Read Zokam Nasepte 27 Bible Online

Nasepte 27 - Zokam bible

Nasepte 27

¹Italy gam zuana tembaw tawh ka pai ding uh a kikhensat khit ciang in Paul le thongkia dangte Kumpi Galkap a sem Julius kici zakhat-ukpa tungah ki-ap hi.

²Adramyttium pana Asia gam tuipi dunga khuate a pai ding tembawpi ah tuangin tuipi tungah ka om uh hi. Thessalonica pana hong pai Macedonia mi khat Aristarchus, ko tawh hong tuang khawm hi.

³A zing ciangin Sidon ah ka kinga uh a, Paul kisapnate a lawmte in a piak theih nadingun, Julius in Paul hehpih a, a lawmte kianga a pai ding a phal hi.

⁴Tua lai panin tuipi tungah ka om kik leuleu uh hi. Huih hong lehnun ahi manin Cyprus kiliahsakin ka pai uh hi.

⁵Cilicia le Pamphylia gam tuipi gei gala tuipi tungah ka pai khit uh ciangin Lycia gama Myra ah ka kinga uh hi.

⁶Tua lai-ah zakhat ukpa in Italy a pai ding Alexandria tembaw khat mu a, tua tungah kote hong tuangsak hi.

⁷Ni tampi sung damdamin mai ka nawt uh a, haksapi in Cnidus ka tung uh hi. Huih in ka pai nopna uh tangtakin hong paisak thei lo a, Crete kiliahsakin Salmone leidawk tawh kigalsai-ah ka pai uh hi.

⁸Tuipi gei zui-in haksapi-in ka pai uh a, Lasea khuapi kiang Van Siang kici mun ka tung uh hi.

⁹An tan b[79] khit hun ahi tawh, hun tampi lah beita a, tembaw-a pai lauhuai mahmah ta hi. Tua ahi ciangin Paul in amaute vauhilh khol a,

¹⁰"Guaite aw, i khualzinna siathuai ta ding hi. Tuahsia lehang tembaw le a vanpuakte i sup banah, i nuntakna zong kisia ding cih ka thei hi,’ a ci hi.

¹¹Ahi hangin zakhat ukpa in Paul thugen a ngaih tangin tembaw hawlpa le tembaw neipa thu a ngaizaw hi.

¹²Tua tembaw khawlna phalbi sunga om nadingin kituak lo ahi manin tua lai panin paikhia a, Phoenix tungin tua lai-ah phalbi sung om ding lamenin a tamzaw thukimna tawh ka paisuak uh hi. Tua pen khang-nitumna le sak-nitumna a maingat tuak Crete-a tembaw khawlna ahi hi.

¹³Khang huihdam hong nun ciangin amaute in a deih uh a ngah in a kingaihsun uh hi. Tua ciangin sikkip khai-in Crete gei zui-in ka pai uh hi.

¹⁴A sawt lua nai loin tua tuikulh lamah "Sak-nisuah" kici huihpi hat mahmah khat hong nung hi.

¹⁵Huihpi in tembaw zialnelh a, mai a nawt thei kei hi. Tua ahi ciangin huih zui-in huih nunna lamlamah ka pai uh hi.

¹⁶Cauda kici tuikulh neu khat kidalsakin kihutna gunkuang neute ka hu zo kei dektak uh hi.

¹⁷A nasemte in tuate tembaw tungah a kaihtoh uh ciangin tembaw nuai dongah khauzen paisakin a henkhawm uh hi. Syrtis sehtakte a phut khak ding uh lau-in, tuipi sikkip khaisa in tembaw a pai bangbangin a hawl uh hi.

¹⁸Huihpi nak thuak den lua ka hi manun, a zing ciangin tembaw puak vante a lawnkhia uh hi.

¹⁹A nithumna ni-in amaute in tembaw khauzialna a paikhia uh hi.

²⁰Ni tampi sung ni le aksite hong dawk het loh ciang le huihpi in hong nuai denden ciangin suahtak zawh nading lametna ka nei nawn kei uh hi.

²¹Tua mite an ne loin hun sawtpi a om khit nungun amaute mai-ah Paul ding a: "Guaite aw, Crete panin paikhia kei ni, ka cihin ka thu hong mang hoh le uh cin nomau mahmah supna le siatna pan a kihu na hi ding uh hi.

²²Ahi hangin tu-in kilungkhauhsak un; bang hang hiam cihleh note khat beek na mangthang kei ding uh hi. Tembaw bek kisia ding hi.

²³A beisa zanin ama aa hi-a, a na ka sep Pasian vansawltak khat ka kiangah dinga,

²⁴‘Paul aw, lau kei in. Caesar mai-ah thu kisitin, na ding pelmawh ding hi. Pasian in a hehpihna-in nang tawh tembaw tunga tuangte khempeuh nuntak nading hong pia hi,’ hong ci hi.

²⁵Tua ahi ciangin guaite aw, na lungsim uh khauhsak lailai un. Ahang in, kei tunga hong gen bangbangin a piang ding hi, ci-in Pasian ka muang hi

²⁶Tua ahikeh zong tuikulhte khat teitei ah leilak i phukha pelmawh ding hi," a ci hi.

²⁷A zan sawm-le-lina zanin Adriatic c[80] Tuipi kantanin huih mutin ka om lailai uh a, zankim pawl ciangin tembaw nasemte in gam khat tung dek ta cih a thei uh hi.

²⁸Tui thukna teh uh a, pi zakhat sawmnih a[81] a thuk lam a thei uh hi. Tomkha vei khit ciangin teh kik uh a, pi sawmkua b[82] a thuk lam a thei uh hi.

²⁹Suangte tawh ka kitah khak ding uh lau uh a, tembaw nunglam pan sikkip li khia in zingsang khuavak nading thu ka ngen uh hi.

³⁰Tembaw nasemte taisim nuamin kihutna gun kuang neute tuipi sungah khia uh a, tembaw mailama sikkipte khai a kineih uh hi.

³¹Tua ciangin Paul in zakhat-ukpa le a galkapte kiangah, "Hih mite tembaw ah om kei leh na suakta kei ding uh hi," a ci hi.

³²Tua ciangin galkapte in kihutna gunkuang henna khauzente attat uh a, a khahkhia mang uh hi.

³³Khuavak ma diakin Paul in amaute khempeuh, an a nek ding uh a kun hi. Amah in, "A beisa ni sawm-le-li sung, bangmah ne loin an ngawlin lauthawngsa in na om den uh hi.

³⁴Tu-in an tawmkha beek ne teitei un. Na sih loh nading uh an kisam hi. Note lakah khat beek in a lutang pan a samzang khat zong mansuah lo ding hi," a ci hi.

³⁵Hih teng a cih khit ciangin anlum honkhat la-a, amaute khempeuh mai-ah Pasian tungah lungdam a ko hi. Tua ciangin balkhama, a ne hi.

³⁶Amaute khempeuh zong lungkhauh kik uh a, an tawm tek a ne uh hi.

³⁷Tembaw tunga tuang mi a vekpi in 276 ka pha uh hi.

³⁸A duh zahzah uh a nek khit uh ciangin tembaw a zang tuam nadingin buhhumte tuipi sungah a lawnkhia uh hi.

³⁹Khua a vak ciangin a gam a theih loh uh hangin tuipi gei sehtak khat mu uh a, ahi theih liai leh tua lai-ah tembaw khawlsak a sawm uh hi.

⁴⁰A sikkipte attat in tuipi sungah nusia uh a, tua hun mah in tembaw heina khihna khaute zong a phel uh hi. Tua ciangin tembaw mailam puanzak huih mut dingin khai uh a, tui gei lam ka zuan uh hi.

⁴¹Ahi hangin tembaw in sehtak kho khat phukha-a, leitungah a kingacip hi. A mailam in phukha a, tangkhia thei nawn loin a nunglam zong tui kilok in a sattam gawp hi.

⁴²Galkapte in thong kiate tui pekin a suahtak khak ding uh dalna in thah a sawm uh hi.

⁴³Ahi hangin zakhat ukpa in Paul suaktasak nuam ahi manin amau sawmna a hihsak kei hi. Amah in tui pek theite tembaw tung pan leitung ah a diangkhia masa dingin thu a pia hi.

⁴⁴A om lai teng singpek tung peuh, tembaw sia tung peuh ah tuangin a pai uh kul hi. Hici bangin mi khempeuh leitung ah a suakta uh hi.