Read Zokam Nasepte 26 Bible Online

Nasepte 26 - Zokam bible

Nasepte 26

¹Tua ciangin Agrippa in Paul kiangah, "Na thu nang mahmah gen dingin phalna kong pia hi," a ci hi. Tua ciangin Paul in a khut van a, ama kihutna thu a gen hi:

²"Kumpi Agrippa aw, Jew-te hong mawhmatnate khempeuh, tuni-in nang mai-ah dinga ka kihutna thu ka gen theih hampha ka kisa hi.

³Jew mite ngeinate le a kikalhnate uh theician mahmah na hi manin ka hampha diak hi. Tua ahi manin ka thugente lungduaitakin nong ngaihsak ding kong thum hi.

⁴"Ka tenna gam sung ahi a, Jerusalem ah ahi zongin ka neu tunga kipan ka nuntak zia Jew-te khempeuh in a theih khitsa uh ahi hi.

⁵Amaute in sawt peka kei hong theihsa uh hi-a Pharisee-te bangin nungta in, ka biakna pawltuam-uah a ciikpen pawl ka hilam, a ut nak uh leh teci hong pang thei ding uh hi.

⁶Tua in ka pate uh tunga Pasian in a kam ciamsa ka lametna hangin tuni-a thusit a thuak ka hi hi.

⁷Ko beh sawm-le-nihte in hahkattaka sun le zanin Pasian na sema, a tangtunna mu dinga ka lamet uh hih thuciam ahi hi. Kumpipa aw, hih ka lametna uh hangin Jew-te in kei hong mawhmat uh hi.

⁸Bang hangin note khatpeuh in, Pasian in misite thosak, cih uphuai lo a ngaihsun ding na hi uh hiam?

⁹"Kei mahmah in zong Nazareth mi Jesu min langdo-a, a hi thei zahzah ka sep ding mah hi, ci-in ka kipsan hi.

¹⁰Jerusalem khua sungah zong tua mah ka hih hi. Siampi makaite thuneihna tawh misiangte tampi thong sungah ka khuma, amaute a kithah ciangin amaute langah thukimna ka khut ka lam hi.

¹¹Amaute gawt dingin synagogue khat pan khatah tam veipi ka pai a, thatang hatthu-in amaute Pasian gendaisak ding ka hanciam hi. Amaute ka huat luat manin a bawlsia dingin gamdang khuapite nangawn ah ka pai hi.

¹²"Hih banga ka khualzinna khatah siampi makaite thuneihna le thupiakna tawh Damascus zuatna lampi ah ka pai hi.

¹³Sun pawlin Kumpipa aw, ka paipai laitakin van panin ni sanga tangzaw khuavak khat ka mu a, kei le ka tonpihte kimkot a tanzal hi.

¹⁴Ka vekpi un lei-ah ka puk uh a, aw khat in Aram a[77] pau in kei kiangah, ‘Saul, Saul, bang hangin kei hong bawlsia na hi hiam? Na khe tawh tulzum na suih ding, nang adingin haksa hi,’ hong ci hi.

¹⁵‘Tua ciangin, ‘Topa aw, kua na hi hiam?" ci-in ka dong hi. "Topa in, ‘Nong bawlsiat Jesu ka hi hi;

¹⁶tu-in tho inla, na khe-in ding in. Nang ka nasem ding le kei tawh kisai na muhsa teng le kong lah lai dingte ah teci dinga hong seh dingin na kiangah kong kilak hi.

¹⁷Na mipihte lak le Gentile-te panin kong hukhia ding hi.

¹⁸Keimah hong upna hangun mawhnate maisakna le sian thosaksate lakah mun a ngah theih nadingun, amaute mit honsak ding, khuamial pan khuavak ah a hei ding, Satan vangliatna pan Pasian lam a ngasak dingin nang kong sawl ding hi,’ hong ci hi.

¹⁹"Tua bang ahi manin Kumpi Agrippa aw, van pana mangmuhna thu mang loin ka om kei hi.

²⁰Amaute kisik a Pasian lamah a kihei nading uh le a kisikna uh, a gamtatna uh tawh a lah nadingun a masa in Damascus-ate kiang, tua khit ciangin Jerusalem-ate kiang le Judea gam khempeuh le Gentile-te kiangah zong ka hilh hi.

²¹Jew-te in biakinnpi huang sungah hong mana thah hong sawmna hih hang ahi hi.

²²Ahi hangin tuni mahmah ciang dong Pasian huhna ngahin hih lai-ah ka dinga, milian mineute tungah a kibangin teci ka pang hi. Kamsangte le Moses in hong piang dinga a gen uh,

²³Christ a[78] in thuak dinga misi pana tho masa pen hi in, ama mite kiang le Gentile-te kiangah khuavak thu a tangko ding hi,’ a cih valkan ka gen kei hi," a ci hi.

²⁴Hih thu tak a gen laitakin Festus in Paul kihutna na pauhelha, "Paul aw, a hai na hi hi! Na sinna tam lua in hong haisak hi," ci-in a kiko hi.

²⁵Paul in, "A hoihpipen Festus aw, a hai ka hi kei hi. Ka gente maan a, thu-a santak ahi hi.

²⁶Kumpipa in hihte teltaka a theihsa hi-a, ama tungah ka ut bangbangin ka gen thei hi. Kong kawmlak peuha kihih hi lo ahi manin a theih loh om lo dingin ka kipsan hi.

²⁷Kumpi Agrippa aw, kamsangte na um hiam? Na up lam ka thei hi," a ci hi.

²⁸Tua ciangin Agrippa in Paul kiang ah, "Hih hun tomno sungin Christian suak dingin hong zol zo a ki-um na hi haim?" a ci hi.

²⁹Paul in, "Hun tom taleh sau ta leh, nang bek hi lo tuni-a ka thugen a ngaite khempeuh hih sik khainiangte bulhna lo buangah kei a bat theih nading uh Pasian tungah thu ka ngen hi," a ci hi.

³⁰Kumpipa dinga, ukpipa le Bernice le amau tawh a tute zong a ding uh hi.

³¹Khat le khat kiho kawmin inndei nusia uh a, "Hih mipa in sih nading le thong kiat nading zahin bangmah a hih kei hi," a kici uh hi.

³²Agrippa in Festus kiangah, "Hih mipa in Caesar tungah a thu tun lo hileh kikhah thei mah hi ven," a ci hi.