Festus in ama vaihawmpihte tawh a kikup khit uh ciangin, "Na thu Caesar tungah na tun zo hi. Caesar tungah na pai ding hi!" ci-in a thukhenna a pulakkhia hi.

¹³Ni tawm vei khit ciangin Kumpi Agrippa le Bernice in, Festus zahtakna pia dingin Caesarea a tung uh hi.

¹⁴Tua lai-ah ni tampi a taam khit uh ciangin Festus in Paul thu, kumpipa a kikuppih hi. Amah in, "Hih lai-ah Felix in thong kiasa-a a nusiat mi khat a om hi.

¹⁵Jerusalem ah ka pai ciangin siampi makaite le Jew-te upate ama langah pangin amah mawhpaih dingin hong ngen uh hi,

¹⁶"Ken amau kiangah, ‘Mi khatpeuh a kimawhmat ciangin amah a mawhmatte mai-ah dinga, a mawhmatna uh pan a kihut nading hun hoih a ngah khit mateng, piakkhiat ding Rome-te ngeina hi lo hi,’ ci-in ka hilh hi.

¹⁷Hih mun kei kiang hong tut uh ciangin a thu uh zia-olsak loin a zing ciangin thukhen zum ah ka kah pah a, tua mipa hong paipih nadingun thu ka pia hi.

¹⁸Amah a mawhmatte thugen dinga a din uh ciangin ka upmawh bangin gitlohna lian khat beek tawh a mawhmat kei uh hi.

¹⁹Tua sangsik in, amau biakna thu le Jesu kici mi sisa khat, Paul in nungta hi, a cih thu tawmkhat kitotpih uh ahi hi.

²⁰Tua thu ka kantel nading ka thei zo kei a, ‘Jerusalem ah paito in hih mawhmatna thu mah tua mun ah hong kisit leh na ut hiam?’ ci-in amah ka dong hi.

²¹Paul in a thu Rome-te kumpipa thukhen dinga a tut ciangin Caeisar tunga ka puak theih mateng thong sunga khum dingin thu ka pia hi," a ci hi.

²²Tua ciangin Agrippa in Festus kiangah, "Hih mipa thugen kei mahmah in ka za nuam hi," a ci hi. Amah in, "Ama thugen zing ciangin na za ding hi," ci-in a dawng hi.

²³A zing ciangin Agrippa le Bernice thupitakin hong pai uh a, kumpipa nasem zaliante le khuapi uliante tawh kikhopna inndei lianpi sungah a lut uh hi. Festus in thu pia a, Paul kilutpih hi.

²⁴Festus in: "Kumpi Agrippa le kote tawh a om khawmte khempeuh aw, hih mipa na mu uh hi! Jew mite khempeuh in, Jerusalem le hih lai Caesarea a kei tungah a thu hong tun uh a, amah hingkhawi lai ding hi peuhmah lo hi, ci-in kiko uh hi.

²⁵Sihna thuak nading zahin ama gamtatna bangmah ka mu kei hi. Ahi hangin amah in Rome kumpipa tungah a thu tun ahi manin amah Rome ah puak dingin ka khensat hi.

²⁶Ahi hangin a Thupi Kumpipa tungah ama thu ka gelh ding thu kician bangmah ka nei kei hi. Tua ahi manin na thudotnate panun gelh ding khatpeuh ka neih nadingin noteng khempeuh le a diakdiak in nang Kumpipa Agrippa mai-ah amah kong paisak hi.

²⁷Ahang in, a kimawh matna om lopi a, thongkia khatpeuh a bana sawn ding, thu kicingtak hi thei lo hi, ci-in ka ngaihsun hi," a ci hi.